কেন্দ্ৰৰ তিনিখন কৃষি আইনৰ বিৰুদ্ধে গঢ়ি তোলা ঐতিহাসিক কৃষক আন্দোলনৰ সময়ত এম এছ পি সন্দৰ্ভত পেনেল গঠন আৰু কৃষকৰ বিৰুদ্ধে গোচৰ প্ৰত্যাহাৰ কৰাকে ধৰি প্ৰধানমন্ত্ৰী মোদী নেতৃত্বাধীন কেন্দ্ৰীয় চৰকাৰে দিয়া প্ৰতিশ্ৰুতি পূৰণত উপেক্ষা কৰাৰ প্ৰতিবাদত তিনি বছৰ পাছত পুনৰ দিল্লী কঁপাবলৈ সাজু হৈছে সংযুক্ত কিষাণ মৰ্চা।
মোদী চৰকাৰৰ ব্যৰ্থতাৰ প্ৰতিবাদত কৃষকসকলৰ উমৈহতীয়া সংগঠন সংযুক্ত কিষাণ মৰ্চাৰ নেতৃত্বত দিল্লীৰ ৰামলীলা ময়দানত সমবেত হ’বলৈ সাজু হৈছে দেশৰ বিভিন্ন প্ৰান্তৰ কৃষক। সমান্তৰালভাৱে এঘাৰখন ৰাজ্যৰ পৰা ৰামলীলা ময়দানলৈ প্ৰতিবাদী সমদল উলিয়াবলৈ সাজু হৈছে সৰ্বভাৰতীয় কিষাণ মজদুৰ সভাৰ কাৰ্যকৰ্তাসকল।
সংযুক্ত কিষাণ মৰ্চাৰ নেতৃত্বত কাইলৈ পুৱা ১০ বজাৰ পৰা বিয়লি ৩.৩০ বজালৈ ৰামলীলা ময়দানত সহস্ৰাধিক কৃষকে ‘মহাপঞ্চায়ত’ অনুষ্ঠিত কৰিব। এই সন্দৰ্ভত আৰক্ষীয়ে উল্লেখ কৰা মতে, শনিবাৰৰ পৰাই ১১ খন ৰাজ্যৰ কৃষকসকলে দিল্লীত মহাপঞ্চায়তৰ উদ্দেশ্যে উপস্থিত হৈছে।
সংযুক্ত কিষাণ মৰ্চাৰ কেন্দ্ৰীয় সমন্বয় সমিতিৰ সদস্য ড০ আশীষ মিট্টালে কয় যে ভাৰতীয় কৃষি ব্যৱস্থা কৰ্পৰেট আৰু বিদেশী গোষ্ঠীৰ পৰা ৰক্ষা কৰাৰ লগতে জনসাধাৰণৰ ক্ৰয় ক্ষমতা বৃদ্ধি কৰি ভাৰতীয় অৰ্থনীতি উন্নত কৰাৰ দিশত কৃষকৰ আয় নিশ্চিত কৰাৰ গুৰুত্ব বৃদ্ধি পাইছে।
তেওঁ লগতে অভিযোগ কৰে যে মোদী চৰকাৰে মুঠ উৎপাদন ব্যয়ৰ ৫০ শতাংশৰ ওপৰত নূন্যতম সমৰ্থন মূল্য কাৰ্যকৰী কৰাৰ লিখিত আশ্বাস দিছে। চৰকাৰে এখন কমিটী গঠন কৰিছিল যদিও এই কমিটীত কৰ্পৰেটৰ পক্ষত থকা ২৬ গৰাকী সদস্য আছিল আৰু কৃষকৰ এম এছ পিৰ দাবীৰ মুকলি বিৰোধিতা কৰিছিল বুলি তেওঁ অভিযোগ তুলিছে।
তেতিয়াৰ পৰাই মোদী চৰকাৰে ফছফেট সাৰৰ দাম ৫০ শতাংশ বৃদ্ধি কৰাৰ লগতে খাদ্য ৰাজসাহায্য আৰু এম জি এনৰেগাৰ বাজেটতো উদ্বেগজনকভাৱে কৰ্তন কৰিছে বুলি মিট্টালে ক্ষোভ প্ৰকাশ কৰে।
বৃহৎ কৰ্পৰেট হাউচ আৰু বহুজাতিক কোম্পানীৰ বাবে ভাৰতীয় কৃষকৰ স্বাৰ্থ যাতে আপোচ কৰা নহয় তাৰ বাবে সংযুক্ত কিষাণ মৰ্চাই এই নীতিসমূহৰ বিৰোধিতা কৰিব বুলি স্পষ্ট কৰি দিছে ড০ আশীষ মিট্টালে।
