পঞ্জাৱৰ প্ৰাক্তন আই পি এছ বিষয়া অমৰ সিং চাহালে এজন নিৰাপত্তাৰক্ষীৰ ৰাইফল কাঢ়ি লৈ আত্মহত্যাৰ চেষ্টা চলায়। গুৰুতৰভাৱে আহত বিষয়াগৰাকী চিকিৎসালয়ত চিকিৎসাধীন হৈ আছে। জানিব পৰা মতে, চাইবাৰ জালিয়াতিৰ দ্বাৰা প্ৰতাৰিত হৈ আৰক্ষী বিষয়াজনে সকলো হেৰুৱাই পেলাইছিল। এই ধনৰ পৰিমান প্ৰায় ৮.১০ কোটি টকা।
পাটিয়ালাৰ এছ এছ পি বৰুণ শৰ্মাই জানিবলৈ দিয়ে যে অমৰ সিং পঞ্জাৱ আৰক্ষীৰ প্ৰাক্তন আই জি। সোমবাৰে বিয়লি নিজ ঘৰত নিৰাপত্তাৰক্ষীৰ বন্দুক কাঢ়ি লৈ আত্মহত্যাৰ চেষ্টা চলায়।
তেওঁৰ ঘৰৰ পৰা উদ্ধাৰ হৈছে এটা আত্মহত্যাৰ টোকা। পঞ্জাৱ আৰক্ষীৰ ডি আই জিলৈ তেওঁ এই ১২ পৃষ্ঠাৰ পত্ৰখন লিখিছিল। তাত লিখা আছে যে আৰক্ষী বিষয়াজন শেহতীয়াকৈ চাইবাৰ অপৰাধৰ বলি হৈছিল। জীৱনৰ সকলো সঞ্চয় হেৰুৱাই মানসিক বিষণ্ণতাত ভুগিছিল আৰক্ষী বিষয়াগৰাকী। যাৰ বাবেই এই ঘটনা সংঘটিত হয়।
আৰক্ষী বিষয়া বৰুণ শৰ্মাই কয় যে গুলীচালনাৰ খবৰ পোৱাৰ লগে লগে আমি আই পি এছ বিষয়াজনৰ ঘৰলৈ গৈ ৰক্তাক্ত অৱস্থাত তেওঁক উদ্ধাৰ কৰি চিকিৎসালয়লৈ প্ৰেৰণ কৰিলোঁ। চিকিৎসালয়ৰ সূত্ৰ অনুসৰি তেওঁৰ অৱস্থা অত্যন্ত সংকটজনক।
উল্লেখ্য যে এই প্ৰাক্তন পঞ্জাৱ আৰক্ষী বিষয়াগৰাকীৰ বিৰুদ্ধে ২০১৫ চনত ফৰিদকোটত বেহবাল কালান আৰু কোটকাপুৰাত শিখসকলৰ সমাৱেশত গুলীচালনাৰ অভিযোগ উত্থাপন হৈছিল।
২০২৩ চনৰ ২৪ ফেব্ৰুৱাৰীত ফৰিদকোটৰ এখন আদালতত এছ আই টিয়ে সেই গোচৰৰ অভিযোগনামা দাখিল কৰে। তাত অমৰ সিং আৰু কেইবাজনো জ্যেষ্ঠ আৰক্ষী বিষয়াৰ নাম উল্লেখ কৰা হৈছিল। সেইগৰাকী অমৰ সিঙৰ আত্মহননৰ চেষ্টাৰ ঘটনাই চাঞ্চল্যৰ সৃষ্টি কৰিছে। আৰক্ষী বিষয়াসকলে গোটেই ঘটনাটো পুংখানুপুংখভাৱে চাই আছে।
