ভাৰতত অস্থায়ীভাৱে আশ্ৰয় লৈ থকা বাংলাদেশৰ প্ৰাক্তন প্ৰধানমন্ত্ৰী শ্বেখ হাছিনাক প্ৰত্যাৰ্পণৰ বাবে ঢাকাৰ পৰা লাভ কৰা আনুষ্ঠানিক অনুৰোধ পত্ৰ দিল্লীয়ে স্বীকাৰ কৰিছে। মোদী চৰকাৰে বুধবাৰে এই কথা নিশ্চিত কৰি কয় যে এই অনুৰোধ বৰ্তমান ‘ন্যায়িক আৰু আভ্যন্তৰীণ আইনী প্ৰক্ৰিয়াৰ অংশ হিচাপে পৰীক্ষা’ কৰি থকা হৈছে।
যোৱা সপ্তাহত মহম্মদ ইউনুছৰ নেতৃত্বত থকা বাংলাদেশৰ অন্তৱৰ্তীকালীন চৰকাৰে ভাৰতলৈ পুনৰ কূটনৈতিক বাৰ্তা প্ৰেৰণ কৰাৰ পিছতে এই সন্দৰ্ভত ভাৰতে প্ৰথমবাৰৰ বাবে আনুষ্ঠানিকভাৱে মন্তব্য কৰিছে।
বুধবাৰে ভাৰতীয় বৈদেশিক পৰিক্ৰমা মন্ত্ৰালয়ৰ সাপ্তাহিক সংবাদমেলত মন্ত্ৰালয়ৰ মুখপাত্ৰ ৰন্ধীৰ জয়ছৱালক হাছিনাৰ প্ৰত্যাৰ্পণৰ বিষয়ে সোধা প্ৰশ্নৰ উত্তৰত, তেওঁ অনুৰোধ লাভ কৰাৰ কথা স্বীকাৰ কৰি কয়: “হয়, আমি অনুৰোধ লাভ কৰিছো। আমি ন্যায়িক আৰু আভ্যন্তৰীণ আইনী প্ৰক্ৰিয়াৰ অংশ হিচাপে ইয়াক পৰীক্ষা কৰি আছো।”
ৰণধীৰ জয়ছৱালে লগতে কয় যে ভাৰতে বাংলাদেশৰ জনসাধাৰণৰ স্বাৰ্থত সংশ্লিষ্ট সকলো পক্ষৰ সৈতে গঠনমূলক সংযোগ স্থাপনৰ বাবে প্ৰতিশ্ৰুতিবদ্ধ। প্ৰসংগক্ৰমে উল্লেখ কৰিব লাগিব যে বিগত বৰ্ষৰ জুলাই-আগষ্ট মাহত ছাত্ৰ-ছাত্ৰীৰ প্ৰতিবাদৰ পিছতে হাছিনাক ক্ষমতাৰ পৰা উৎখাত কৰা হৈছিল আৰু তেতিয়াৰ পৰাই তেওঁ ভাৰতত আশ্ৰয় লৈ আছে।
প্ৰথমবাৰৰ কূটনৈতিক বাৰ্তা প্ৰেৰণৰ সময়ত বাংলাদেশ ন্যায়াধিকৰণে হাছিনাৰ ওপৰত কোনো ৰায় ঘোষণা কৰা নাছিল। কিন্তু শেহতীয়াকৈ, ছাত্ৰ আন্দোলনৰ সময়ত সংঘটিত গণহত্যাৰ অভিযোগত বাংলাদেশৰ আন্তৰ্জাতিক অপৰাধ ন্যায়াধিকৰণে হাছিনাক মৃত্যুদণ্ডৰ নিৰ্দেশ দিয়ে।
ইয়াৰ পিছতে, বাংলাদেশৰ বৈদেশিক মন্ত্ৰালয়ে শুকুৰবাৰে ঢাকাত থকা ভাৰতীয় উচ্চায়ুক্তলৈ বিশেষ কুৰিয়ৰৰ জৰিয়তে এখন চুটি চিঠি প্ৰেৰণ কৰি হাছিনাক প্ৰত্যাৰ্পণৰ বাবে পুনৰ অনুৰোধ জনায়। এই তথ্য দেওবাৰে ৰাজহুৱা কৰা হয়।
বুধবাৰে বিয়লি এই সন্দৰ্ভত ঢাকাৰ পৰা বাংলাদেশৰ বৈদেশিক পৰিক্ৰমা উপদেষ্টা তৌহিদ হোছেইনে প্ৰতিক্ৰিয়া প্ৰকাশ কৰিছে। তেওঁ কয় যে হাছিনাৰ উভতি অহাৰ বাবে দিয়া কূটনৈতিক বাৰ্তাৰ “কোনো উত্তৰ পোৱা নাই। আমি ইমান সোনকালে উত্তৰ আশা কৰা নাই।”
তেওঁ লগতে সোঁৱৰাই দিয়ে যে ন্যায়াধিকৰণৰ ৰায়দানৰ পিছত বৰ্তমানৰ পৰিস্থিতি সলনি হৈছে। সম্প্ৰতি ভাৰতৰ সিদ্ধান্তৰ ওপৰত সমগ্ৰ বিশ্বৰ দৃষ্টি নিবদ্ধ হৈ পৰিছে।
