পিতৃ আৰক্ষী বিষয়া, কন্যা অধিবক্তা  : খোদ কন্যাই আদালতত খাৰিজ কৰালে পিতৃৰ আদেশ

সেই সময়ত পিতৃ উত্তৰ প্ৰদেশৰ আৰক্ষী অধীক্ষক আছিল আৰু কন্যা পেছাত উকীল আছিল। দুয়োৰে কোনোৱেই কৰ্তব্য বা পেছাদাৰী নৈতিকতাৰ ক্ষেত্ৰত আপোচ কৰা নাছিল। অৱসৰপ্ৰাপ্ত আই জি ৰাকেশ সিঙে নিৰ্যাতনৰ অভিযোগত এজন কনিষ্টবলক চাকৰিৰ পৰা বৰ্খাস্ত কৰিছিল। তেওঁৰ কন্যা অধিবক্তা অনুৰা সিঙে সেই সিদ্ধান্তক আদালতত প্ৰত্যাহ্বান জনাই গোচৰটোত জয়ী হয়।

যোৱা ১৩ জানুৱাৰীত এই ঘটনা সংঘটিত হৈছিল। পিলভিটৰ এগৰাকী নাবালিকা ছোৱালী ৰেলযোগে বাৰেলীত উপস্থিত হোৱাৰ পিছদিনা কনিষ্টবল তৌফিক আহমেদৰ বিৰুদ্ধে নিৰ্যাতনৰ অভিযোগ উত্থাপন হৈছিল।

ৰে’ল আৰক্ষীয়ে তেওঁৰ বিৰুদ্ধে POCSO আইনৰ অধীনত গোচৰ ৰুজু কৰি গ্ৰেপ্তাৰ কৰে। ইয়াৰ পিছত বাৰেলী ৰেঞ্জৰ আই জি ৰাকেশ সিঙে তেওঁক চাকৰিৰ পৰা বৰ্খাস্ত কৰাৰ নিৰ্দেশ দিয়ে, যাক তেওঁ “কঠোৰ কিন্তু কৰ্তব্যপৰায়ণ” সিদ্ধান্ত বুলি অভিহিত কৰে।

অৱশ্যে তৌফিক আহমেদে চাকৰিৰ পৰা বৰ্খাস্ত কৰাৰ সিদ্ধান্তক এলাহাবাদ উচ্চ ন্যায়ালয়ত প্ৰত্যাহ্বান জনায়। তাতে আই জি ৰাকেশ সিঙৰ কন্যা অনুৰা সিঙে তেওঁৰ অধিবক্তা হিচাপে থিয় দিছিল।

অনুৰাই যুক্তি দিছিল যে বিভাগীয় তদন্তত উত্তৰ প্ৰদেশ আৰক্ষীৰ অধীনস্থ ৰেংক (শাস্তি আৰু আপীল) নিয়ম, ১৯৯১ উলংঘা কৰা হৈছিল। তদন্তকাৰী বিষয়াজনে কেৱল অভিযোগ প্ৰমাণিত বুলি ঘোষণা কৰাই নহয়, নিজাববীয়াকৈ শাস্তি দিয়াৰ পৰামৰ্শও দিছিল, যিটো আচলতে শাস্তি প্ৰদানকাৰী কৰ্তৃপক্ষৰ অধিকাৰক্ষেত্ৰৰ ভিতৰত পৰে।

৩১ জুলাইত ন্যায়াধীশ অজিত কুমাৰে অনুৰাৰ যুক্তি মানি লৈ আহমেদক পুনৰ নিযুক্তিৰ নিৰ্দেশ দি তিনি মাহৰ ভিতৰত নতুনকৈ তদন্ত সম্পূৰ্ণ কৰিবলৈ কয়।

ৰাকেশ সিঙে কয়, “মোৰ ছোৱালীৰ জয় মোৰ বাবে গৌৰৱৰ বিষয়। তদন্তত নিশ্চয় কিছু ভুল হৈছে।”

আনহাতে অনুৰাই কয়, “মই এজন উকীল হিচাপে মোৰ কৰ্তব্য পালন কৰিছো, আৰু মোৰ দেউতা চৰকাৰৰ প্ৰতিনিধি হিচাপে।”তৌফিক আহমেদে কৃতজ্ঞতা প্ৰকাশ কৰি কয় যে গোচৰৰ সময়ত তেওঁ নাজানিছিল যে তেওঁৰ অধিবক্তাৰ অভিযুক্ত কৰ্তৃপক্ষৰ সৈতে ব্যক্তিগত সম্পৰ্ক আছে।