দেশৰ ৰাজধানী চহৰ নতুন দিল্লীত সাধাৰণ মানুহতো বাদেই ভিআইপিৰো জীৱনৰ কোনো নিৰাপত্তা নোহোৱা হৈ পৰিছে।
তাৰেই প্ৰমাণ পোৱা ‘ল শেহতীয়াকৈ। দক্ষিণ দিল্লীৰ বসন্ত বিহাৰৰ নিজৰ বাসভৱনতেই ডকাইতে হত্যা কৰিলে প্ৰাক্তন কেন্দ্ৰীয় মন্ত্ৰী পিআৰ কুমাৰমংগলমৰ পত্নী তথা উচ্চতম ন্যায়ালয়ৰ অধিবক্তা কিট্টি কুমাৰমংগলমক।
আৰক্ষী সূত্ৰই প্ৰকাশ কৰা মতে যোৱা নিশা প্ৰায় ন বজাত কিট্টি কুমৰমংগলমৰ ঘৰলৈ এজন ধুবী আহে।
সেই সময়ত কুমাৰমংগলমৰ ঘৰত তেওঁৰ ঘৰৰ কাম কৰা লোক জনৰ বাদে আন কোনো নাছিল। নিশা অহা দুবী জনক চিনাকী সূত্ৰে কাম কৰা লোক জনে দুৱাৰ খুলি দিছিল।
ঘৰত প্ৰৱেশ কৰিয়েই ধুবী জনে তেওঁৰ লগত যোৱা আন দুজন লোকৰ সৈতে মিলি কাম কৰা লোক জনক কাবু কৰি পেলায় আৰু কুমাৰমংগলমকো বান্ধি পোলায়।
ইয়াৰ পিছতে ডকাইতৰ দলটোৱে ঘৰটোত লুটপাত চলায় আৰু কিট্টি কুমাৰমংগলমক গাৰুৰে শ্বাসৰুদ্ধ কৰি হত্যা কৰে।
নিশা প্ৰায় ১১ বজাত আৰক্ষীয়ে এই সম্পৰ্কে জানিব পাৰি ঘটনাস্থলীলৈ যায় আৰু অনুসন্ধান আৰম্ভ কৰে।
আৰক্ষীয়ে নিশাই বসন্ত বিহাৰৰ ভানৱৰ কেম্পৰ পৰা ৰাজু নামৰ মূল হত্যাকাৰী জনক গ্ৰেপ্তাৰ কৰিবলৈ সক্ষম হয়।
বাকী দুজন হত্যাকাৰী পলাতক অৱস্থাত আছে।উল্লেখ্য মৃত কিট্টি কুমৰমংগলমৰ স্বামী পিআৰ কুমাৰমংগলমে ১৯৮৪ চনত সংসদলৈ নিৰ্বাচিত হৈ কেইবাৰো কেন্দ্ৰীয় মন্ত্ৰী হৈছিল।
১৯৯৮ চনত তেওঁ দেশৰ শক্তি মন্ত্ৰী আছিল।
