সমগ্ৰ দেশতে NEET বিতৰ্কৰ অন্ত পৰা নাই। পৰীক্ষা বাতিল হোৱাৰ পিছত প্ৰতিদিনে চিবিআইৰ তদন্তত ইটোৰ পিছত সিটো চাঞ্চল্যকৰ তথ্য ওলাই পৰিছে। শেহতীয়াকৈ জয়পুৰৰ জামৱাৰামগড় অঞ্চলৰ বিৱাল পৰিয়ালৰ কাহিনীয়ে তদন্তকাৰীৰ চকু কপালত তুলিছে।
প্ৰতিবেদন অনুসৰি দ্বাদশ শ্ৰেণীৰ পৰীক্ষাত উত্তীৰ্ণ হ’বলৈ টনাটনি লগা ছাত্ৰজনৰ পিতৃয়ে NEET-ৰ প্ৰশ্নকাকত ক্ৰয় কৰিবলৈ লাখ লাখ টকা খৰচ কৰাৰ অভিযোগ উত্থাপন হৈছে।
প্ৰতিবেদন অনুসৰি অভিযুক্ত ছাত্ৰজনে ‘গ্ৰেচ মাৰ্ক’ অৰ্থাৎ অতিৰিক্ত নম্বৰৰ বাবে কেনেবাকৈ দ্বিতীয় বিভাগত দ্বাদশ শ্ৰেণীৰ পৰীক্ষাত উত্তীৰ্ণ হ’ল। দ্বাদশ শ্ৰেণীৰ থিয়ৰিৰ পৰীক্ষাৰ নম্বৰ শুনিলে যিকোনো ব্যক্তিয়ে আচৰিত হ’ব। তেওঁ পদাৰ্থ বিজ্ঞানত মাত্ৰ ৯ নম্বৰহে লাভ কৰিছিল। ৰসায়ন বিজ্ঞানত ১৫ আৰু জীৱবিজ্ঞানত ২০। অৰ্থাৎ বিজ্ঞানৰ মৌলিক কথাবোৰত সামান্যতমো আকৰ্ষণ নথকা সত্ত্বেও ডাক্তৰ হোৱাৰ দৌৰত যোগ দিলে।
চিবিআইৰ জেৰাৰ সময়ত ছাত্ৰজনৰ পিতৃ দীনেশ বিৱালে স্বীকাৰ কৰে যে তেওঁ পুত্ৰ আৰু ভতিজাকৰ প্ৰশ্নকাকত ক্ৰয় কৰিবলৈ বহু টকা খৰচ কৰিছিল। দীনেশৰ বক্তব্য অনুসৰি পৰীক্ষাৰ প্ৰায় ১৫ ঘণ্টাৰ আগতেই প্ৰশ্নকাকত তেওঁলোকৰ ওচৰ পালেহি।
প্ৰাথমিক তদন্তত অনুমান কৰা হৈছে যে এই দুই নম্বৰী কামৰ বাবে প্ৰায় ১০ লাখ টকাৰ লেনদেন কৰা হৈছিল। প্ৰশ্নকাকতসমূহ মূলতঃ এপ আৰু পিডিএফ ফাইলৰ জৰিয়তে সৰবৰাহ কৰা হৈছিল।
এক প্ৰতিবেদন অনুসৰি পৰীক্ষাৰ আগদিনা ৰাতি হাতত প্ৰশ্নোত্তৰ পোৱাৰ পিছতো ছাত্ৰজনে NEET পৰীক্ষাত ভাল ফলাফল দেখুৱাব পৰা নাছিল। যদিও ৬০০তকৈ অধিক নম্বৰ পোৱাৰ লক্ষ্যৰে প্ৰশ্নবোৰ কিনা হৈছিল, তথাপিও পৰীক্ষাত তেওঁ মাত্ৰ ১০৭ নম্বৰহে লাভ কৰিছিল। ফাদিল হোৱা প্ৰশ্ন পোৱাৰ পিছতো এনে ব্যৰ্থতাই সংশ্লিষ্ট ছাত্ৰজনৰ প্ৰতিভাৰ স্তৰ প্ৰমাণ কৰে।
এই তথ্য পোহৰলৈ অহাৰ পিছতে ছচিয়েল মিডিয়াত সমালোচনাৰ জোৱাৰ উঠে। নেটিজেনৰ প্ৰশ্ন – প্ৰশ্ন ফাদিলৰ বিষয়টো যদি পোহৰলৈ নাহিলহেঁতেন আৰু কেনেবাকৈ ছাত্ৰজনে চিকিৎসা বিজ্ঞানত সুযোগ পালেহেঁতেন তেন্তে মানুহৰ জীৱনৰ সুৰক্ষা ক’ত থাকিলেহেঁতেন?
তদন্তকাৰী সংস্থাটোৱে কয় যে এই প্ৰশ্ন ফাদিল নেটৱৰ্ক কেৱল ছাত্ৰজন বা তেওঁৰ পৰিয়ালৰ মাজতে সীমাবদ্ধ নহয়। ৰাজস্থানৰ ছিকাৰৰ কেইবাটাও কোচিং চেণ্টাৰৰ ছাত্ৰ-ছাত্ৰীকো এই প্ৰশ্নকাকত বিতৰণ কৰা হয়। দীনেশ বিৱালে এজন ৰাকেশ মাণ্ডাবাৰীৰ জৰিয়তে ফাদিল হোৱা প্ৰশ্নকাকত সংগ্ৰহ কৰে। এতিয়া চিবিআইয়ে এই চক্ৰৰ উৎসৰ তদন্ত কৰি আছে।
