পাকিস্তানৰ বিৰুদ্ধে এইবাৰ আৰম্ভ হৈছে আন এখন যুদ্ধ। ছচিয়েল মিডিয়াৰ বৃহৎ মঞ্চ ফেইচবুক, টুইটাৰ আৰু গুগলকে ধৰি কেইবাটাও কোম্পানীয়ে পাকিস্তানৰ বিৰুদ্ধে টঙালি বান্ধিছে।
বৰ্তমান পৰিস্থিতিয়ে এনেকুৱা পৰ্যায় পাইছে যে তেওঁলোকে দেশখনত ইয়াৰ সেৱা বন্ধ কৰাৰো ভাবুকি দিছে।
দৰাচলতে, ফেইচবুক, টুইটাৰ, গুগলৰ দৰে কোম্পানীৰ ওপৰত অনা ছেন্সৰশ্বিপ আইন পাকিস্তানৰ বাবে বিপদৰ কাৰণ হ’ব পাৰে।
ইয়াৰ মাজতে পাকিস্তানৰ ডিজিটেল ছেন্সৰশ্বিপ আইনক লৈ উক্ত কোম্পানীসমূহে সাৱধান বাণী শুনাইছে।
পাকিস্তানত ছচিয়েল মিডিয়াৰ বাবে প্ৰৱৰ্তন কৰা আইনৰ বাবে এই প্লেটফৰ্মসমূহে নিজৰ সেৱা চলাই ৰখাটো কঠিন হৈ পৰিছে।
এই সন্দৰ্ভত এছিয়া ইন্টাৰনেট কলিশ্যন (এ আই চি)ৰ ফালৰ পৰা ইমৰাম খান চৰকাৰক এখন পত্ৰ লিখি আইনখনৰ পৰিৱৰ্তন অনাৰ বাবে আহ্বান জনাইছে।
সংবাদ প্ৰতিষ্ঠানৰ বাতৰি অনুসৰি, কোম্পানীসমূহে চৰকাৰখনে ভাৱ প্ৰকাশৰ ব্যক্তিগত স্বাধীনতা আৰু গোপনীয়তাৰ সৈতে জড়িত অভিযোগ সন্দৰ্ভত সঠিক পদক্ষেপ গ্ৰহণ কৰা নাই। তদুপৰি, তাত প্ৰথমৰে পৰা অনলাইন কন্টেন্টৰ বাবে কঠোৰ আইন আছেই।
পত্ৰখনত উল্লেখ কৰা হৈছে যে এই আইন অস্পষ্ট আৰু একপক্ষীয়। এই নিয়মসমূহে পাকিস্তানৰ ৭কোটি ইন্টাৰনেট ব্যৱহাৰকাৰীৰ গোপনীয়তা আৰু ভাৱ প্ৰকাশৰ স্বাধীনতা খৰ্ব কৰিছে।
লগতে কোৱা হৈছে বিষয়টো সন্দৰ্ভত পাকিস্তানে যদি পুনৰ বিবেচনা নকৰে তেতিয়াহ’লে তেওঁলোকে ব্যৱসায় সামৰাৰ বাবে চিন্তা কৰিব লাগিব।
তেওঁলোকে অভিযোগ কৰে যে পাকিস্তানে ডিজিটেল ছেন্সৰশ্বিপ আইন প্ৰণয়নৰ সময়ত কোনো বিশেষজ্ঞৰ ৰায় লোৱা নাই।
পাকিস্তানত যি ডিজিটেল ছেন্সৰশ্বিপ আইন প্ৰণয়ন কৰা হৈছে তাত আপত্তিজনক বিষয়বস্তুক লৈ কোনো স্পষ্ট শাস্তি নিৰ্দ্ধাৰণ কৰা হোৱা নাই। কিছুমানক আপত্তিজনক বুলি ধৰা হ’ব আৰু তাৰ বিৰুদ্ধে আবেদনো কৰিব পৰা যাব।
আবেদন কৰাৰ ২৪ ঘন্টাৰ ভিতৰত কোম্পানীয়ে কন্টেন্ট আঁতৰাব লাগিব আৰু এই ইয়াৰ সময়সীমা হ’ব মাত্ৰ ৬ ঘন্টা। তদুপৰি, আপত্তিজনক কন্টেন্টৰ বিষয়ে যিয়েই অভিযোগ কৰিব তেওঁৰ নাম গোপনে ৰখা হ’ব।
নতুন আইন অনুসৰি কোম্পানীসমূহে পাকিস্তানত কাৰ্যালয় খুলিব লাগিব আৰু স্থানীয়ভাৱে চাৰ্ভাৰ বনাব লাগিব। লগতে আইন ভংগ কৰাৰ বাবে ৫০ কোটি টকাৰ জৰিমনা ভৰাৰো ব্যৱস্থা ৰখা হৈছে।
পাকিস্তানৰ এনে আইনৰ বাবে দেশখনৰ বিৰুদ্ধে কোম্পানীসমূহে একগোট হৈছে। কোম্পানীসমূহে পত্ৰ লিখি তেওঁলোকৰ স্থিতি স্পষ্ট কৰিছে। এতিয়া পাকিস্তানে এই সন্দৰ্ভত কি প্ৰতিক্ৰিয়া প্ৰকাশ কৰে সেয়া লক্ষণীয় হৈ পৰিছে।