মন্ত্ৰী হিমন্তৰ প্ৰতিটো পোষ্ট অশালীন গালি, মন্তব্যৰে ভৰাইছে ফেইচবুক য়ুজাৰে

নাগৰিকত্ব বিধেয়কৰ সপক্ষে অদ্ভুত যুক্তি দিয়া আৰু অসমীয়া মানুহৰ অনুভূতিক উপলুঙা কৰি অহা মন্ত্ৰী হিমন্তক ফেইচবুকত অতি অশালীন আক্ৰমণেৰে ক্ষোভৰ বহিঃপ্ৰকাশ ঘটাইছে ফেইচবুক য়ুজাৰে।

মন্ত্ৰীজনে তেওঁৰ টাইমলাইনত দিয়া যিকোনো পোষ্টতে য়ুজাৰসকলে অতি বেয়া শব্দ প্ৰয়োগ কৰি মন্তব্য কৰা দেখা গৈছে।

কেইঘণ্টামানৰ পূৰ্বে মন্ত্ৰীজনে নিজৰ টাইমলাইনত মুখ্য মন্ত্ৰীৰ সৈতে একেলগে পশ্চিম বৰাগাৱঁত অসম আন্দোলনৰ চহিদসকলৰ স্মৃতি ৰক্ষাৰ্থে প্ৰস্তাৱিত “চহিদ স্মাৰক ক্ষেত্ৰ আৰু চহিদ উদ্যান”ৰ আধাৰশিলা স্থাপন কাৰ্য্যসূচীৰ ফটো আপল’ড দিছিল।

কিন্তু ছ’চিয়েল মিডিয়া য়ুজাৰসকলে তেওঁক অতি কটু সমালোচনা কৰি কয়, যে তেওঁ অসম আন্দোলনৰ চহিদৰ কথা কোৱাৰ অধিকাৰ হেৰুৱাইছে।

কেইবা হাজাৰ য়ুজাৰে তেওঁক শালীনতাৰ সীমা চেৰাই গৈ অশ্লীল শব্দ প্ৰয়োগ কৰি গালি পাৰে।

ইয়াৰে বহুতে ক’লা পতাকাৰ পৰা বিভিন্ন বিদ্ৰূপ আৰু অপমানসূচক ছবি দিয়ে কমেণ্ট হিচাপে।

তাৰ পিছত মন্ত্ৰী হিমন্তই দুটা পোষ্ট দিয়ে আৰু দুয়োটাতে জঁপিয়াই পৰে ছ’চিয়েল মিডিয়া য়ুজাৰসকলে। “কুকুৰ”, “বদন” আদি শব্দৰ পৰা আৰম্ভ কৰি উল্লেখৰ অযোগ্য ধৰণৰ শব্দ প্ৰয়োগ কৰে ক্ষুব্ধ য়ুজাৰসকলে।

“আপুনি বহু পাপৰ ফলত জন্ম হৈছে”, এজনৰ মন্তব্য।

আন এজন লোকে তেওঁৰ কমেণ্টত কৈছে, “you are a Moron person”.

আন এজনৰ কটাক্ষ, “আপুনি নাগপুৰ গুচি যাওক বাংলাদেশীখিনিক লৈ”।

উল্লেখযোগ্য যে মুখ্য মন্ত্ৰী সোণোৱালকো ফেইচবুক য়ুজাৰসকলে এইকেইদিন অতি অশালীন শব্দেৰে আক্ৰমণ কৰি আছে।