কেন্দ্ৰীয় চৰকাৰৰ কৃষক বিৰোধী নীতিক লৈ পুনৰ আন্দোলনমুখী হোৱাৰ পৰিকল্পনা কৰিছে কৃষক সংস্থা সংযুক্ত কিষাণ মৰ্চাই।
অহা তিনিমাহত সমগ্ৰ দেশতে মহাপঞ্চায়ত অনুষ্ঠিত কৰি ফেব্ৰুৱাৰীত দেশৰ ৰাজধানী দিল্লীলৈ এক প্ৰতিবাদী সমদল উলিয়াবলৈ সাজু হৈছে কৃষক সংস্থাটো।
কালি এক ৰাষ্ট্ৰীয় কাৰ্যনিৰ্বাহক সভা অনুষ্ঠিত কৰি সংযুক্ত কিষাণ মৰ্চাই বিভিন্ন দাবীক লৈ আগন্তুক আন্দোলনৰ কৌশল প্ৰণয়ন কৰে।
এই সভাতে চৰকাৰৰ কৃষক বিৰোধী নীতি আৰু কৃষকৰ দাবীৰ বিষয়ে কৃষকসকলক সজাগ কৰাৰ উদ্দেশ্যে আগন্তুক তিনিমাহত সমগ্ৰ দেশতে ২০খন মহাপঞ্চায়ত অনুষ্ঠিত কৰাৰ সিদ্ধান্ত লোৱা হৈছে।
এই মহাপঞ্চায়তসমূহ আয়োজন কৰাৰ পিছত অহা বৰ্ষৰ ২৬ ফেব্ৰুৱাৰীত দিল্লীলৈ প্ৰতিবাদী সমদলৰ এক কাৰ্যসূচী নিৰ্ধাৰণ কৰা হৈছে বুলি সংস্থাটোৱে এক বিবৃতিত উল্লেখ কৰে।
এম এছ পি আইন, ঋণ ৰেহাই, বিদ্যুৎ খণ্ডৰ ব্যক্তিগতকৰণ বন্ধ কৰা আৰু ৬০ বছৰৰ ওপৰৰ কৃষকক পেঞ্চন দিয়াকে ধৰি মূল আঠটা দাবী কেন্দ্ৰীয় চৰকাৰৰ ওচৰত উত্থাপন কৰিছে কৃষকসকলে।
ইফালে এই বৈঠকত সকলো কৃষক সংগঠনে সৰ্বসন্মতিক্ৰমে দিল্লীৰ প্ৰদূষণৰ বাবে কৃষকক জগৰীয়া কৰাৰ বাবে কেন্দ্ৰ আৰু দিল্লী চৰকাৰক গৰিহণা দি এক প্ৰস্তাৱ গৃহীত কৰে।
বিবৃতিটোত সংযুক্ত কিষাণ মৰ্চাই কয় যে ধান চপোৱাৰ কাম ছেপ্টেম্বৰৰ শেষ সপ্তাহৰ পৰা আৰম্ভ হয় যদিও অক্টোবৰ মাহত প্ৰদূষণ বৃদ্ধি নহয়।
উৎসৱৰ বতৰ আহি পোৱাৰ পিছতহে দিল্লীত এই প্ৰদূষণ বাঢ়ি যায় বুলি দাবী কৰে কৃষক সংস্থাটোৱে।
