উচটনিমূলক বক্তব্যৰে CAA-বিৰোধী আৰু বিজেপি কৰ্মীৰ মাজত সংঘৰ্ষ সৃষ্টি কৰিব খোজাৰ অভিযোগত খুমটাই সমষ্টিৰ বিজেপি বিধায়ক মৃণাল শইকীয়াৰ বিৰুদ্ধে দাখিল হ’ল এজাহাৰ।
বৃহত্তৰ অসমীয়া যুৱ মঞ্চ, শিৱসাগৰ নগৰ সমিতিয়ে আজি শিৱসাগৰ জিলাৰ সদৰ থানাত বিধায়ক মৃণাল শইকীয়াৰ বিৰুদ্ধে এই এজাহাৰ দাখিল কৰে।
“অসমত নাগৰিকত্ব সংশোধন আইনৰ বিৰুদ্ধে তীব্ৰ প্ৰতিবাদ অব্যাহত থকাৰ মাজতে এচাম অপশক্তিয়ে এনে প্ৰতিবাদৰ গইনা লৈ হিংসা আৰু বিদ্বেষ বিয়পোৱাৰ চেষ্টা কৰিছে। এনে এক অপশক্তি হৈছে খুমটাই সমষ্টিৰ বিধায়ক মৃণাল শইকীয়া”, এজাহাৰখনত যুৱ মঞ্চই কয়।
সংগঠনটোৰ শিৱসাগৰ নগৰ সমিতিৰ সভাপতি বিষ্ণু শইকীয়া আৰু প্ৰধান সচিব প্ৰশান্ত বৰগোগাঁই স্বাক্ষৰিত এজাহাৰখনত আৰু কোৱা হৈছে, “২৬ ডিচেম্বৰত চাবুৱাৰ এখন ৰাজহুৱা সভাত তেওঁ বিভাজনমূলক কথা কৈ “আমাৰ এটা কৰ্মীক হাত দিলে তেওঁলোকৰ দহটা কৰ্মীক হাত দিম”, “আমাৰ ঘৰ জ্বলালে সিহঁতৰো ঘৰ জ্বলাব” আদি বক্তব্য কৰি ৰাইজক বিপথে পৰিচালিত কৰা দেখা গৈছে। মৃণাল শইকীয়াৰ এনে মন্তব্য কেৱল উচটনিমূলকেই নহয়, সাম্প্ৰদায়িক আৰু হিংসাৰ পথ ল’বলৈ মুকলি আহ্বান। যাৰ বাবে অসমত হিংসাৰ পৰিৱেশ সৃষ্টি হোৱাৰ সম্ভাৱনা আছে”।
এজাহাৰখনত বিধায়ক শইকীয়াৰ বিৰুদ্ধে বিহিত ব্যৱস্থা ল’বলৈ আহ্বান জনাইছে বৃহত্তৰ অসমীয়া যুৱ মঞ্চৰ শিৱসাগৰ নগৰ সমিতিয়ে।
যদিহে আদালতত মৃণাল শইকীয়াৰ বিৰুদ্ধে আইনী যুঁজ চলাব লগীয়া হয় তেন্তে তাত সম্পূৰ্ণ বিনামূলীয়াকৈ অধিবক্তা বিদ্যুৎ গগৈয়ে বৃহত্তৰ অসমীয়া যুৱ মঞ্চৰ হৈ উকালতি কৰিব বুলি জনাইছে।
ষ্টাফ ৰিপ’ৰ্টাৰৰ সংযোজন :
বিজেপি বিধায়কজনৰ বিৰুদ্ধে শাস্তিমূলক ব্যৱস্থা গ্ৰহণৰ দাবী বিৰোধী দলপতি দেৱব্ৰত শইকীয়াৰ
আনহাতে বিজেপিৰ বিধায়কজনেও শাস্তিমূলক ব্যৱস্থা গ্ৰহণৰ দাবী জনালে বিৰোধী দলপতি দেৱব্ৰত শইকীয়ায়ো। তেওঁ বিধায়কজনৰ উচটনিমূলক মন্তব্যক গৰিহণা দিয়ে আৰু চৰকাৰক তেওঁৰ বিৰুদ্ধে ব্যৱস্থা ল’বলৈ দাবী জনায়।
সদৌ অসম ছাত্ৰ সন্থাৰ গোলাঘাট গোটেও বিধায়কজনৰ বিৰুদ্ধে ব্যৱস্থা গ্ৰহণৰ দাবী জনাইছে।