কেন্দ্ৰীয় কেবিনেটে তিনিখন বিতৰ্কিত কৃষি আইন বাতিল কৰাৰ ক্ষেত্ৰত আজি অনুমোদন জনোৱাৰ সম্ভাৱনা আছে। কেন্দ্ৰীয় কেবিনেট আজি বৈঠকত মিলিত হ’ব আৰু ‘কৃষি আইন বাতিল বিধেয়ক, ২০২১’ গ্ৰহণ কৰাৰ সম্ভাৱনা আছে।
উল্লেখ্য যে যোৱা শুকুৰবাৰে টেলিভিছনত দিয়া ভাষণত প্ৰধানমন্ত্ৰী মোদীয়ে কৃষি আইন বাতিল কৰা হ’ব বুলি ঘোষণা কৰিছিল। তেওঁ ব্যক্তিগতভাৱে দেশৰ জনসাধাৰণৰ ওচৰত ক্ষমা বিচাৰিছিল আৰু স্বীকাৰ কৰিছিল যে কৃষকসকলক সৈমান কৰাৰ প্ৰচেষ্টাত তেওঁলোক বিফল হৈছে।
মঙ্গলবাৰে কেন্দ্ৰীয় মন্ত্ৰী প্ৰহ্লাদ যোশীয়ে জনায় যে কেন্দ্ৰীয় চৰকাৰে এতিয়া ২৯ নৱেম্বৰৰ পৰা আৰম্ভ হোৱা সংসদৰ শীতকালীন অধিৱেশনৰ কাৰ্যসূচীত কৃষি আইন বাতিল বিধেয়ক, ২০২১ তালিকাভুক্ত কৰিছে। কৃষি মন্ত্ৰালয়ে আগন্তুক সংসদ অধিৱেশনত তিনিখন আইনৰ বিষয়ে আলোচনা কৰাৰ সঠিক তাৰিখৰ ওপৰত আলোচনা কৰি আছে।
উল্লেখ্য যে যোৱা এবছৰৰো অধিক কাল কৃষি আইন বাতিলৰ দাবীত দেশৰ বিভিন্ন প্ৰান্তৰ কৃষকে প্ৰতিবাদ কৰি আহিছে। ৪০ টা কৃষক সংগঠনেৰে গঠিত সংযুক্ত কিষাণ মৰ্চাই এই আন্দোলনৰ নেতৃত্ব দিছে।
প্ৰতিবাদী কৃষকৰ সৈতে কেন্দ্ৰীয় চৰকাৰৰ কেইবাবাৰো আলোচনা হৈছিল যদিও কৃষি আইন বাতিল কৰিবলৈ অমান্তি হৈছিল কেন্দ্ৰীয় চৰকাৰ। আইন বাতিল নোহোৱা পৰ্যন্ত আন্দোলন অব্যাহত থাকিব বুলি ঘোষণা কৰিছিল প্ৰতিবাদী কৃষক নেতাই।
অৱশেষত কৃষকৰ আপোচহীন প্ৰতিবাদৰ ওচৰত হাৰ মানি প্ৰধানমন্ত্ৰী নৰেন্দ্ৰ মোদীয়ে যোৱা শুকুৰবাৰে কৃষি আইন বাতিল কৰা হ’ব বুলি ঘোষণা কৰিছিল। অৱশ্যে প্ৰধান মন্ত্ৰী মোদীৰ ঘোষণাত আস্বস্ত হোৱা নাই প্ৰতিবাদী কৃষক। কৃষক নেতাসকলে নিশ্চিত কৰিছে যে সংসদত কৃষি আইন বাতিল নোহোৱা পৰ্যন্ত আন্দোলন অব্যাহত থাকিব।
