মধ্যপ্ৰাচ্য জ্বলিছে। ইফালে পাক-আফগান যুদ্ধই চতুৰ্থ দিনত ভৰি দিছে। দেওবাৰে পুৱাৰ ভাগত বিস্ফোৰণত কঁপি উঠে আফগানিস্তানৰ ৰাজধানী কাবুল। তালিবান চৰকাৰৰ অভিযোগ যে পাকিস্তানী সেনাই পুনৰ মধ্য কাবুলৰ কেইবাটাও স্থানত গোলাবৰ্ষণ কৰিছে। তালিবানেও ইয়াৰ প্ৰত্যুত্তৰ দিছে। অব্যাহত আছে গুলীয়াগুলি। ইপিনে, তালিবানেও পাকিস্তানৰ এখন যুদ্ধ বিমান গুলীয়াই নমোৱা বুলি দাবী কৰিছে।
বাতৰি মতে, দেওবাৰে পুৱতি নিশা মধ্য কাবুলৰ কেইবাটাও স্থানত বিস্ফোৰণৰ শব্দ শুনা গৈছিল। কেৱল সেয়াই নহয়, কেইবাটাও পৰ্যায়ত গুলীচালনা চলি থকাৰ অভিযোগ উত্থাপন হৈছে। এই ঘটনাত এতিয়ালৈকে কোনো লোক হতাহতিৰ খবৰ পোৱা হোৱা নাই।
তালিবান চৰকাৰৰ মুখপাত্ৰ জাবিহুল্লাহ মুজাহিদে কয় যে, “পাকিস্তানে ৰাজধানী কাবুলত পুনৰ বিমান আক্ৰমণ চলাবলৈ চেষ্টা কৰিছে। আমাৰ বিমান প্ৰতিৰক্ষা ব্যৱস্থা সক্ৰিয়। কাবুলৰ বাসিন্দাসকলে চিন্তা কৰাৰ কোনো কাৰণ নাই।”
যোৱা দেওবাৰে পাকিস্তানৰ আক্ৰমণৰ প্ৰতিশোধ হিচাপে আফগান সেনাই পাকিস্তানৰ সীমা অতিক্ৰম কৰি বৃহস্পতিবাৰে নিশা আক্ৰমণ কৰে। পাকিস্তানৰ কমেও ১২টা পোষ্ট আফগানৰ নিয়ন্ত্ৰণলৈ অহা বুলিও দাবী কৰিছে তালিবান প্ৰশাসনে। ৫৫ জন পাকিস্তানী সেনা জোৱান নিহত হৈছে।
সেই আক্ৰমণৰ প্ৰতিশোধ হিচাপে শুকুৰবাৰে পাকিস্তানে আফগানিস্তানৰ একাধিক অঞ্চলত আক্ৰমণ চলায়। দেওবাৰেও দুয়োখন দেশৰ মাজত সংঘৰ্ষ অব্যাহত থাকে। প্ৰসংগক্ৰমে শনিবাৰে তালিবানে জালালাবাদত পাকিস্তানী যুদ্ধ বিমান গুলীয়াই পেলোৱা বুলি দাবী কৰিছিল। আনকি তালিবানৰ যোদ্ধাসকলে পাকিস্তান বায়ুসেনাৰ উইং কমাণ্ডাৰক বন্দী কৰাৰ দাবীও কৰে।
