উত্তৰ-পূব দিল্লীৰ হিংসাত্মক সংঘৰ্ষৰ সৈতে জড়িত থকাৰ অভিযোগত কাৰাবন্দী হৈ থকা জে এন ইউ- ৰ প্ৰাক্তন ছাত্ৰ ওমৰ খালিদক আজি সাময়িক সকাহ প্ৰদান কৰিছে আদালতে। দিল্লীৰ আদালতে আজি নিজ ভগ্নীৰ বিয়াৰ বাবে খালিদক এসপ্তাহৰ অন্তৱৰ্তীকালীন জামিন প্ৰদান কৰে।
অতিৰিক্ত অধিবেশন ন্যায়াধীশ অমিতাভ ৰাৱাটে আজি ওমৰ খালিদৰ জামিন আবেদনৰ শুনানি গ্ৰহণ কৰি ২৩ ডিচেম্বৰৰ পৰা ৩০ ডিচেম্বৰলৈ অন্তৱৰ্তীকালীন জামিন প্ৰদান কৰি ভগ্নীৰ বিয়াত উপস্থিত থকাৰ সুযোগ দিয়ে খালিদক।
অৱশ্যে খালিদে জামিন আবেদনত দুই সপ্তাহৰ বাবে জামিনৰ অনুৰোধ জনাইছিল যদিও আদালতে এসপ্তাহৰ বাবেহে অন্তৱৰ্তীকালীন জামিন মঞ্জুৰ কৰে।
উল্লেখ্য যে খালিদক ২০২০ চনৰ ফেব্ৰুৱাৰী মাহত সংঘটিত হোৱা দিল্লীৰ হিংসাত্মক কাণ্ডৰ মাষ্টাৰমাইণ্ড বুলি অভিযোগ কৰা হৈছিল আৰু এই গোচৰত তেওঁৰ বিৰুদ্ধে অবৈধ কাৰ্যকলাপ (প্ৰতিৰোধ) আইন (UAPA) আৰু ভাৰতীয় দণ্ডবিধিৰ প্ৰাসঙ্গিক ধাৰাৰ অধীনত গোচৰ ৰুজু কৰা হৈছিল।
নাগৰিকত্ব (সংশোধনী) আইন আৰু ৰাষ্ট্ৰীয় নাগৰিকপঞ্জীৰ বিৰুদ্ধে প্ৰতিবাদৰ সময়ত সংঘটিত এই হিংসাত্মক কাণ্ডৰ মূল অভিযুক্ত বুলি খালিদৰ ওপৰত অভিযোগ আৰোপ কৰি ২০২০ চনৰ ছেপ্টেম্বৰ মাহত দিল্লী আৰক্ষীয়ে তেওঁক গ্ৰেপ্তাৰ কৰিছিল।
স্মৰ্তব্য যে এই হিংসাত্মক কাণ্ডৰ সময়ত কৰ্তব্যৰত আৰক্ষী কৰ্মীলৈ শিলগুটি নিক্ষেপৰ অভিযোগ তুলি খালিদৰ বিপক্ষে আন এক গোচৰ আৰোপ কৰা হৈছিল। কিন্তু শেহতীয়াকৈ এই গোচৰত ছাত্ৰ নেতাগৰাকীক দোষমুক্ত ঘোষণা কৰিছিল আদালতে।
যোৱা ৩ ডিচেম্বৰত দিল্লীৰ আদালতে ওমৰ খালিদৰ লগতে খালিদ ছাইফী, তাৰিক মঈন ৰিজৱী, জাগৰ খান আৰু মহম্মদ ইলিয়াছক আদালতে দোষমুক্ত ঘোষণা কৰিছিল। অৱশ্যে খালিদ আৰু ছাইফি UAPA গোচৰত এইপৰ্যন্ত জামিন লাভ নকৰাৰ বাবে ন্যায়িক জিম্মাতে থাকিব লাগিব।
