যোগ গুৰু বাবা ৰামদেৱৰ বিৰুদ্ধে এখন এজাহাৰ দাখিল কৰা হৈছে। পাঠাই খান নামৰ এজন স্থানীয় লোকে দাখিল কৰা অভিযোগৰ ভিত্তিত দেওবাৰে চৌহাটান আৰক্ষী থানাত বাবা ৰামদেৱৰ বিৰুদ্ধে এজাহাৰ দাখিল কৰা হৈছে। আনৰ ধৰ্মীয় বিশ্বাসক আঘাত কৰা আৰু সাম্প্ৰদায়িক বুজাবুজিত পাৰস্পৰিক বিদ্বেষৰ পৰিৱেশ সৃষ্টি কৰাৰ অভিযোগত এই এজাহাৰ খন দাখিল কৰা হৈছে।
ৰামদেৱে ৰাজস্থানৰ বাৰমেৰ জিলাৰ এখন ‘চিয়াৰ্ছ মিট’ত আপত্তিজনক মন্তব্য কৰিছিল। যোগ গুৰুজনে অতীততো বহুতো বিতৰ্কিত মন্তব্য কৰিছে। তাত ৰাজনৈতিক মন্তব্যও আছে। এইবাৰ তেওঁ সম্পূৰ্ণ সাম্প্ৰদায়িক বিদ্বেষমূলক মন্তব্য কৰিছে।
ৰামদেৱে কৈছিল যে মুছলমানসকলে হিন্দু মহিলাক অপহৰণ কৰে। সনাতন, ইছলাম আৰু খ্ৰীষ্টান ধৰ্মৰ তুলনা কৰি ৰামদেৱে কৈছিল যে মুছলমানসকলে হিন্দু মহিলাক অপহৰণ কৰে আৰু সন্ত্ৰাস বিয়পাই দিয়ে। ইছলাম আৰু খ্ৰীষ্টান ধৰ্মৰ লক্ষ্য হৈছে ধৰ্মান্তৰকৰণ। আনহাতে, হিন্দুসকলৰ শিক্ষা হৈছে সকলোৰে বাবে ভাল কৰা।
ৰাজস্থানত এখন সভাত ভাষণ দি ৰামদেৱে কৈছিল যে মুছলমানসকলে দিনে পাঁচবাৰ কৈ নামাজ কৰে। তাৰ পিছত তেওঁলোকে যি মন যায় তাকে কৰে। তেওঁলোকে হিন্দু মহিলাসকলক অপহৰণ কৰে আৰু সকলো ধৰণৰ পাপ কাম কৰে। কিন্তু পাঁচবাৰ নামাজ অৱশ্যে পঢ়ে। সনাতন ধৰ্মৰ শিক্ষা এনেকুৱা নহয়।
ৰামদেৱৰ এটা বিবৃতি সামাজিক মাধ্যমত ভাইৰেল হৈ পৰিছে। অৱশ্যে, ভিডিঅ’টোৰ সত্যতা পৰীক্ষা কৰিব পৰা হোৱা নাই। ভিডিঅ’টোত ৰামদেৱে কৈছে, “মই কাকো লক্ষ্য কৰা নাই, কিন্তু কিছুমান লোকৰ কথা হ’ল যে তেওঁলোকে সমগ্ৰ বিশ্বক ইছলামলৈ ৰূপান্তৰ কৰিব। আন এটা দলে গোটেই পৃথিৱীখন খ্ৰীষ্টান ধৰ্মৰ অধীনলৈ আনিব বিচাৰে। তেওঁলোক উগ্ৰপন্থী হয়, অপৰাধী হয়, কিন্তু নামাজ পঢ়ে। আনহাতে, সনাতন ধৰ্মই মানুহক শিকায়- হিংসা নকৰিবা, অসৎ নহ’বা, ৰাতিপুৱা সোনকালে উঠা, প্ৰাৰ্থনা কৰা, যোগাভ্যাস কৰা।
উল্লেখ্য যে যোৱা বছৰ নৱেম্বৰত যোগ গুৰুজনে মহিলাৰ পোছাক সম্পৰ্কেও আপত্তিজনক মন্তব্য কৰিছিল। থানেৰ এটা যোগ শিবিৰত ৰামদেৱে কৈছিল যে মহিলাবোৰক শাৰী পিন্ধিলেই ভাল দেখায়। ছালৱাৰ পিন্ধিলেও ভাল লাগে। একো পিন্ধি নিপিন্ধিলেও মহিলাসকলক ভাল দেখায়। ৰামদেৱে মহাৰাষ্ট্ৰৰ মুখ্যমন্ত্ৰী দেৱেন্দ্ৰ ফাৰ্নৱিছৰ পত্নীৰ সন্মুখতে এই মন্তব্য কৰিছিল।
