কাৰ্বি আংলং স্বায়ত্ত শাসিত পৰিষদৰ প্ৰাক্তন কাৰ্যবাহী সদস্য ৰতন ইংতি আৰু ডিফু নগৰ সমিতিৰ প্ৰাক্তন সভাপতি ডেনিয়েল ইংতিয়ে শুকুৰবাৰে কাৰ্বি আংলঙৰ স্বায়ত্ত পৰিষদৰ দুৱাৰবাগৰি সদস্যৰ সমষ্টি দোলামাৰাত অনুষ্ঠিত এখন জনসভাত তেওঁলোকৰ সমৰ্থকৰ সৈতে কংগ্ৰেছত যোগদান কৰে।
বৰ্তমানৰ সাংসদ তথা ৩নং স্বায়ত্ত শাসিত জিলা লোকসভা সমষ্টিৰ কংগ্ৰেছ প্ৰাৰ্থী বীৰেন সিং ইংতিয়ে কয়,’’মই তিনিখন পাহাৰীয়া জিলাৰ ৰাইজৰ সমস্যাসমূহ সমাধানৰ বাবে পদক্ষেপ গ্ৰহণ কৰিম। মুখ্য কাৰ্যবাহী সদস্য তুলিৰাম ৰংহাঙৰ নেতৃত্বৰ কাৰ্বি আংলং স্বায়ত্ত শাসিত পৰিষদখনে দোলামাৰা ফৰেষ্ট ৰেঞ্জৰ পৰা মাত্ৰ ৩ কিলোমিটাৰ পথহে নিৰ্মাণ কৰিছে। ই কেবল শিল ভঙা আৰু কুৱেৰী চলাই থকাসকলকহে উপকৃত কৰিব।‘’
ইয়াৰ পূৰ্বে পাঁচ বছৰ গেৰুৱা দলটোত কটাই পুনৰ কংগ্ৰেছৰ মাজলৈ উভতি অহা কাৰ্বি আংলং স্বায়ত্ত শাসিত পৰিষদৰ প্ৰাক্তন কাৰ্যবাহী সদস্য ৰতন ইংতিয়ে কয়, ‘’মই বিজেপিৰ প্ৰতি অসন্তুষ্ট হোৱাৰ কৰাণটো হৈছে যে তেওঁলোকে বিগত ২০১৪চনৰ লোকসভা নিৰ্বাচনত আগবঢ়োৱা ১০ টা প্ৰতিশ্ৰুতি যোৱা পাঁচ বছৰে পূৰণ নকৰিলে। বিজেপিত জ্যেষ্ঠ নেতা তথা সদস্যৰ বাবে কোনো স্থান নাই আৰু ইয়াত কাৰ্বি আংলং স্বায়ত্ত শাসিত পৰিষদৰ নিৰ্বাচিত সদস্যই দলীয় পৰ্যায়কে ধৰি সকলো নিয়ন্ত্ৰণ কৰে।‘’
তেওঁ লগতে কয়,’’ বিজেপিৰ আন এটা ভয়ংকৰ কথা হৈছে তেওঁলোকে নাগৰিকত্ব সংশোধনী বিধেয়ক ২০১৬ আৰু য়ুনিফৰ্ম চিভিল ক’ডৰ পক্ষত স্থিতি গ্ৰহণ কৰিছে যিটোৱে পাহাৰীয়া লোকসকলক প্ৰভাৱিত কৰিব আৰু তেওঁলোকে সংস্কৃতি, ভাষা আৰু পৰম্পৰা হেৰুৱাব লাগিব। এই সকলোবোৰৰ বাবে মই বিজেপি ত্যাগ কৰিছো আৰু কংগ্ৰেছলৈ উভতি আহিছো।‘’
উক্ত সভাখনত নিলিপ ব্লক কংগ্ৰেছ কমিটিৰ সভাপতি ৰাজেনইংতি আৰু দুৱাৰবাগৰি মণ্ডল কংগ্ৰেছ কমিটিৰ সভাপতি ৰেনছিং টেৰণ, কাৰ্বি আংলং স্বায়ত্ত শাসিত পৰিষদৰ প্ৰাক্তন কাৰ্যবাহী সদস্য সূৰ্য ৰংফাৰো উপস্থিত থাকে।
