২০১৮ চনৰ ১ জানুৱাৰীৰ দিনা মহাৰাষ্ট্ৰৰ ভীমা কৰেগাঁৱত সংঘটিত হিংসাত্মক ঘটনাৰ এগৰাকী প্ৰধান অভিযুক্ত ফাদাৰ ষ্টান স্বামীৰ আজি দুপৰীয়া ১.৩০ বজাত মৃত্যু ঘটে।
আজি বোম্বে উচ্চ ন্যায়ালয়ত দিনৰ ২.৩০ বজাত স্বামীৰ জামিন আবেদনৰ শুনানি গ্ৰহণ কৰাৰ কথা আছিল। শুনানিৰ পূৰ্বেই স্বামীৰ মৃত্যু ঘটে।
উল্লেখ ২০১৮ চনৰ ১ জানুৱাৰীৰ দিনা ভীমা কৰেগাঁৱত দলিত সম্প্ৰদায়ৰ লোকসকলে ভীমা কৰেগাঁৱ যুদ্ধৰ ২০০ বৰ্ষপূৰ্তি উপলক্ষ্যে এক বিজয় উৎসৱ অনুশ্ঠিত কৰিছিল।উক্ত উৎসৱৰ সময়তে দুস্কৃতিকাৰীয়ে উৎসৱত ভাগ লোৱা লোকসকলক আক্ৰমণ কৰাত এটি কিশোৰ নিহত হোৱাৰ লগতে বহু লোক আহত হৈছিল।
ঘটনাৰ পৰৱৰ্তী সময়ত সমগ্ৰ মহাৰাষ্ট্ৰতে হিংসাত্মক ঘটনাই গা কৰিছিল।
উক্ত ঘটনাক উদগনি দিয়াৰ অভিযোগত আৰক্ষীয়ে ফাদাৰ ষ্টান স্বামীক গ্ৰেপ্তাৰ কৰিছিল।
স্বামীয়ে চিপিআই (মাওবাদী) সমৰ্থিত বিস্তাপন বিৰোধী জন বিকাশ আন্দোলনৰ সৈতে জৰিত থকাৰ বাবেই তেওঁক গ্ৰেপ্তাৰ কৰা হৈছিল।
কিন্তু স্বাস্থ্যজনিত কাৰণত স্বামীক তালোজা কাৰাগাৰৰ পৰা মুম্বাইৰ হলি ফেমিলী হাস্পতাললৈ স্থানান্তৰিত কৰা হৈছিল।
আজি চিকিৎসালয়তে স্বামীয়ে শেষ নিশ্বাস ত্যাগ কৰে।মৃত্যুৰ সময়ত তেওঁৰ বয়স হৈছিল ৮৪ বছৰ।
কিছুদিন পূৰ্বে তেওঁ কোভিডতো আক্ৰান্ত হৈছিল।
উল্লেখ্য উক্ত একেটা গোচৰতে আৰক্ষীয়ে সমাজকৰ্মী ভাৰভাৰা ৰাও, সুধা ভৰদ্বাজ আদি ব্যক্তিসকলো গ্ৰেপ্তাৰ কৰিছিল। তেওঁলোকৰ বিৰুদ্ধেও মাওবাদীৰ সৈতে সম্পৰ্ক থকাৰ অভিযোগ অনা হৈছিল।
