ভাৰতীয় সময় অনুসৰি আজি (২১ নৱেম্বৰৰ) পুৱা ৬.৩০ বজাৰ পৰা থাইলেণ্ডৰ বেংককত আৰম্ভ হয় ২০২৫ চনৰ মিছ ইউনিভাৰ্ছৰ চূড়ান্ত প্ৰতিযোগিতা। অন্তিম পৰ্যায়ত কেইবাটাও পৰ্যায়ৰ মাজেৰে পাৰ হৈ পাঁচখন দেশৰ প্ৰতিনিধিয়ে মিছ ইউনিভাৰ্ছৰ ফাইনেলত প্ৰৱেশ কৰে।
চূড়ান্ত প্ৰতিযোগীৰ ভিতৰত আছিল – মিছ ইউনিভাৰ্ছ থাইলেণ্ড, মিছ ইউনিভাৰ্ছ ফিলিপাইনছ, মিছ ইউনিভাৰ্ছ ভেনিজুৱেলা, মিছ ইউনিভাৰ্ছ মেক্সিকো আৰু মিছ ইউনিভাৰ্ছ আইভৰি কোষ্ট। তাৰ পিছত বিচাৰকসকলে সকলো প্ৰতিযোগীক দুটাকৈ প্ৰশ্ন কৰে। সেই দুটা প্ৰশ্নৰ উত্তৰৰ ভিত্তিত মিছ ইউনিভাৰ্ছ ২০২৫ চূড়ান্ত কৰা হয়।
চূড়ান্ত পৰ্যায়ত ফাতিমাই শ্ৰেষ্ঠতাৰ খিতাপ লাভ কৰিছে। থাইলেণ্ডত মূল পৰ্যায় আৰম্ভ হোৱাৰ পূৰ্বে মিছ ইউনিভাৰ্ছ কৰ্তৃপক্ষই সকলোৰে সৈতে প্ৰি-পেজেণ্ট ইভেণ্টৰ আয়োজন কৰিছিল। নিয়ম অনুসৰি প্ৰতিযোগীসকলে মিছ ইউনিভাৰ্ছ অনুষ্ঠিত হোৱা দেশখনৰ প্ৰচাৰমূলক ভিডিঅ’ বনাব লাগে।
অফিচিয়েল ফটো শ্বুটৰ বাহিৰতো কিছু ফটো তোলা হৈছিল। কিন্তু মিছ ইউনিভাৰ্ছ মেক্সিকোৱে সেয়া সময়মতে ছ’চিয়েল মিডিয়াত পোষ্ট কৰিব নোৱাৰিলে। ইয়াৰ বাবেই মিছ ইউনিভাৰ্ছ থাইলেণ্ডৰ সঞ্চালক নাৱত ইটছাৰাগ্ৰিচিলে তেওঁক ‘ডাম্বহেড’ বুলি অভিহিত কৰি সকলোৰে সন্মুখত ঠাট্টা-মস্কৰা কৰিছিল।
মিছ মেক্সিকো ফাতিমা বছে লগে লগে এই কথাৰ প্ৰতিক্ৰিয়া প্ৰকাশ কৰে। তেওঁ পোনপটীয়াকৈ কয়, ‘আপুনি মোক নাৰী হিচাপে উপযুক্ত সন্মান দিয়া নাই।’
তাৰপিছতো সঞ্চালকগৰাকীয়ে নিৰাপত্তা বাহিনীক মাতি শাসন কৰিবলৈ চেষ্টা কৰিছিল। কিন্তু তেতিয়ালৈকে আন প্ৰতিযোগীসকলে মিছ ইউনিভাৰ্ছ মেক্সিকোৰ পক্ষ লয়। সকলোৱে বহাৰ পৰা উঠি একেলগে হলঘৰৰ পৰা ওলাই আহে। মিছ ইউনিভাৰ্ছৰ এই অনুষ্ঠানটো ফেচবুকত পোনপটীয়াকৈ সম্প্ৰচাৰ কৰা হৈছিল।
ঘটনাৰ পিছতে মিছ ইউনিভাৰ্ছ মেক্সিকোৱে এক সাক্ষাৎকাৰত কয়, ‘একবিংশ শতিকাত এগৰাকী নাৰী কেতিয়াও পুতলা হ’ব নোৱাৰে। যি মন যায় ক’ব বা সাজ-পোছাক পিন্ধিব নোৱাৰিব। মই ইয়াত সকলো মহিলাক প্ৰতিনিধিত্ব কৰিবলৈ আহিছো। মোক অসন্মান কৰা মানে সমগ্ৰ নাৰী জাতিক অসন্মান কৰা।’
ঘটনাৰ পিছতে সঞ্চালকগৰাকীয়ে তিনিটা ভিন্ন স্থানৰ পৰা ক্ষমা বিচাৰে। কিন্তু মিছ ইউনিভাৰ্ছ কৰ্তৃপক্ষই সেই কথাত ভোল যোৱা নাছিল। এইবাৰে মিছ ইউনিভাৰ্ছ কৰ্তৃপক্ষই সঞ্চালকৰ দায়িত্ব দিয়া নাৱটক পদৰ পৰা অপসাৰণ কৰে।
এই ঘটনাৰ পিছত মিছ ইউনিভাৰ্ছ মেক্সিকো ফাতিমা বছৰ জনপ্ৰিয়তা দ্ৰুতভাৱে বৃদ্ধি পালে। আনকি আন প্ৰতিযোগীসকলেও তেওঁৰ সৈতে অনুষ্ঠান বৰ্জন কৰি প্ৰশংসা লাভ কৰে। ফাইনেলত চমক দেখুৱাই নিজকে ‘ই্টেলিজেন্ট’ বুলি প্ৰমাণো কৰিলে। মিছ ইউনিভাৰ্ছ ২০২৫ প্ৰতিযোগিতাত ৰানাৰ্ছ আপ হয় মিছ থাইলেণ্ড।
