দৰ্শক আৰু শ্ৰোতাৰ হৃদয় জয় কৰি অহা জনপ্ৰিয় শিল্পী জুবিন গাৰ্গৰ হামিং বা গুণগুণনিৰ আঁৰৰ ৰহস্য এতিয়া বিজ্ঞানসন্মতভাৱে প্ৰমাণিত হৈছে। দশক দশক ধৰি তেওঁৰ এই মায়াবী কণ্ঠক মানুহে মৰমেৰে আদৰি আহিছে। ইমান দিনে অনুৰাগীৰ বিপুল সঁহাৰি আৰু ইণ্টাৰনেটত চৰ্চাৰ বাবেই জুবিন গাৰ্গক বিশ্বৰ হামিং কিং বুলি কোৱা হৈছিল। ইয়াৰ আঁৰত কোনো বৈজ্ঞানিক গৱেষণা নাছিল। কিন্তু এতিয়া পোন প্ৰথমবাৰৰ বাবে তেওঁৰ হামিঙৰ গাণিতিক আৰু ধ্বনিগত ৰহস্য ফাদিল হৈছে।
আমেৰিকা যুক্তৰাষ্ট্ৰৰ বিশ্বৰ আগশাৰীৰ কণ্ঠ বিজ্ঞান গৱেষণা পত্ৰিকা জাৰ্নেল অৱ ভইচত শেহতীয়াকৈ এই সম্পৰ্কে এক গভীৰ অধ্যয়ন প্ৰকাশ পাইছে। গুৱাহাটীৰ সন্দিকৈ ছোৱালী মহাবিদ্যালয়ৰ পদাৰ্থ বিজ্ঞান বিভাগত আধুনিক যন্ত্ৰৰ সহায়ত নিজাববীয়াকৈ এই বৈজ্ঞানিক বিশ্লেষণ কৰা হৈছিল।
গৱেষণাত পোহৰলৈ আহিছে যে জুবিনৰ এই যাদুকৰী সুৰ কেৱল আৱেগিক অনুভৱেই নহয়, ইয়াৰ আঁৰত এক নিখুঁত শব্দবিজ্ঞান আৰু স্বৰ-সজ্জা লুকাই আছে। এই অধ্যয়নে অসমৰ আধুনিক সুৰীয়া ঐতিহ্যক বিশ্বৰ বিজ্ঞানৰ সৰ্বোচ্চ মঞ্চলৈ গৌৰৱেৰে লৈ গৈছে।
গৱেষণাগাৰত কৰা পৰীক্ষাত জুবিনৰ হামিঙৰ কেইবাটাও বিশেষ বৈজ্ঞানিক কাৰণ ধৰা পৰিছে। তেওঁৰ কণ্ঠত নিম্ন কম্পনাংকৰ ব্যৱহাৰ হোৱাৰ বাবেই এই সুৰ ইমান গভীৰ আৰু প্ৰশান্তিদায়ক হয়। লগতে, তেওঁৰ কণ্ঠৰ সুক্ষ্ম কম্পনে এই সুৰটোক এক অনন্য সজীৱতা আৰু আৱেগিক গভীৰতা প্ৰদান কৰে। বৈজ্ঞানিকভাৱে কবলৈ গ’লে, তেওঁৰ হামিং একে সময়তে আৱেগিক আৰু ধ্বনিগতভাৱে অতি সুস্থিৰ। আৱেগ আৰু বিজ্ঞানৰ এনে নিখুঁত ভাৰসাম্য সঁচাকৈয়ে এক বিৰল উপহাৰ।
এই বৈজ্ঞানিক গৱেষণা অসমৰ এই চিৰসেউজ শিল্পীগৰাকীৰ আজীৱন সাধনাৰ প্ৰতি এক সশ্ৰদ্ধ বিজ্ঞানভিত্তিক প্ৰণতি। ইয়াৰ লগতে গৱেষকসকলে অসমৰ ভাষাবিদ আৰু বুদ্ধিজীৱীসকললৈ এক বৌদ্ধিক প্ৰত্যাহ্বানো আগবঢ়াইছে। জুবিন গাৰ্গৰ এই অনন্য আকৰ্ষণীয় শৈলীক বুজাবলৈ সাধাৰণ গুণগুণনি বা গুঞ্জন শব্দটো একেবাৰেই যথেষ্ট নহয়। সেয়েহে, ইংৰাজীৰ হামিং কিং অৱ দা ৱৰ্ল্ড উপাধিটোৰ বাবে এটা নিখুঁত, বিজ্ঞানভিত্তিক আৰু কালজয়ী অসমীয়া প্ৰতিশব্দ সৃষ্টি কৰিবলৈ তেওঁলোকে সকলো বিজ্ঞ মহলক আহ্বান জনাইছে।
