মন্ত্ৰিত্ব লাভ কৰাৰ পাছত বৃহস্পতিবাৰে প্ৰথমবাৰলৈ গৃহ সমষ্টি গোলাঘাটত উপস্থিত হ’য় ৰাজ্যৰ প্ৰথমগৰাকী মহিলা বিত্তমন্ত্ৰী তথা সমাজ কল্যাণ মন্ত্ৰী অজন্তা নেওগ। উপস্থিত হৈ মন্ত্ৰী গৰাকীয়ে আৱৰ্ত্ত ভৱনত বিভিন্ন বিভাগৰ বিষয়-ববীয়া সকলৰ সৈতে জিলাখনৰ উন্নয়নমূলক কাম-কাজৰ ওপৰত পৰ্যালোচনা কৰে।
ইয়াৰপিছতে মন্ত্ৰী গৰাকীয় সংবাদকৰ্মীসকলৰ লগত মত-বিনিময় কৰে। বিশেষকৈ বৰ্তমান সময়ত ক’ভিডসৃষ্ট পৰিস্থিতিক লৈ অধিক সৰ্তকতা অৱলম্বন কৰিবলৈ সকলোকে আহ্বান জনায়।
মন্ত্ৰীগৰাকীয়ে ৭০ খনকৈ চাহ বাগিচা থকা গোলাঘাটত প্ৰথম অৱস্থাত চাহ বাগিচাসমূহত ক’ভিডৰ সংক্ৰমণ অধিক হৈছিল যদিও যোৱা সপ্তাহৰ পৰা ক’ভিড আক্ৰান্তৰ সংখ্যা হ্ৰাস পোৱা বুলি উল্লেখ কৰে।
এই পৰিস্থিতিৰ সৈতে মোকামিলা কৰিবলৈ গোলাঘাটৰ সকলো চাহ বাগিচাৰ পৰিচালকৰ সৈতে মন্ত্ৰী গৰাকীয়ে এলানি আলোচনাত মিলিত হৈছিল।
তদুপৰি, ক’ভিড সংক্ৰমণ ৰোধ কৰিবলৈ বিশেষকৈ ক’ভিড পৰীক্ষাৰ ক্ষেত্ৰত কোনো লোকে যাতে ব্যক্তিগত বাহন লৈ পৰীক্ষা কেন্দ্ৰলৈ নাহে তাৰবাবে সৰ্তক হ’বলৈ প্ৰশাসন আৰু স্বাস্থ্য বিভাগক নিৰ্দেশ দিয়ে।
যিহেতু কোনো এজন লোকে নিজৰ বাহনেৰে ক’ভিড পৰীক্ষা কেন্দ্ৰলৈ আহিলে বা ব্যক্তিজন পজিটিভ হ’লে অন্য কোনো লোক আক্ৰান্ত হোৱাৰ সম্ভাৱনা বৃদ্ধি পায়। গতিকে এইক্ষেত্ৰতে চৰকাৰী বাহন ব্যৱহাৰ কৰিবলৈ স্বাস্থ্য বিভাগক জাননী দিয়া বুলিও উল্লেখ কৰে। লগতে ক’ভিড কেন্দ্ৰ সমূহত যাতে কোনো অপ্ৰীতিকৰ পৰিস্থিতিৰ সৃষ্টি নহ’য় সেইক্ষেত্ৰত চোকা দৃষ্টি ৰাখিবলৈ আহ্বান জনায়।
ইপিনে ক’ভিড কেন্দ্ৰসমূহত অস্থায়ীভাৱে নিযুক্তি দিয়া কৰ্মচাৰীৰ বেতন বা স্থায়ী নিযুক্তি সন্দৰ্ভত সাংবাদিকে সোধা প্ৰশ্নৰ উত্তৰ দি মন্ত্ৰী গৰাকীয়ে আগন্তুক সময়ত এই বিষয়ে ৰাজ্যৰ স্বাস্থ্যমন্ত্ৰী তথা গোলাঘাটৰ অভিভাৱক মন্ত্ৰী কেশৱ মহন্তৰ লগত আলোচনা কৰা হ’ব বুলি দায় সৰা মন্তব্য আগবঢ়ায়।
উল্লেখ্য যে, ক’ভিডত মৃত্যু হোৱা লোকৰ সৎকাৰৰ বাবে চৰকাৰী এছঅ’পিয়ে ধাৰ্য কৰা ১০ হাজাৰকৈ টকা সময়ত নোপোৱা বুলি উঠা অভিযোগত মন্ত্ৰী গৰাকীয়ে এইক্ষেত্ৰত তৎকালে আগতীয়াকৈ ধনৰাশি মুকলি কৰি দিয়াৰ নিৰ্দেশ জাৰি কৰে।
ইয়াৰ লগতে মন্ত্ৰী গৰাকীয়ে নিৰ্বাচনৰ সময়ত বিজেপি দলে যিখিনি প্ৰতিশ্ৰুতি প্ৰদান কৰিছিল সেই সকলো প্ৰতিশ্ৰুতি পূৰণৰ বাবে চৰকাৰৰ যি সদিচ্ছা আছে সেই সকলোখিনি কৰি যাবলৈ সকলোৰে সহায়-সহযোগিতা কামনা কৰে।
