সদৌ অসম অভ্যন্তৰীণ জল পৰিবহণ শ্ৰমিক সংঘই অহা ২৮ নৱেম্বৰৰ পৰা ৪৮ ঘণ্টাৰ বাবে ফেৰী-জাহাজ সেৱাত “সৰ্বাত্মক বন্ধ” ঘোষণা কৰিছে।
সেইদিনা পুৱা ৫ বজাৰ পৰা ৩০ নৱেম্বৰৰ পুৱা ৫ বজালৈকে ফেৰী সেৱা বন্ধ থাকিব, নৰ্থইষ্ট নাওক এই কথা জানিবলৈ দিছে সংঘৰ সাধাৰণ সম্পাদক অৰূপ বৈশ্যই।
মূলতঃ ৬টা দাবীৰে শ্ৰমিক সংঘই ৰূপায়ণ কৰিব ‘সৰ্বাত্মক বন্ধ’ কাৰ্য্যসূচী। দাবীসমূহ তলত উল্লেখ কৰা হ’ল।
- ব্ৰহ্মপুত্ৰ, বৰাক আৰু ইয়াৰ উপনৈসমূহত ফেৰী সেৱা আৰু বাণিজ্যিক সেৱাক গতিশীলতা প্ৰদানৰ বাবে নতুন জাহাজ, বাৰ্জ আৰু মালবাহী টাগ বিভাগীয়ভাৱে নিৰ্মাণ কৰা।
- বিভিন্ন স্তৰৰ বিভাগত খালীহৈ থকা পদসমূহ পদোন্নতি আৰু নতুন নিযুক্তিৰে অতি শীঘ্ৰে জাহাজ চলাচলৰ নিৰাপদ ব্যৱস্থা গঢ়ি তোলা।
- জাহাজ চলাচলৰ সময় নৌ পৰিবহণৰ নিয়ম অনুযায়ী নিৰ্ধাৰণ কৰা আৰু বিভাগত অতিশীঘ্ৰে এজন নৌ প্ৰযুক্তিবিদক স্থায়ী সঞ্চালক হিচাপে নিযুক্তি।
- ৰাজ্য চৰকাৰে বিভাগটো জল পৰিবহণ উন্নয়ন সমাজ আৰু জল পৰিবহণ ৰেগুলেটৰি অথৰিটিৰ অধীনলৈ নিয়াৰ চৰকাৰী পদক্ষেপৰ শ্ৰমিক সংঘই বিৰোধিতা কৰিছে।
- বিভাগত অবৈধভাৱে পাৰঘাটসমূহত চলি থকা বোটসমূহ বন্ধ কৰি অতিশীঘ্ৰে বিভাগীয়ভাৱে চলাচল কৰাৰ ব্যৱস্থা গ্ৰহণ কৰা।
- বিভাগৰ একমাত্ৰ উত্তৰ-পূব ভাৰতৰ নাৱিক প্ৰশিক্ষণ কেন্দ্ৰটোৰ খালী হৈ থকা দুজন প্ৰশিক্ষক আৰু প্ৰশিক্ষণ অধীক্ষক পদটোত নিয়োগ কৰি অতি শীঘ্ৰে কেন্দ্ৰটো পুনঃ প্ৰচলন কৰা।
ইপিনে, সংঘই আহ্বান জনোৱা এই বন্ধ ঘোষণাৰ পাছতে ফেৰী, নাও, জাহাজেৰে অহা-যোৱা কৰা যাত্ৰীসকলৰ মাজত হাহাকাৰ অৱস্থাৰ সৃষ্টি হৈছে।
বিশেষকৈ গুৱাহাটী উত্তৰ-গুৱাহাটী সংযোগী তথা উমানন্দ সংযোগী ফেৰী সেৱা যদি ৪৮ ঘন্টা ধৰি বন্ধ হৈ থাকে তেন্তে ছাত্ৰ-ছাত্ৰী, বিভিন্ন বিভাগত কৰ্মৰত কৰ্মচাৰী, ব্যৱসায়ীসকলৰ মাজত হাহাকাৰ অৱস্থাৰ সৃষ্টি হ’ব।