মধ্যপ্ৰদেশৰ প্ৰাক্তন মুখ্যমন্ত্ৰী তথা জ্যেষ্ঠ কংগ্ৰেছ নেতা, ৰাজ্য বিধানসভাৰ বিৰোধী দলৰ নেতা কমল নাথে বৃহস্পতিবাৰে এই পদৰ পৰা পদত্যাগ কৰিছে। অৱশ্যে প্ৰদেশ কংগ্ৰেছৰ সভাপতি পদৰ পৰা পদত্যাগ কৰা নাই নাথে।
কমল নাথৰ স্থানত বিৰোধী দলৰ নেতা হিচাপে দায়িত্ব লাভ কৰিছে ভিন্দ জিলাৰ লাহাৰ বিধানসভা সমষ্টিৰ পৰা সাতবাৰৰ বিধায়ক গোবিন্দ সিং।
লগতে পঢ়ক: সকলো ইন্ধন কৰৰ ৬৮ শতাংশ নিয়ে কেন্দ্ৰই, তথাপি দায় সাৰিব খোজে প্ৰধানমন্ত্ৰীয়ে: ৰাহুল গান্ধী
কংগ্ৰেছ সভাপতি ছোনিয়া গান্ধীৰ নিৰ্দেশত দলে কমল নাথৰ পদত্যাগ পত্ৰ গ্ৰহণ কৰা বুলি কংগ্ৰেছৰ সাধাৰণ সম্পাদক কে চি বেনুগোপালে জানিবলৈ দিছে। কমল নাথৰ পদত্যাগ পত্ৰৰ উত্তৰত লিখা পত্ৰখনত কোৱা হৈছে যে গোবিন্দ সিঙক প্ৰদেশ কংগ্ৰেছৰ সভাপতি পদৰ বাবে নিৰ্বাচিত কৰাৰ এক প্ৰস্তাৱতো কংগ্ৰেছ হাইকমাণ্ডে সঁহাৰি জনাইছে।
বিগত বহুদিন ধৰি বিৰোধী নেতাৰ পদৰ এৰিব বিচাৰি আছিল কমল নাথে। ‘এক ব্যক্তি এক পদ’ নীতি অনুসৰণ কৰিয়েই তেওঁ এইদৰে পদত্যাগ কৰা বুলি জানিব পৰা গৈছে।
কিন্তু হঠাতে কমল নাথৰ পদত্যাগকলৈ চৰ্চা চলিছে। দৰাচলতে অহা ২০২৩চনত মধ্যপ্ৰদেশ বিধানসভাৰ নিৰ্বাচন আছে। নিৰ্বাচনত কংগ্ৰেছ বিজয়ী হ’বলৈ হ’লে কমল নাথে গুৰুত্বপূৰ্ণ ভূমিকা পালন কৰিব লাগিব। সেয়ে তেওঁ এইদৰে পদত্যাগ কৰা বুলি ক’ব খোজে একাংশ মহলে। এতিয়া তেওঁ সম্পূৰ্ণভাৱে নিৰ্বাচনৰ ৰণ কৌশল প্ৰস্তুত কৰাত আত্মনিয়োগ কৰিব।
লগতে পঢ়ক: প্ৰধানমন্ত্ৰী মোদীৰ সভাকলৈ এফালে সকলো ব্যস্ত, আনফালে মোদী মুৰ্দাবাদ ধ্বনিত কঁপিল বৰপেটা
সাতবাৰৰ বিধায়ক কমল নাথ ৰাষ্ট্ৰীয় পৰ্যায়ত কংগ্ৰেছ নেতৃত্বৰ এখন গুৰুত্বপূৰ্ণ মুখ। তেওঁৰ মতামত শীৰ্ষ নেতৃত্ব তথা ১০ নং জনপথৰ বাবে যথেষ্ট গুৰুত্বপূৰ্ণ। তদুপৰি, তেওঁ ৰাজ্যখনৰ প্ৰাক্তন মুখ্যমন্ত্ৰী। দুৰ্ভাগ্যজনকভাৱে জ্যোতিৰাদিত্য সিন্ধিয়াকে ধৰি কেইবাজনো বিধায়কে হঠাতে বিজেপিত যোগদান কৰাৰ পিছতে কমল নাথ চৰকাৰৰ পতন ঘটিছিল।
