যুদ্ধ এইবাৰ আমেৰিকাৰ মাটিত! ইৰাণে কেলিফৰ্ণিয়াৰ পশ্চিম উপকূলত মাৰাত্মক ড্ৰ’ন আক্ৰমণ চলাব পাৰে বুলি ফেডাৰেল ব্যুৰো অৱ ইনভেষ্টিগেশ্যনে (এফ বি আই) সকীয়াই দিছে। পশ্চিম এছিয়াত সংঘাত বৃদ্ধি পাইছে। আমেৰিকা আৰু ইজৰাইলে প্ৰতিটো মুহূৰ্ততে আক্ৰমণ চলাই আছে। এই পৰিস্থিতিত তেহৰানে প্ৰতিশোধৰ বাবে আমেৰিকাৰ মাটিত আক্ৰমণ কৰাৰ পৰিকল্পনা কৰিছে। এইদৰে কেলিফৰ্ণিয়া প্ৰশাসনক সকীয়াই দিছে এফ বি আইয়ে।
বাতৰি অনুসৰি, এটা সতৰ্কবাণীত এফ বি আইয়ে কৈছে যে ফেব্ৰুৱাৰী মাহৰ আৰম্ভণিতে (সেই সময়ত আমেৰিকা আৰু ইজৰাইলে ইৰাণৰ ওপৰত যৌথ আক্ৰমণ চলোৱা নাছিল) তেহৰানে আমেৰিকাৰ মাটিত হঠাৎ আক্ৰমণৰ পৰিকল্পনা কৰিছিল। বিশেষকৈ কেলিফৰ্ণিয়াৰ পশ্চিম উপকূল মধ্যপ্ৰাচ্যৰ দেশখনৰ আক্ৰমণৰ লক্ষ্য হ’ব পাৰে। এফ বি আইৰ বিষয়াসকল চিন্তিত কাৰণ তেওঁলোকৰ হাতত ইৰাণৰ সম্ভাৱ্য আক্ৰমণৰ বিষয়ে বিতং তথ্য নাই।
প্ৰসংগক্ৰমে ক’বলৈ গ’লে আমেৰিকা আৰু ইজৰাইলৰ অবিৰত আক্ৰমণৰ পিছতো ইৰাণ পিছুৱাই যাবলৈ ইচ্ছুক নহয়। ‘বিশ্বৰ ইন্ধনৰ জীৱনৰেখা’ হৰমুজ প্ৰণালী, মধ্যপ্ৰাচ্যৰ কেইবাখনো দেশ আৰু ইজৰাইলৰ বিৰুদ্ধে প্ৰতিশোধ লৈছে। ইৰাকৰ বাণিজ্যিক বন্দৰ আল-এফত তেহৰানে এখন তেল টেংকাৰ আক্ৰমণ কৰে। ইয়াৰ উপৰিও কুৱেইট, কাটাৰ, সংযুক্ত আৰব আমিৰশ্বাহী আৰু চৌদি আৰবে নিজৰ দেশত ড্ৰ’ন আৰু মিছাইল আক্ৰমণ ৰোধ কৰা বুলি উল্লেখ কৰিছে।
ইৰাণৰ ৰাষ্ট্ৰপতি মাছুদ পেজেছকিয়ানে সংঘাতৰ মাজতে শান্তি ঘূৰাই অনাৰ বাবে তিনিটা চৰ্ত দিছে। সেইবোৰ হ’ল ১) তেহৰাণৰ অধিকাৰক সাৰ্বভৌম ৰাষ্ট্ৰ হিচাপে স্বীকৃতি দিয়া, ২) যুদ্ধৰ ক্ষতিপূৰণ দিয়া আৰু ৩) ৰাষ্ট্ৰসংঘৰ দৰে আন্তঃৰাষ্ট্ৰীয় সংগঠনৰ পৰা নিশ্চয়তা দিয়া যে ভৱিষ্যতে কোনো আগ্ৰাসন নহ’ব।
শেহতীয়া খবৰ মতে, ইৰাণৰ বন্দৰত আমেৰিকাৰ এটা কোম্পানীৰ দুখন তেল টেংকাৰত আক্ৰমণ চলাইছে ইৰাণে। এই ঘটনাত এজন লোকৰ মৃত্যু হৈছে। ইৰাণে হৰমুজ প্ৰণালীতো কেইবাখনো জাহাজত আক্ৰমণ চলাইছে বুলি জানিব পৰা গৈছে। ইৰাণৰ আক্ৰমণত ছৌদি আৰৱৰ এখন তেল টেংকাৰত জুই লাগিছে বুলি দাবী কৰা হৈছে।
বিশেষজ্ঞসকলে দাবী কৰিছে যে ইৰাণে একাধিক আক্ৰমণেৰে হৰমুজক অৱৰুদ্ধ কৰাৰ কৌশল গ্ৰহণ কৰিছে। ইয়াৰ ফলত আমেৰিকা আৰু ইজৰাইলৰ ওপৰত যুদ্ধৰ অন্ত পেলাবলৈ হেঁচা বৃদ্ধি পাব।
