গৃহমন্ত্ৰী অমিত শ্বাহৰ ফটো এখন বিশেষ ফটো সামাজিক মাধ্যমত শ্বেয়াৰ কৰি বিপদত পৰিল এজন চলচিত্ৰ নিৰ্মাতা। আহমেদাবাদ আৰক্ষীয়ে গ্ৰেপ্তাৰ কৰা চলচিত্ৰ নিৰ্মাতাজন হৈছে অৱিনাশ দাস।
ফটোখনত পূজা সিংহল নামৰ এগৰাকী আইএএছ বিষয়াৰ স’তে অমিত শ্বাহক দেখা গৈছে।
উল্লেখযোগ্য যে অবৈধ বিত্তীয় লেনদেনৰ অভিযোগত ঝাৰখণ্ডৰ এই আইএএছ বিষয়াগৰাকীক ইডিয়ে কিছুদিন পূৰ্বে গ্ৰেপ্তাৰ কৰিছিল।
আৰক্ষীয়ে জনোৱামতে, ফটোগ্ৰাফখন পাঁচ বছৰৰ পুৰণি আৰু চলচিত্ৰ নিৰ্মাতা দাসে যোৱা ৮ মে’ তাৰিখে ইয়াক টুইটাৰত শ্বেয়াৰ কৰে। ইয়াৰ দ্বাৰা গৃহমন্ত্ৰীজনৰ ভাৱমূৰ্তি ম্লান কৰা হৈছে।
তদুপৰি এগৰাকী মহিলাই দেশৰ জাতীয় পতাকা পৰিধান কৰি থকাৰ ফটো ফেচবুকত প’ষ্ট কৰাৰ বাবেও দাসৰ ওপৰত আইনী ব্যৱস্থা লোৱা হৈছে। আৰক্ষীয়ে জনোৱামতে, ইয়াৰ দ্বাৰা জাতীয় পতাকাক অপমান কৰা হৈছে।
উল্লেখযোগ্য যে ২০১৭ চনত আনাৰকলী অৱ আৰাহ নামৰ চিনেমাখনৰ নিৰ্মাণেৰে অৱিনাশ দাসে জনপ্ৰিয়তা লাভ কৰিছিল।
চিনেমাখনত স্বাৰা ভাস্কৰ, পংকজ ত্ৰিপাথি আৰু সঞ্জয় মিশ্ৰই অভিনয় কৰিছিল। আৰক্ষীয়ে গ্ৰেপ্তাৰ কৰাৰ পাছত এতিয়া তেওঁ কেইবাটাও ধাৰাৰ গোচৰৰ সমুখীন হ’ব লগা হৈছে।
