বুধবাৰে (৬ মে’, ২০২৬) মুখ্যমন্ত্ৰী হিমন্ত বিশ্ব শৰ্মাৰ পদত্যাগৰ সৈতে অসম চৰকাৰৰ কাৰ্যকাল শেষ হোৱাৰ পাছতো বিতৰ্কিত অৱসৰপ্ৰাপ্ত আই এফ এছ বিষয়া এম কে যাদৱক বিশেষ মুখ্য সচিব (বন) হিচাপে কাম অব্যাহত ৰখাক লৈ বিতৰ্কৰ সৃষ্টি হৈছে।
মুখ্যমন্ত্ৰী শৰ্মাই ৰাজ্যপাল লক্ষ্মণ প্ৰসাদ আচাৰ্যৰ ওচৰত পদত্যাগ পত্ৰ দাখিল কৰি ৰাজ্যখনত নতুন চৰকাৰ গঠনৰ বাট মুকলি কৰি দিছে।
কিন্তু যাদৱৰ কাৰ্যকাল অব্যাহত ৰখাক লৈ এতিয়া প্ৰশ্ন উত্থাপন হৈছে, কিয়নো অসম চৰকাৰৰ কৰ্মচাৰী বিভাগে তেওঁৰ কাৰ্যকাল “ৰাজ্য চৰকাৰৰ বৰ্তমানৰ কাৰ্যকালৰ সৈতে একেলগে সমাপ্ত (কো-টাৰ্মিনাছ) হ’ব” বুলি স্পষ্টকৈ উল্লেখ কৰিছিল।
২০২৫ চনৰ ২১ ফেব্ৰুৱাৰীত জাৰি কৰা এক আদেশত কৰ্মচাৰী বিভাগে যাদৱৰ পূৰ্বৰ কাৰ্যকাল ২০২৫ চনৰ ২৮ ফেব্ৰুৱাৰীত সম্পূৰ্ণ হোৱাৰ পিছত ২০২৫ চনৰ ১ মাৰ্চৰ পৰা কাৰ্যকৰী হোৱাকৈ বিশেষ মুখ্য সচিব (বন) হিচাপে পুনৰ নিযুক্তিৰ সময় বৃদ্ধি কৰিছিল।
আদেশত কোৱা হৈছে যে, “এম কে যাদৱ, আই এফ এছ (অৱসৰপ্ৰাপ্ত), বিশেষ মুখ্য সচিব (বন)ক বিশেষ মুখ্য সচিব (বন) হিচাপে ২০২৫চনৰ ১ মাৰ্চৰ পৰা কাৰ্যকৰী হোৱাকৈ পুনৰ নিয়োগ কৰা হৈছে আৰু বৰ্তমানৰ ৰাজ্য চৰকাৰৰ কাৰ্যকালৰ সৈতে কাৰ্যকাল সমাপ্ত হ’ব।”
কিন্তু চৰকাৰৰ কাৰ্যকাল শেষ হোৱাৰ পিছত ৬ মে’ত মুখ্যমন্ত্ৰীয়ে পদত্যাগ কৰাৰ পিছতো যাদৱে কাৰ্যভাৰ অব্যাহত ৰাখিছে। সূত্ৰই জনোৱা মতে, তেওঁ এতিয়াও দিছপুৰস্থিত নিজৰ কাৰ্যালয়ৰ পৰা কাম কৰি আছে আৰু বন বিভাগৰ বিষয়াসকলক নিৰ্দেশনা জাৰি কৰি আছে।
সূত্ৰৰ পৰা জানিব পৰা মতে, নতুন চৰকাৰ গঠনৰ লগে লগে যাদৱে পুনৰ নিযুক্তিৰ বাবেও লবী কৰি আছে। তিনিজন বিষয়াৰ এটা পেনেল বিবেচনাৰ বাবে প্ৰেৰণ কৰা হৈছে বুলি জানিব পৰা গৈছে, য’ত দুজন আই এ এছ বিষয়াৰ সৈতে যাদৱৰ নাম অন্তৰ্ভুক্ত কৰা হৈছে।
২০২৪ চনৰ ২৯ ফেব্ৰুৱাৰীত প্ৰধান মুখ্য বন সংৰক্ষক (পিচিচিএফ) আৰু বন বাহিনীৰ মুৰব্বী হিচাপে অৱসৰ গ্ৰহণ কৰাৰ পিছত ২০২৪ চনৰ মাৰ্চ মাহত প্ৰথমবাৰৰ বাবে যাদৱক বিশেষ মুখ্য সচিব (বন) হিচাপে অসমৰ কেবিনেটে পুনৰ নিয়োগ কৰিছিল ।
এই কাৰ্যকাল বৃদ্ধিৰ বাবে বিৰোধী দলসমূহৰ তীব্ৰ সমালোচনাৰ সন্মুখীন হৈছিল, বিশেষকৈ অসম কংগ্ৰেছে এই নিযুক্তিক “ৰাজনৈতিক” আৰু “আইনীভাৱে প্ৰশ্নবোধক” বুলি অভিহিত কৰিছিল। বিৰোধী নেতাসকলে যুক্তি দিছিল যে এজন অৱসৰপ্ৰাপ্ত সৰ্বভাৰতীয় সেৱাৰ বিষয়াক সম্পূৰ্ণ বিত্তীয় আৰু কাৰ্যবাহী ক্ষমতাৰে জ্যেষ্ঠ প্ৰশাসনিক পদত পুনৰ নিয়োগ কৰিলে কেন্দ্ৰীয় সেৱাৰ নীতি-নিয়ম উলংঘা কৰা হয়।
তেওঁৰ কাৰ্যকালত বনাঞ্চলৰ ভূমি ৰূপান্তৰৰ ধাৰাবাহিক বিতৰ্কিত সিদ্ধান্তক লৈও তদন্তৰ সন্মুখীন হৈছে যাদৱ।
এটা ডাঙৰ গোচৰত তেওঁ হাইলাকান্দি জিলাৰ অসম-মিজোৰাম সীমান্তৰ সমীপৰ এটা কমাণ্ডো বেটেলিয়নৰ বাবে ২০২৩ চনত প্ৰায় ৪৪ হেক্টৰ বনাঞ্চল ভূমি কেন্দ্ৰীয় পৰিৱেশ মন্ত্ৰালয়ৰ পৰা বাধ্যতামূলক পূৰ্ব অনুমোদন অবিহনে সলনি কৰিবলৈ অনুমোদন জনোৱা বুলি অভিযোগ উঠিছে।
পিছত এই বিষয়টো ৰাষ্ট্ৰীয় সেউজ ন্যায়াধিকৰণ আৰু কেন্দ্ৰীয় পৰিৱেশ, বন আৰু জলবায়ু পৰিৱৰ্তন মন্ত্ৰালয়ৰ নিৰীক্ষণৰ আওতালৈ আহিছিল আৰু ২০২৪ চনত তেওঁক বন সংৰক্ষণ আইন, ১৯৮০ উলংঘাৰ অভিযোগত কাৰণ দৰ্শোৱাৰ জাননী জাৰি কৰিছিল।
আন এটা গোচৰত যাদৱে ২০২২ চনত অসম-নগালেণ্ড সীমান্তৰ গেলেকী সংৰক্ষিত বনাঞ্চলৰ ২৮ হেক্টৰ বনাঞ্চলৰ ভূমি সলনি কৰি (ডাইভাৰছন) কেন্দ্ৰৰ পূৰ্ব অনুমোদন অবিহনে আৰক্ষী বেটেলিয়ন শিবিৰৰ বাবে মুকলি কৰি দিয়াৰ অভিযোগ উত্থাপন হৈছে।
পৰৱৰ্তী সময়ত কেন্দ্ৰীয় পৰিৱেশ মন্ত্ৰালয়ৰ বন পৰামৰ্শদাতা সমিতিয়ে অসম চৰকাৰৰ ওপৰত বৃহৎ জৰিমনা আৰোপ কৰিছিল, য’ত ১২ শতাংশ সাধাৰণ সুতৰ লগতে ষ্টেণ্ডাৰ্ড নেট প্ৰেজেন্ট ভেল্যু (এন পি ভি)ৰ পাঁচগুণ ধন পৰিশোধ কৰাটোও আছিল।
সূত্ৰসমূহে লগতে দাবী কৰে যে ২০২৫ চনৰ জুলাই মাহত এই ভূমি ৰূপান্তৰৰ (ডাইভাৰচন) গোচৰসমূহৰ সৈতে জড়িত বন সংৰক্ষণ আইন উলংঘা কৰাৰ অভিযোগত কেন্দ্ৰীয় পৰিৱেশ মন্ত্ৰালয়ে যাদৱৰ বিৰুদ্ধে আইনী ব্যৱস্থা গ্ৰহণৰ নিৰ্দেশ দিছিল। অৱশ্যে ৰাজ্য চৰকাৰে কোনো ব্যৱস্থা গ্ৰহণ নকৰিলে।
