বিতৰ্কিত অভিনেত্ৰী নন্দিনী কাশ্যপক আটক কৰিছে দিছপুৰ আৰক্ষীয়ে। ধৃত অভিনেত্ৰী গৰাকীৰ গাড়ীৰ খুন্দাত গুৰুতাৰ ভাবে আঘাত প্ৰাপ্ত পলিটেকনিকৰ ছাত্ৰ জনৰ মৃত্যুৰ পিছতে তেওঁক আটক কৰিছে আৰক্ষীয়ে। অৱশ্যে আৰক্ষীয়ে এই সন্দৰ্ভত কোনো তথ্য ৰাজহুৱা কৰা নাই।
এই ঘটনাটো যোৱা ২৫ জুলাইৰ পুৱা প্ৰায় ৩ বজাত কাহিলীপাৰাৰ সমীপত সংঘটিত হৈছিল। প্ৰত্যক্ষদৰ্শীৰ মতে, নন্দিনী কাশ্যপে চলাই অহা তীব্ৰবেগী গাড়ীয়ে মটৰ চাইকেলত থকা ছমিউল হকক খুন্দা মাৰে। এই পথ দুৰ্ঘটনাত গুৰুতৰভাৱে আহত হয় নলবাৰী পলিটেকনিকৰ ছাত্ৰ ছামিউল হকৰ। ছাত্ৰ জনক ততাতৈয়াকৈ চিকৎসালয়ত ভৰ্তি কৰে। চাৰিদিন ধৰি মৃত্যুৰ সৈতে যুঁজি অৱশেষত হাৰ মানিলে ছামিউলে। এই অকাল মৃত্যুৱে তেওঁৰ পৰিয়াল, বন্ধু-বান্ধৱী আৰু নলবাৰী পলিটেকনিকৰ ছাত্ৰ-ছাত্ৰীৰ মাজত গভীৰ শোকৰ ছাঁ পেলাইছে।
উল্লেখ্য যে অভিনেত্ৰী গৰাকীৰ এনে দায়িত্বহীনতাৰ প্ৰতি ক্ষোভিত হৈ পৰিছে সচেতন ৰাইজ। ধৃত অভিনেত্ৰীগৰাকীৰ বাহন খনৰ ওপৰত তীব্ৰবেগত গাড়ী চলোৱাৰ বাবে ৫ খম কৈ চালান আছে। যি সমূহ অনাদায় হৈ আছে।
ইফালে সদৌ অসম পলিটেকনিক ছাত্ৰ সন্থাই দিছপুৰ আৰক্ষী থানাত নন্দিনী কাশ্যপৰ বিৰুদ্ধে এজাহাৰ দাখিল কৰি অসাৱধানতা আৰু গাফিলতিৰে গাড়ী চলোৱাৰ অভিযোগ উত্থাপন কৰিছে। সংগঠনটোৱে ভাৰতীয় ন্যায় সংহিতা (BNS)ৰ ধাৰা ২৭৯ (ৰেছ ড্ৰাইভিং) আৰু ৩০৪এ (গাফিলতিৰ ফলত মৃত্যু)ৰ অধীনত কঠোৰ আইনী ব্যৱস্থা গ্ৰহণৰ দাবী জনাইছে। সংগঠনৰ কাৰ্যকৰী সভাপতি নয়ন মাধৱ গগৈ আৰু সাধাৰণ সম্পাদক আয়ুষ্মান ধডুমিয়াই স্বাক্ষৰিত এক বিবৃতিত এই ঘটনাক “অপৰাধমূলক গাফিলতি” বুলি অভিহিত কৰি ন্যায়ৰ বাবে কৰ্তৃপক্ষৰ ওচৰত আহ্বান জনাই কয় যে “আমি তদন্তত সম্পূৰ্ণ সহযোগিতা আগবঢ়াবলৈ সাজু আৰু প্ৰয়োজন হ’লে সাক্ষী বা অতিৰিক্ত তথ্য প্ৰদান কৰিব পাৰো।”
প্ৰাপ্ত তথ্য অনুসৰি মঙলবাৰে নিশা উত্তৰ গুৱাহাটীৰ ৰাজধানী থিয়েটাৰৰ আখৰা চৌহদৰ পৰা নন্দিনী কাশ্যপক আৰক্ষীয়ে জিম্মাত লয়। জানিব পৰা মতে, তেওঁক আখৰাৰ পৰা ওলাই অহাৰ সময়ত শৰাইঘাট দলঙৰ সমীপত আটক কৰা হয়। যদিও আনুষ্ঠানিক গ্ৰেপ্তাৰৰ বিষয়ে কৰ্তৃপক্ষই এতিয়াও নিশ্চিত কৰা নাই।
এতিয়া জনসাধাৰণৰ তীব্ৰ প্ৰতিক্ৰিয়াৰ পৰিপ্ৰেক্ষিতত ৰাজধানী থিয়েটাৰে নন্দিনী কাশ্যপৰ সৈতে দুই বছৰৰ চুক্তি বাতিল কৰাৰ সিদ্ধান্ত ঘোষণা কৰিছে বুলি জানিব পৰা গৈছে। থিয়েটাৰৰ এক আনুষ্ঠানিক বিবৃতিত কোৱা হৈছে, “ৰাজধানী থিয়েটাৰৰ ভাবমূৰ্তি আৰু বিশ্বাসযোগ্যতা আমাৰ বাবে সৰ্বোচ্চ গুৰুত্বপূৰ্ণ। বৰ্তমানৰ পৰিস্থিতিৰ প্ৰতি লক্ষ্য ৰাখি আমি নন্দিনী কাশ্যপৰ সৈতে আমাৰ চুক্তি বাতিল কৰাৰ সিদ্ধান্ত লৈছো।”
আশা কৰা হৈছে যে ভুক্তভোগীৰ পৰিয়ালে উচিত ন্যায় লাভ কৰিব। শেহতীয়া খবৰ অনুসৰি আৰক্ষীয়ে জেৰাৰ পিছত নন্দিনী কাশ্যপক গ্ৰেপ্তাৰ কৰা বুলি জানিবলৈ দিছে।
