হত্যা নে আত্মহত্যা!

যোৱা ১৩ জানুৱাৰিত “আত্মহত্যা” কৰা নলবাৰীৰ মুকালমুৱা আৰক্ষী থানাৰ উপ-পৰিদৰ্শক কিশোৰ দাসক হত্যা কৰা হৈছে, দাবী পৰিয়ালৰ।

পৰিয়ালৰ সন্দেহৰ তালিকাত যোগ হৈ আছে দ্ৰাগছ মাফিয়া আৰু থানাখনৰ ভাৰপ্ৰাপ্ত বিষয়া জয়ন্ত বৰ্মনৰ নামো। পৰিয়ালৰ অভিযোগ, মদ নোখোৱা কিশোৰক ৰাতিলৈকে থানাত মদ খাবলৈ বাধ্য কৰোৱা হৈছিল।

“মোৰ ল’ৰাটোক ডিজিপি কাৰ্য্যালয়ৰ পৰা ড্ৰাগছ মাফিয়া ধৰিবৰ বাবে পঠাইছিল, ৰাতি ১২ বজালৈকে মদ খাবৰ বাবে পঠিওৱা নাছিল। মোৰ ল’ৰাই মোক ফোনত প্ৰায়ে কৈছিল যে ৰাতি ১২ টালৈকে তাক আবদ্ধ কৰি ৰাখে। সি মদ নাখাই যদিও জোৰ জবৰদস্তি ৰাতিলৈকে তাক মদ খুৱায়,” পুত্ৰহাৰা পিতৃ প্ৰফুল্ল কুমাৰ দাসৰ নৰ্থ ইষ্ট নাও-ত মন্তব্য। পৰিয়ালৰ দাবী যোৱা ৫ নৱেম্বৰত থানাখনত যোগদানৰ পিছদিনাই দুজন দ্ৰাগছ মাফিয়াক গ্ৰেপ্তাৰ কৰিছিল কিশোৰে।

“আত্মহত্যা”ৰ মাত্ৰ ১৩ মিনিট পূৰ্বে কিশোৰে ঘৰলৈ ফোন কৰি স্বাভাৱিকভাৱে কথা পতা বুলি দাবী কৰি পৰিয়ালে দাখিল কৰা এজাহাৰত মুকালমুৱা থানাৰ বিষয়া বৰ্মনৰ বিৰুদ্ধেও অভিযোগ তোলা হৈছে।

এই সন্দৰ্ভত পৰিয়ালৰ অভিযোগ অনুসৰি ভাৰতীয় দণ্ড বিধিৰ ৩০২ ধাৰাত এক গোচৰ (৩৮/১৯ নং) ৰুজু হৈছে। কিন্তু পৰিয়ালৰ মতে তদন্ত আৰম্ভ কৰা নাই আৰক্ষীয়ে।

অভিযুক্ত আৰক্ষী বিষয়া বৰ্মন এতিয়াও থানাখনত কৰ্মৰত অৱস্থাত থকা আৰু তেওঁতকৈ “তলৰ বিষয়া”ই ঘটনাৰ তদন্ত কৰাক লৈয়ো ক্ষোভ উজাৰিছে পৰিয়ালটোৱে।

“অভিযুক্ত আৰক্ষী বিষয়াজন যদি উক্ত আৰক্ষী থানাতে কৰ্মৰত হৈ থাকে, তেন্তে তেওঁৰ তলৰ এজন বিষয়াই তেওঁৰ বিৰুদ্ধে কি আৰু কেনেকৈ তথ্য-প্ৰমাণ গোটাব? তেওঁলোকে তথ্য পাতিসমূহ নাইকিয়া কৰাৰ ষড়যন্ত্ৰ কৰি আছে,” মৃত কিশোৰৰ ককায়েক পল্লৱ দাসৰ মন্তব্য।

আনহাতে ঘটনাটোৰ তদন্তকাৰী বিষয়া নলবাৰীৰ অতিৰিক্ত আৰক্ষী অধীক্ষক সুৰেন মুছাহাৰীয়ে জনোৱা মতে ঘটনাটোৰ প্ৰাথমিক তদন্ত কৰিবলৈ উপ-পৰিদৰ্শক ললিত বুঢ়াগোহাঁইক দায়িত্ব দিয়া হৈছে।

“প্ৰাথমিক পৰ্য্যায়ৰ তদন্তৰ ক্ষেত্ৰত ধৰি লওক মৰণোত্তৰ পৰীক্ষা, ঘটনাটোৰ তথ্য-পাতি সংগ্ৰহ, তদন্তত কি কি পালে-নাপালে তাৰ ‘চিজাৰ লিষ্ট’ প্ৰস্তুত কৰিব লাগিব। সেইবিলাক তেওঁ চি আই ডিৰ ওচৰত পঠাব। তাৰ পাছতহে মোলৈ কে’ছটো হেণ্ড অ’ভাৰ হ’ব। মোৰ ফালৰ পৰা তদন্ত আৰম্ভ হোৱা নাই এতিয়ালৈকে। যেতিয়া মই অৰ্ডাৰ পাম, তেতিয়া তদন্ত আৰম্ভ হৈ যাব,” মুছাহাৰীয়ে জনায়।

অভিযুক্ত আৰক্ষী বিষয়াজনক এতিয়ালৈকে সোধ-পোচ কৰা নাই যদিও “কেইদিনমানৰ ভিতৰতে তেওঁক সোধ-পোচ কৰা হ’ব” বুলি নৰ্থ ইষ্ট নাও-ক জনাই মুছাহাৰীয়ে।