বিহাৰ চৰকাৰৰ কাৰাগাৰৰ নীতি পৰিবৰ্তনক লৈ চলি থকা তুমুল বিতৰ্কৰ মাজতে আজি পুৱতি নিশা কাৰাগাৰৰ পৰা ওলাই আহিল বিহাৰৰ প্ৰাক্তন সাংসদ আনন্দ মোহন সিঙ।
১৯৯৪ চনত এগৰাকী আই এ এছ বিষয়াৰ হত্যাকাণ্ডত সহযোগ কৰাৰ অপৰাধত ১৫ বছৰ কাৰাদণ্ড ভুগি থকা সিঙ বৰ্তমানৰ ক’ত আছে জানিব পৰা হোৱা নাই। সাংবাদিকে তেওঁৰ পুত্ৰ তথা ৰাষ্ট্ৰীয় জনতা দলৰ বিধায়ক চেতন আনন্দৰ সৈতে ফোনযোগে যোগাযোগ কৰিব পৰা নাই আৰু পৰিয়ালটোৰ ঘৰত তলা ওলমি আছে।
অভিযুক্ত প্ৰাক্তন সাংসদগৰাকীক প্ৰথমে পুৱা প্ৰায় ৭ বজাত মুকলি কৰি দিয়াৰ কথা আছিল। কিন্তু সংবাদ মাধ্যমৰ পৰা আঁতৰি থাকিবলৈ হঠাৎ পৰিকল্পনা সলনি কৰা বুলি জানিব পৰা গৈছে।
পুত্ৰৰ বিয়াৰ বাবে ১৫ দিনৰ পেৰ’লত ওলাই আহিছিল সিং। বিৰতিৰ সময়ত তেওঁ সংবাদ মাধ্যমৰ সৈতে কথা পাতিছিল। কালিহে জেললৈ উভতি আহিছিল তেওঁ।
বিহাৰৰ নীতিশ কুমাৰ চৰকাৰে জেলৰ নতুন নিয়মৰ বিষয়ে সদৰী কৰাৰ পিছতে জেলৰ পৰা মুক্তি লাভ কৰিছে প্ৰাক্তন সাংসদগৰাকীয়ে। ইয়াৰ পূৰ্বে কৰ্তব্যৰত চৰকাৰী সেৱকক হত্যাৰ গোচৰত দোষী সাব্যস্ত হোৱা যিকোনো ব্যক্তিৰ শাস্তি ক্ষমাৰ যোগ্য নাছিল। কিন্তু বিহাৰ চৰকাৰে এই নিয়ম সলনি কৰি ১৪ বছৰ বা তাতোকৈ অধিক সময় কাৰাদণ্ডৰ লাভ কৰা সিঙকে ধৰি ২৭ জন দোষীৰ মুক্তিৰ পথ মুকলি কৰি দিয়ে।
উল্লেখ্য যে একাধিক গোচৰৰ সন্মুখীন হোৱা সিঙক ১৯৯৪ চনত জিলা দণ্ডাধীশ জি কৃষ্ণইয়া নামৰ দলিত আই এ এছ বিষয়াক হত্যা কৰাত উচটনি দিয়াৰ অপৰাধত দোষী সাব্যস্ত কৰা হয়।
ইফালে সিঙৰ মুক্তিক লৈ হতাশা প্ৰকাশ কৰিছে প্ৰয়াত আই এ এছ বিষয়াগৰাকীৰ পত্নীয়ে। সাংবাদিকৰ সৈতে হোৱা কথা–বতৰাত বিষয়াগৰাকীৰ পত্নী উমা কৃষ্ণিয়াই কয়, “আমি এই পদক্ষেপৰ সৈতে একমত নহয়। ই এক প্ৰকাৰে অপৰাধীক উৎসাহিত কৰিব। ইয়াৰ দ্বাৰা এটা বাৰ্তা প্ৰেৰণ কৰা হৈছে যে আপুনি অপৰাধ কৰিব পাৰে, আৰু জেললৈ যাব পাৰে কিন্তু তাৰ পিছত মুক্ত হৈ পুনৰ ৰাজনীতিত যোগদান কৰিব পাৰে। সিঙক আদালতে মৃত্যুদণ্ড দিয়া উচিত আছিল।“
ইয়াৰ লগতে দেশৰ আমোলাৰ শীৰ্ষ সংস্থা চেণ্ট্ৰেল আই এ এছ এছ’চিয়েশ্যনে এই পদক্ষেপক তীব্ৰ সমালোচনা কৰিছে। তেওঁলোকে কৈছে এনে পদক্ষেপে লোকসেৱাত নিয়োজিত বিষয়াৰ মনোবল ক্ষয় কৰে, জনশৃংখলাক ক্ষতিগ্ৰস্ত কৰে আৰু ন্যায় প্ৰশাসনক উপহাস কৰে।
বহুজন সমাজ পাৰ্টিৰ মুৰব্বী মায়াৱতীয়েও সিঙৰ মুক্তিৰ পথ প্ৰশস্ত কৰা বিহাৰ চৰকাৰৰ এই পদক্ষেপক সমালোচনা কৰি “দলিত বিৰোধী” পদক্ষেপ বুলি অভিহিত কৰিছে।
