সম্ভাৱ্য বিধ্বংসী ঘুৰ্ণী ‘’ফেনি’’ৰ আশংকাত কলকাতা বিমানবন্দৰৰ পৰা যাত্ৰা কৰিবলগীয়া সকলোবোৰ বিমানৰ উৰণ শুকুৰবাৰে আবেলি ৩ বজাৰ পৰা শনিবাৰে পুৱা ৮ বজালৈকে বাতিল কৰা হৈছে।
‘’ফেনি’’ ঘুৰ্ণীৰ বিপৰ্যয়ৰ প্ৰতি দৃষ্টি ৰাখি অসামৰিক বিমান পৰিবহন বিভাগৰ সঞ্চালক প্ৰধানে কলকাতাৰ নেতাজী সুভাষ চন্দ্ৰ বসু আন্তৰ্জাতিক বিমানবন্দৰত বিমানৰ চলাচল বন্ধ কৰাৰ নিৰ্দেশ দিছে।
পূৰ্বতে, সিদ্ধান্ত লোৱা মতে শুকুৰবাৰে ৰাতিপুৱা ৯.৩০ বজাৰ পৰা শনিবাৰে সন্ধিয়া ৬ বজালৈ কলকাতা বিমানবন্দৰৰ পৰা বিমানৰ উৰণ বন্ধ ৰখাৰ কথা আছিল। কিন্তু শুকুৰবাৰে ৰাতিপুৱাই উৰিষ্যাৰ উপকূলত বিধ্বংসী ধুমুহা ‘’ফেনি’’য়ে খুন্দা মৰাৰ পাছতে এই সময়ৰ সালসলনি ঘটোৱা হয়।
অসামৰিক বিমান পৰিবহন সঞ্চালকালয় আৰু ভাৰতীয় বিমানবন্দৰ কৰ্তৃপক্ষৰ বিষয়াসকল অতি বিধ্বংসী ঘূৰ্ণী বতাহ ‘’ফেনি’’ৰ গতিকলৈ চিন্তিত হৈ পৰিছে। বিষয়াসকল ১৭৫ কিলোমিটাৰ বেগত অহা ধুমুহাটো ২৭৫ কিলোমিটাৰ স্পৰ্শ কৰিব পাৰে বুলি অধিক চিন্তিত হৈ পৰিছে।
আনহাতে, বিমানসেৱা বাতিলে কলকাতা বিমানবন্দৰৰ নিকট দূৰত্বত থকা উত্তৰ পূৰ্বাঞ্চলৰ আঠখন ৰাজ্যৰ বিমানসমূহক বেয়াকৈ প্ৰভাৱিত কৰিছে। এই অঞ্চলৰ ৰাজ্যসমূহৰ পৰা দৈনিক পোনপোটীয়াকৈ বিভিন্ন বিমান কলকাতালৈ আহে।
অসামৰিক বিমান পৰিবহন বিভাগৰ সঞ্চালক প্ৰধানে লগতে শুকুৰবাৰে ভুৱনেশ্বৰৰ পৰা যাত্ৰা কৰিবলগীয়া সকলো বিমানৰ উৰণ বাতিল কৰিছে। কলকাতা আৰু ভুৱনেশ্বৰৰ মাজত চলিবলগীয়া বিমানৰ উৰণ বিমান চলাচল নিয়ন্ত্ৰণ শাখাৰ ফালৰ পৰা সেউজ সংকেত পোৱাৰ পাছতহে আৰম্ভ কৰা হ’ব।
বাতৰি অনুসৰি, শনিবাৰলৈকে কলকাতা-চেন্নাই ৰে’লপথত চলিবলগীয়া ২০০তকৈয়ো অধিক ৰে’লৰ যাত্ৰা বন্ধ কৰা হৈছে। তদুপৰি, ৯খন ৰে’লৰ পথ সলনি কৰা হৈছে আৰু ৪ খনৰ যাত্ৰা সীমিত কৰা হৈছে।
