কোৱা হয়, বাণিজ্যে বসতে লক্ষ্মী। এই কথা হাতে-কামে প্ৰমাণ কৰি দেখুৱালে মহাৰাষ্ট্ৰৰ সোলাপুৰৰ এগৰাকী কৃষকে। কৃষকগৰাকীৰ নাম প্ৰকাশ ইমডে। এগৰাকী সাধাৰণ কৃষকৰ পৰা এতিয়া কোটি টকীয়া বাংলোৰ গৰাকী প্ৰকাশৰ সফলতাৰ কাহিনী সম্প্ৰতি সৰ্বত্ৰ চৰ্চিত।
একাগ্ৰতা আৰু অধ্যৱসায়েৰে প্ৰকাশে বছৰজোৰা পৰিশ্ৰমৰ উপাৰ্জিত ধনেৰে সাজি উলিয়াইছে এক কোটিটকীয়া বাংলো। এই বাংলো নিৰ্মাণত খৰচ হোৱা ধন প্ৰকাশে উপাৰ্জন কৰিছিল গৰুৰ গাখীৰ বিক্ৰীৰ দ্বাৰা।
এটা মাত্ৰ গৰুৰে প্ৰকাশে আৰম্ভ কৰিছিল তেওঁৰ এই সফলতাৰ প্ৰাথমিক যাত্ৰা আৰু এতিয়া ১৫০ টাতকৈও অধিক গৰুৰে তেওঁ চলাইছে এখন দুগ্ধ পাম। তেওঁৰ এই প্ৰথম গৰুজনীৰ নাম আছিল ‘লক্ষ্মী’। লক্ষ্মীৰ ছবিত প্ৰাৰ্থনাৰে দিনটোৰ কাম আৰম্ভ কৰে প্ৰকাশে।
বৰ্তমান প্ৰকাশৰ এই ফাৰ্মখনে দৈনিক উৎপাদন কৰে ১০০০ লিটাৰকৈ গাখীৰ। নিজৰ জীৱনৰ সাফল্যৰ আধাৰ এই গৰুবোৰক শ্ৰদ্ধাঞ্জলি জনাই সেয়ে তেওঁ নিৰ্মাণ কৰা বাংলোটোৰ নাম গোধন নিৱাস ৰাখিছে প্ৰকাশে।
পূৰ্বপুৰুষৰ পৰা উত্তৰাধিকাৰী সূত্ৰে লাভ কৰা চাৰি একৰ মাটিৰে উপাৰ্জনৰ যাত্ৰা আৰম্ভ কৰিছিল প্ৰকাশে। কিন্তু তেওঁৰ এই মাটিখিনি শুকান আৰু খেতি কৰাটো অসম্ভৱ বুলি প্ৰমাণিত হ’ল। ইয়াৰ পিছতে প্ৰকাশে এক নতুন পৰিকল্পনা কৰে।
খেতি ত্যাগ কৰি তেওঁ ১৯৯৮ চনত গৰুৰ গাখীৰ আৰু গৰুৰ গোবৰ বিক্ৰী কৰি ব্যৱসায় আৰম্ভ কৰে। আৰম্ভণিতে তেওঁ নিজৰ গাঁৱৰ বাসিন্দাক গাখীৰ বিক্ৰী কৰিছিল। এতিয়া তেওঁৰ এই ব্যৱসায় বহু এলেকাজুৰি বিস্তীৰ্ণ হৈ পৰিছে।
ইমডেৰ সমগ্ৰ পৰিয়ালে প্ৰতিটো খোজতে তেওঁক সহায় কৰে এই ব্যৱসায়ত। লক্ষণীয়ভাৱে প্ৰকাশে কেতিয়াও নিজৰ গৰু পোৱালি এটাও বিক্ৰী কৰা নাই। সেইবাবেই আজিও তেওঁৰ ১৫০ টাতকৈও অধিক গৰু আছে।
২০০৬ চনত তেওঁৰ প্ৰথমজনী গৰু লক্ষ্মীৰ মৃত্যুৰ পিছতো তেওঁ লক্ষ্মীৰ বংশবৃক্ষৰ পৰাই এই ফাৰ্মখন চলাই আছে। গৰুৰ বাবে প্ৰতিদিনে চাৰিৰ পৰা পাঁচ টন ঘাঁহৰ প্ৰয়োজন হয় তেওঁক। সেয়ে তেওঁ পামত যিমান পাৰি সিমান খেতি কৰে আৰু বাকীখিনি বাহিৰৰ পৰা কিনি লয়।
নিজকে এগৰাকী সফল ব্যৱসায়ী ৰূপে ইমডে প্ৰমাণ কৰি দেখুওৱা ইমডেৰ ব্যৱসায়ৰ জৰিয়তে এতিয়া গাঁৱৰ লোকসকলৰ কৰ্মসংস্থাপনৰ সুবিধাও মুকলি হৈছে। আন ৰাজ্যৰ লোকেও প্ৰকাশ ইমডেৰ এই ব্যৱসায় চাবলৈ তথা শিকিবলৈ সাংগোলালৈ আহে।
প্ৰকাশৰ বছৰজোৰা এই পৰিশ্ৰমে এতিয়া তেওঁক কোটি টকীয়া প্ৰাসাদৰ অধিকাৰী কৰি তুলিছে। এই প্ৰাসাদ নিৰ্মাণৰ আঁৰৰ আধাৰ হিচাপে নিজ ফাৰ্মৰ গৰুখিনিৰ প্ৰতি সন্মান জনাই প্ৰাসাদৰ ওপৰত ওখকৈ গৰুৰ মূৰ্তি আৰু গাখীৰৰ মন্থন এটা সাজি দিছে প্ৰকাশে।
