ভাৰতৰ প্ৰধান মন্ত্ৰী নৰেন্দ্ৰ মোদীক আধুনিক বিশ্বৰ আটাইতকৈ নিষ্ঠুৰতম আৰু কুখ্যাত শাসক এডল্ফ হিটলাৰৰ অৱতাৰ বুলি জাৰ্মান নেশ্যনেল টি ভিয়ে তুলনা কৰাৰ এটা খবৰে বেচ চৰ্চা লাভ কৰিছে।
টি ভিৰ বাতৰিটোৰ বুলি দাবী কৰা এটা স্ক্ৰীন শ্বট, য’ত (পিতৃ) হিটলাৰে (পুত্ৰ) মোদীক দুহাতেৰে মূৰৰ ওপৰত তুলি ধৰা এটা গ্ৰাফিক্স দেখা যায়, যোৱা কেইদিন মানত ছ’চিয়েল মিডিয়াত ব্যাপক হাৰত শ্বেয়াৰ হৈ আছে। এই ছবিখনৰ সৈতে দিয়া এটা ফেইচবুক পোষ্ট (“The devil is reborn in India ..” শিৰোনামেৰে ২৪ ডিচেম্বৰত দিয়া) বহু লোকে শ্বেয়াৰ কৰিছে।
কিন্তু কিমান দূৰ সঁচা এই বাতৰি? জাৰ্মানিৰ মিডিয়াই সঁচাকৈয়ে ভাৰতৰ প্ৰধান মন্ত্ৰীজনক দেশখনক ১৯৩৪—১৯৪৫ কালছোৱাত কুখ্যাত শাসনেৰে বদনামী কৰি থৈ যোৱা হিটলাৰৰ সৈতে ৰিজাই বাতৰি পৰিৱেশন কৰিছে নে?
বিভিন্ন উৎসৰ তথ্য জুকিয়াই চাই জানিব পৰা গৈছে যে বাতৰিটোৰ সত্যতা প্ৰমাণ কৰিব পৰাকৈ কোনো তথ্য নাই।
জাৰ্মানিৰ মিডিয়াই ভাৰতত সাম্প্ৰদায়িক আৰু আতংকময় পৰিৱেশ সৃষ্টি হোৱাৰ বাতৰি প্ৰচাৰ কৰিছে যদিও মোদীক হিটলাৰৰ সৈতে তুলনা কৰা কোনো শিৰোনাম বা উক্ত বিতৰ্কিত ছবিখন প্ৰচাৰ কৰাৰ কোনো তথ্য নাই।
অৱশ্যে শেহতীয়াকৈ উত্তৰ প্ৰদেশৰ ঘটনাকে ধৰি ভাৰতত সম্প্ৰদায় বিশেষক টাৰ্গেট কৰি শেহতীয়া চৰকাৰী কামকাজ চলিছে বুলি বাতৰি কৰা হৈছে। কিন্তু হিটলাৰ আৰু মোদীৰ তুলনাৰ প্ৰমাণ নাই।
শেহতীয়াকৈ মোদী চৰকাৰে দেশত নাগৰিকত্ব (সংশোধন) আইন গ্ৰহণ কৰাৰ পেক্ষাপটত মোদীক আন্তঃৰাষ্ট্ৰীয় মহলৰ বিভিন্ন স্তৰত এজন সাম্প্ৰদায়িক নেতা হিচাপে চিহ্নিত কৰাৰ প্ৰয়াস দেখা গৈছে, যাৰ বাবে ভাৰতৰ ভাবমূৰ্তিৰ অৱনতি ঘটিছে।
হিটলাৰৰ সৈতে মোদীক তুলনাৰ এই প্ৰচাৰ এনে প্ৰয়াসৰ দ্বাৰা অনুপ্ৰাণিত হ’ব পাৰে।
উল্লেখ কৰিব পাৰি যে হিটলাৰে তেওঁৰ কুখ্যাত শাসনকালত দেশখনৰ বিশেষ সম্প্ৰদায় কিছুমানক (বিশেষভাৱে ইহুদি) উৎপীড়নৰ লক্ষ্য কৰি লৈছিল। তেওঁ আৰু তেওঁৰ নাজি বাহিনীয়ে “বিশুদ্ধ জাৰ্মান”ৰ দৰে ধাৰণাৰ দ্বাৰা পৰিচালিত হৈছিল আৰু তাৰ বাহিৰত থকাসকলক হত্যা কৰি নিঃশেষ কৰাৰ আঁচনি লৈছিল।
মোদী শাসনলৈ অহাৰ পিছতে হিটলাৰৰ “বিশুদ্ধ জাৰ্মান”ৰ ধাৰণাৰ দৰে ভাৰতত মোদী বাহিনীয়ে বা মোদীৰ অনুৰাগীয়ে দেশভক্ত আৰু দেশদ্ৰোহী চিনাক্তকৰণৰ জৰিয়তে “বিশুদ্ধ ভাৰতীয়” বুলি এটা ধাৰণা আনিবলৈ চেষ্টা কৰা দেখা যায়।
জাৰ্মান মিডিয়াই কৰা বুলি প্ৰচাৰিত ছবি আৰু বাতৰিৰ সত্যতা নাথাকিলেও মোদীক দেশৰে একাংশই হিটলাৰৰ সৈতে তুলনা কৰি অহাটো মন কৰিব লগীয়া। বিজেপিৰে মিত্ৰতাৰ পূৰ্বে বিহাৰৰ মুখ্য মন্ত্ৰী নীতিশ কুমাৰেও মোদীক হিটলাৰৰ সৈতে তুলনা কৰিছিল।
