পানমচলা বিমল ইলাইচিৰ বিজ্ঞাপনৰ বাবে বিপদত পৰিছে বলীউডৰ তিনি শীৰ্ষ অভিনেতা। বিমল ইলাচিৰ বিজ্ঞাপনৰ বাবে মহাৰাষ্ট্ৰ খাদ্য আৰু ঔষধ প্ৰশাসনে (FDA) শ্বাহৰুখ খান, অজয় দেৱগন আৰু টাইগাৰ শ্ৰফলৈ কাৰণ দৰ্শোৱাৰ জাননী প্ৰেৰণ কৰিছে। চৰকাৰী সংস্থাটোৱে দাবী কৰিছে যে বিমল ইলাচিৰ বিজ্ঞাপন ৰাজ্যত নিষিদ্ধ বিমল পান মছলাৰ চেৰ’গেট বিজ্ঞাপনৰ সমান।
বিশেষ কথাটো হ’ল মহাৰাষ্ট্ৰৰ এফ ডি এয়ে মহাৰাষ্ট্ৰত ধঁপাত আৰু পান মছলা বিক্ৰীৰ বিৰুদ্ধে অভিযান চলাইছে। সেই অভিযানৰ অংশ হিচাপে এই তিনিগৰাকী বলীউডৰ ছুপাৰষ্টাৰলৈ এই জাননী প্ৰেৰণ কৰা হৈছে।
সূত্ৰই দাবী কৰিছে যে এই জাননীত তিনিওজন অভিনেতাক বিজ্ঞাপনত নিজৰ ভূমিকা বুজাবলৈ কোৱা হৈছে। জানিব পৰা মতে এই জাননী অভিনেতাসকলৰ ঘৰলৈ প্ৰেৰণ কৰা হৈছে। তিনি তাৰকাক এই বিজ্ঞাপনৰ পৰা তৎকালীনভাৱে আঁতৰি যাবলৈ নিৰ্দেশ দিয়া হৈছে।
চৰকাৰী সংস্থাটোৱে জনোৱা মতে, এই বিজ্ঞাপনত প্ৰথম অৱস্থাত মূলতঃ পান মছলাৰ সৈতে জড়িত বিমল ব্ৰেণ্ডৰ প্ৰচাৰ কৰা যেন লাগে। ‘বিমল ইলাচি’ নামটো এনেদৰে ব্যৱহাৰ কৰা ধৰণে গ্ৰাহকক বিভ্ৰান্ত কৰি পৰোক্ষভাৱে নিষিদ্ধ পান মছলা ব্ৰেণ্ডৰ সজাগতা বৃদ্ধি কৰিব পাৰে। আৰু সেইবাবেই এফ ডি এয়ে ইয়াক চেৰ’গেট এড বা ছদ্মবেশত বিজ্ঞাপন বুলি গণ্য কৰে।
এইবাৰ প্ৰথমবাৰৰ বাবে এফ ডি এয়ে চেৰ’গেট বিজ্ঞাপনৰ বিষয়টোৰ ওপৰত তদন্ত আৰম্ভ কৰিছে। এই ক্ষেত্ৰত তেওঁলোকে কৈছে যে বিজ্ঞাপনৰ উপস্থাপন, সংলাপ, সামগ্ৰীৰ নাম আৰু বজাৰৰ প্ৰসংগ – এই সকলোবোৰ মিলি ই কোনো নিষিদ্ধ ধঁপাতজাতীয় সামগ্ৰীৰ পৰোক্ষ বা চেৰ’গেট প্ৰচাৰ হয় নে নহয় তাক লৈ ‘গুৰুতৰ প্ৰশ্ন’ উত্থাপন কৰে। তিনিওজন অভিনেতাই এই ব্ৰেণ্ডৰ প্ৰচাৰৰ মুখ হিচাপে অংশগ্ৰহণ কৰিছে।
উল্লেখ্য যে ২০১২ চনৰ পৰা মহাৰাষ্ট্ৰত ধঁপাত বা নিকোটিনযুক্ত গুটখা আৰু পান মছলা নিষিদ্ধ কৰা হৈছে।বৰ্তমান আয়ুক্ত টুকাৰাম মুণ্ডেৰ অধীনত মহাৰাষ্ট্ৰৰ এফ ডি এয়ে ধঁপাত বিক্ৰী আৰু প্ৰচাৰৰ বিৰুদ্ধে কঠোৰ ব্যৱস্থা গ্ৰহণ কৰিছে।
গুটখা, ধঁপাত বা নিকোটিনযুক্ত পান মছলা আৰু অনুৰূপ নিষিদ্ধ সামগ্ৰী বিক্ৰীৰ বিৰুদ্ধে অভিযান চলোৱাৰ উপৰিও এফ ডি এয়ে সংগঠিত চক্ৰৰ জৰিয়তে এনে সামগ্ৰীৰ ব্যৱসায় কৰা ক্ষেত্ৰত মহাৰাষ্ট্ৰ সংগঠিত অপৰাধ নিয়ন্ত্ৰণ আইন (এম চি চি এ) বলবৎ কৰাৰ বাবে আৰক্ষীৰ সৈতে সমন্বয় গঢ়ি তুলিছে।
