সাম্প্ৰতিক সময়ত টিকটক আমেৰিকাৰ পৰা আৰম্ভ কৰি ভাৰতলৈকে ছচিয়েল নেটৱৰ্কিং ক্ষেত্ৰত অদ্বিতীয় কোম্পানী ফে’চবুকৰ বাবে মূৰৰ কামোৰণি হৈ উঠিছে।
টিকটকৰ পৰা ফে’চবুকে বৃহৎ প্ৰত্যাহ্বানৰ সন্মুখীন হৈছে। খবৰ অনুসৰি, টিকটকৰ “বিজনেছ মডেল’বুজিবলৈ মাৰ্ক জুকাৰবাৰ্গে ইয়াত এটা গোপন একাউন্ট খুলিছে।
প্ৰকাশিত খবৰ মতে, টিকটক মডেলক ভাঙিবলৈকে সম্ভৱত: ফে’চবুকৰ সহ প্ৰতিষ্ঠাপক তথা মুখ্য কাৰ্যবাহী মাৰ্ক জুকাৰবাৰ্গে চীনৰ চুটি ভিডিঅ’ শ্বেয়াৰিং এপ টিকটকত এটা গোপন একাউন্ট খুলিছে।
একাউন্টটো এতিয়ালৈকে ভেৰিফাই হোৱা নাই যদিও “এট দ্য ৰেট ফিংকড’ ধৰণৰ পৰিচয় বহন কৰা এই একাউন্টটোও জুকাৰবাৰ্গৰ বাকী ছচিয়েল মিডিয়াৰ একাউন্ট টুইটাৰৰ দৰেই বুলি কোৱা হৈছে।
টিকটকত “এট দ্য ৰেট ফিংকড’ পৰিচয়ত এটাও প’ষ্টত কৰাহোৱা নাই। কিন্তু এই একাউন্টৰ ৪,০৫৫গৰাকী ফল’ৱাৰ্ছ আছে।
একাউন্টটোৰ অনুসৰণকাৰীৰ মাজত এৰিয়ানা গ্ৰাণ্ডে আৰু চেলেনা গোমেজৰ দৰে ব্যক্তিত্বও আছে। অনুসৰণকাৰীৰ মাজত লোৰেন গ্ৰে আৰু জেকব ছাট্ৰেৰিয়াছৰ দৰে টিকটক ছুপাৰষ্টাৰৰ সংখ্যাই সৰ্বাধিক।
বাজ ফিড নিউজত কোৱা হৈছে যে ২০১৬ত জুকাৰবাৰ্গে কেলিফৰ্ণিয়াত ফে’চবুকৰ মেনল’ পাৰ্ক মুখ্য কাৰ্যালয়ত মিউজিক্লিৰ সহ প্ৰতিষ্ঠাপক এলেক্স ঝুক আমন্ত্ৰণ কৰে যদিও দুয়োৰে মাজত আলোচনা সফল নহ’ল।
২০১৭চনত মিউজিক্লিক চীনৰ বৃহৎ কোম্পানী বাইট ড্যান্সে ৮০ কোটি ডলাৰৰ বিনিময়ত কিনি লয় আৰু নিজৰ ডোয়িন ভিডিঅ’ৰ এপ’ৰ সৈতে মিলি ইয়াক টিকটক নাম দিয়ে।
সম্প্ৰতি বিশ্বত টিকটকৰ ৮০ কোটি ব্যৱহাৰকাৰী আছে যাৰ ভিতৰত কেবল ভাৰতবৰ্ষতে আছে ২০ কোটি ব্যৱহাৰকাৰী।
টিকটকৰ বৰ্দ্ধিত জনপ্ৰিয়তালৈ লক্ষ্য কৰি ফে’চবুকৰ পৰিয়ালৰে ইনষ্টাগ্ৰামে এটা নতুন ভিডিঅ’-মিউজিক ৰিমিক্স ফিচাৰ “ৰিল্স’ মুকলি কৰে। ৰিল্সৰ জৰিয়তে ব্যৱহাৰকাৰীয়ে ১৫ছেকেণ্ডৰ মিউজিক ক্লিপ বনাই ইয়াৰ কাহিনীৰ মাধ্যমেৰ শ্বেয়াৰ কৰিব পাৰে।
