১৩ বছৰ পাকিস্তানত বাস কৰাৰ সূত্ৰে পাকিস্তানী নাগৰিক সজাই কাৰাৰুদ্ধ কৰা ৬০ বছৰীয়া ফতেমা বিবি নামৰ এগৰাকী বৰ্ষীয়ান মহিলাগৰাকীৰ ভাৰতীয় নাগৰিকত্বৰ আবেদনৰ ফাইল সন্ধানহীন হোৱা ঘটনাক লৈ গৃহ মন্ত্ৰালয়ৰ ওপৰত তীব্ৰ ক্ষোভ প্ৰকাশ কৰিছে কলিকতা উচ্চ ন্যায়ালয়ে। বৰ্ষীয়ান মহিলাগৰাকীয়ে নিজকে ভাৰতীয় নাগৰিক বুলি প্ৰমাণ কৰিলে ক্ষতিপূৰণ কোনে দিব বুলি প্ৰশ্ন তুলি সমগ্ৰ ঘটনা সন্দৰ্ভত কেন্দ্ৰীয় গৃহ মন্ত্ৰালয়ৰ পৰা প্ৰতিবেদন তলব কৰিছে ন্যায়ালয়ে।
ন্যায়াধীশ কৃষ্ণ ৰাওৰ বিচাৰপীঠে শুনানিকালত প্ৰতিক্ৰিয়া প্ৰকাশ কৰি কয় যে পাকিস্তানী নাগৰিক বুলি কাৰাৰুদ্ধ কৰা বৰ্ষীয়ান মহিলাগৰাকী ২০০২ আৰু ২০০৫ চনৰ ডকেট নম্বৰ থকা নাগৰিকত্বৰ দুটাকৈ ফাইল বিচাৰি পোৱা নাই গৃহ মন্ত্ৰালয়ে। যদি গোচৰকাৰীয়ে নিজকে ভাৰতীয় নাগৰিক বুলি প্ৰমাণ কৰিব পাৰে, তেন্তে ইয়াৰ ক্ষতিপূৰণ ভাৰত চৰকাৰে দিব নে পাকিস্তান চৰকাৰে দিব বুলি বিচাৰপীঠে প্ৰশ্ন কৰে। সমগ্ৰ বিষয়টোৰ জটিলতা অনুধাৱন কৰি অহা ১৭ আগষ্টৰ ভিতৰত গৃহ মন্ত্ৰালয়ক তথ্যসহ প্ৰতিবেদন দাখিলৰ নিৰ্দেশ দিছে ন্যায়ালয়ে।
প্ৰাপ্ত তথ্য অনুসৰি, ১৯৬৫ চনত পশ্চিমবঙ্গৰ হুগলি জিলাৰ হৰিপালত জন্মগ্ৰহণ কৰা ফতেমা বিবিৰ পিতৃ-মাতৃ দুয়োগৰাকীয়েই ভাৰতীয় নাগৰিক আছিল। তেওঁলোকৰ নামত হুগলিত ভূমি, কৰ আদায়ৰ ৰেকৰ্ড আৰু অন্যান্য চৰকাৰী নথি-পত্ৰ মজুত আছে। মাত্ৰ তিনি বছৰ বয়সত পিতৃৰ সৈতে পাকিস্তানলৈ যোৱা ফতেমাই ১৯৮১ চনত স্থায়ীভাৱে ভাৰতলৈ প্ৰত্যাহাবৰ্তন কৰে। ইয়াৰ পিছত ১৯৮২ চনত মোজাফ্ফৰ মল্লিকৰ সৈতে বিবাহপাশত আৱদ্ধ হোৱা ফতেমাৰ দুই কন্যা নিলুফাৰ মল্লিক আৰু ইয়াছমিন মল্লিক জন্মসূত্ৰে ভাৰতৰ নাগৰিক।
২০০৩ চনত ফতেমাই কেন্দ্ৰীয় গৃহ মন্ত্ৰালয়ত ভাৰতীয় নাগৰিকত্ব বিচাৰি আবেদন জনাইছিল আৰু ইয়াৰ সৈতে পৰিচয় পত্ৰ, বিবাহৰ নথি, পৰিয়ালৰ কাগজপত্র জমা দিছিল। ২০০৮ চনত পশ্চিমবঙ্গ চৰকাৰে ফতেমাৰ ভাৰতত থকাৰ সময়সীমা বৃদ্ধিৰ বাবে কেন্দ্ৰীয় চৰকাৰক পৰামৰ্শও দিছিল। কিন্তু গৃহ মন্ত্ৰালয়ত এই আবেদন ওলমি ৰোৱাৰ সময়তে ২০২৫ চনত পহেলগামৰ সন্ত্ৰাসবাদী আক্ৰমণৰ পাছত চলোৱা অভিযানত ফতেমাক ‘সন্দেহজনক’ পাকিস্তানী নাগৰিক হিচাপে চিনাক্ত কৰি যোৱা বছৰৰ ২ মে’ত গ্ৰেপ্তাৰ কৰা হয়। বৈদেশিক আইনৰ ১৪ ধাৰাত গোচৰ ৰুজু কৰি কাৰাৰুদ্ধ কৰা প্ৰৌঢ়গৰাকীয়ে যোৱা মাহত উচ্চ ন্যায়ালয়ৰ পৰা জামিন লাভ কৰে।
ইফালে গৃহ মন্ত্ৰালয়ে ফতেমাৰ ২০০৩ চনৰ মূল আবেদন পত্ৰ হেৰোৱা বুলি দাবী কৰি সকলো নথি-পত্ৰ পুনৰ জমা দিবলৈ নিৰ্দেশ দিয়াত, নিজৰ মূল আবেদনৰ দ্ৰুত নিষ্পত্তিৰ বাবে উচ্চ ন্যায়ালয়ৰ দ্বাৰস্থ হয় প্ৰৌঢ়াগৰাকী। অহা ১৭ আগষ্টত গোচৰটোৰ পৰৱৰ্তী শুনানি গ্ৰহণ কৰা হ’ব।
