দেওবাৰে টেট পৰীক্ষা চলি থকাৰ মাজতে এজন পৰীক্ষাৰ্থীক বাহিৰৰ পৰা এখন পূৰাই থোৱা OMR (Optical Mark Recognition) শ্বীট যোগানৰ চেষ্টা চলাই গোৱালপাৰাৰ পি আৰ চৰকাৰী উচ্চ আৰু মধ্য প্ৰাথমিক বিদ্যালয়ৰ এজন চতুৰ্থ বৰ্গৰ কৰ্মচাৰীক হাতে-লোটে ধৰা পৰে।
অভিযুক্ত কৰ্মচাৰী গৰাকীক নুৰ নবি বুলি চিনাক্ত কৰা হৈছে। তেওঁ বিদ্যালয়খনৰ ২৪ নম্বৰ ৰূমত পৰীক্ষা দি থকা প্ৰণৱজ্যোতি কলিতা নামৰ পৰীক্ষাৰ্থী গৰাকীক আগৰ পৰা পূৰ হৈ থকা এখন OMR শ্বীট যোগান ধৰিছিল।
পৰীক্ষা সমাপ্ত হ’বলৈ মাত্ৰ ৫ মিনিট সময় বাকী থকা অৱস্থাত এই কথা ধৰা পৰে, সেই সময়ত এগৰাকী শিক্ষয়িত্ৰী পৰীক্ষা নিৰীক্ষকৰ কৰ্তব্যত আছিল।
একেটা কোঠাত এগৰাকী পৰীক্ষাৰ্থীৰ মতে, ‘কৰ্মচাৰী গৰাকীয়ে ভিতৰলৈ সোমাই আহি পৰীক্ষাৰ্থী গৰাকীৰ OMR শ্বীটখন নিজৰ হাতত থকা অন্য এখন OMR শ্বীটেৰে সলনি কৰিব খুজিছিল। আমি ইয়াৰ প্ৰতিবাদ কৰো আৰু ঘটনাটো নিৰীক্ষকক জনাওঁ। তাৰ পিছত তেওঁক অধ্যক্ষৰ কোঠালৈ লৈ যোৱা হয়।‘
অধ্যক্ষ এম ছজিমুদ্দিন আহমেদে তুৰন্তে ঘটনাটো বিদ্যালয় পৰিদৰ্শক আৰু জিলা প্ৰশাসনৰ দৃষ্টিগোচৰ কৰায়। ইয়াৰ পিছতে কাৰ্যবাহী দণ্ডাধীশ বানি কলিতা, বিদ্যালয় পৰিদৰ্শক নৃপেন দাস আৰু উপ আৰক্ষী অধীক্ষক ৰূপজ্যোতি কলিতা বিদ্যালয়ত উপস্থিত হৈ তদন্ত আৰম্ভ কৰে।
আৰক্ষীয়ে নুৰ নবিক গ্ৰেপ্তাৰ কৰাৰ লগতে প্ৰনৱজ্যোতি কলিতাৰ OMR শ্বীটখনৰো তদন্ত চলায়।
এক সূত্ৰৰ মতে অভিযুক্ত পৰীক্ষাৰ্থীজন একেখন বিদ্যালয়ৰে এগৰাকী জ্যেষ্ঠ শিক্ষকৰ ঘণিষ্ঠ সম্পৰ্কীয় আৰু উক্ত শিক্ষকজন ঘটনাৰ সময়ত বিদ্যালয়খনত উপস্থিত আছিল।
