দেশৰ প্ৰাক্তন মুখ্য ন্যায়াধীশ ডি ৱাই চন্দ্ৰচুড়ে এতিয়াও চৰকাৰী বাসভৱন খালী নকৰাত বিতৰ্কৰ সৃষ্টি হৈছে। ইতিমধ্যে উচ্চতম ন্যায়ালয়ে কেন্দ্ৰীয় গৃহ নিৰ্মাণ আৰু নগৰ উন্নয়ন মন্ত্ৰালয়লৈ পত্ৰ প্ৰেৰণ কৰি বাংলো খালী কৰাৰ বাবে জৰুৰী পদক্ষেপ ল’বলৈ কৈছে। অৱশ্যে এই পৰিস্থিতিত চন্দ্ৰচুড়ে নিজেই নিজৰ স্থিতি ব্যাখ্যা কৰিছে।
তেওঁৰ মতে সমগ্ৰ বিষয়টো কেৱল প্ৰশাসনিক নহয়। ইয়াৰ আঁৰত আছে তেওঁৰ বিশেষভাৱে সক্ষম দত্তক কন্যা দুগৰাকীৰ প্ৰয়োজন।
সৰ্বভাৰতীয় সংবাদ মাধ্যমৰ সৈতে হোৱা এক সাক্ষাৎকাৰত প্ৰাক্তন মুখ্য ন্যায়াধীশগৰাকীয়ে কয়, “মোৰ কন্যা সন্তানক বিশেষ যত্নৰ প্ৰয়োজন। ডাঙৰ কন্যাৰ বাবে এনে এটা কোঠা নিৰ্মাণ কৰা হৈছে য’ত আইচিইউৰ দৰে সুবিধা আছে। এনেকৈ নিৰ্দিষ্ট প্ৰয়োজনীয়তা পূৰণ কৰিব পৰা ঘৰ খৰখেদাকৈ বিচাৰি পোৱাটো অসম্ভৱ। সেয়েহে কেন্দ্ৰক অস্থায়ী বিকল্প ব্যৱস্থা কৰিবলৈ অনুৰোধ জনাইছো।”
তেওঁ লগতে জনায় যে সেই অস্থায়ী ঘৰটো নিৰ্মাণৰ কাম প্ৰায় সম্পূৰ্ণ হৈছে। তেওঁ কয়, “মোৰ প্ৰয়োজন অনুসৰি এটা অস্থায়ী বাংলো নিৰ্মাণ কৰা হৈছে। সেই কাম সম্পূৰ্ণ হোৱাৰ লগে লগে আমি পিছদিনাই সপৰিয়ালে থাকিবলৈ যাম। আমাৰ সকলো ঠিকঠাক কৰি লোৱা হৈছে।”
প্ৰসংগক্ৰমে দিল্লীৰ ৫, কৃষ্ণ মেনন মাৰ্গত থকা ‘টাইপ এইট’ বাংলোটো দেশৰ মুখ্য ন্যায়াধীশৰ চৰকাৰী বাসভৱন হিচাপে নিৰ্ধাৰণ কৰা হৈছে। ন্যায়াধীশ চন্দ্ৰচুড়ে ২০২৪ চনৰ নৱেম্বৰ মাহত মুখ্য ন্যায়াধীশ পদৰ পৰা অৱসৰ গ্ৰহণ কৰিছিল।কিন্তু তেওঁ এতিয়াও সেই বাসভৱনতে বাস কৰি আছে।
তেওঁৰ উত্তৰাধিকাৰী প্ৰাক্তন মুখ্য ন্যায়াধীশ সঞ্জীৱ খান্না বা বৰ্তমানৰ মুখ্য ন্যায়াধীশ বি আৰ গাভাই কোনোৱে এই বিশেষ বাংলোটোলৈ যোৱা নাই। পূৰ্বৰ চৰকাৰী বাসভৱনতে থাকি গৈছে।
উচ্চতম ন্যায়ালয়ে প্ৰেৰণ কৰা পত্ৰত কোৱা হৈছে যে ন্যায়াধীশ চন্দ্ৰচুড়ে যোৱা বছৰৰ ডিচেম্বৰ মাহত তেতিয়াৰ মুখ্য ন্যায়াধীশ খান্নাৰ পৰা ৩০ এপ্ৰিললৈকে থাকিবলৈ লিখিত অনুমতি বিচাৰিছিল।
যদিও ১৪, টুঘলক ৰোডত এটা বাংলো তেওঁৰ বাবে নিৰ্ধাৰণ কৰা হৈছিল, তথাপিও দিল্লীত প্ৰদূষণৰ নিষেধাজ্ঞাৰ বাবে সেই বাংলোটোৰ সংস্কাৰৰ কাম স্তব্ধ হৈ পৰে।
গৃহ নিৰ্মাণ মন্ত্ৰালয়ে জনোৱা মতে, মাহে ৫৪৩০ টকা অনুজ্ঞাপত্ৰ মাচুল দি চন্দ্ৰচুড়ে সাময়িকভাৱে সেই বাংলোটোতে থাকিব পাৰিব। কিন্তু মে’ মাহৰ পাছতো তেওঁ তাতেই আছে। তেওঁ ন্যায়াধীশ খান্নাক ৩১ মে’লৈকে অতিৰিক্তভাৱে থকাৰ বাবে মৌখিক অনুৰোধো জনাইছিল।
