মিঞা কবিতাৰ বিৰুদ্ধে সমগ্ৰ ৰাজ্যত তীব্ৰ প্ৰতিবাদ হৈ থকাৰ মাজতে আজি শিৱসাগৰত মিঞা পৰিষদৰ সভাপতিসহ চাৰিজন লোকৰ বিৰুদ্ধে ইছলামধৰ্মী খিলঞ্জীয়া মুছলমান সংগঠনৰ বিষয়ববীয়াই শিৱসাগৰ সদৰ থানাত এজাহাৰ দাখিল কৰে।
এজাহাৰত সংগঠনটোৱে উল্লেখ কৰা লোক কেইজন হ’ল ক্ৰমে অসম মিঞা পৰিষদৰ সভাপতি এছ গিয়াছুদ্দিন হাজৰিকা আৰু মিঞাৰ কবিতা আবৃত্তিকাৰী ক্ৰমে হাফিজ আহমেদ, ৰিহনা চুলতান, আশ্ৰাফল হুছেইন আৰু আব্দুৰ ৰহিম।
এজাহাৰ দাখিল কৰাৰ পিছতে সংগঠনটোৱে চহৰৰ ৰংপুৰজ্যোতি ক্লাবত এক সংবাদমেল আয়োজন কৰে। সংবাদমেলত উজনি অসম মুছলিম কল্যাণ পৰিষদৰ কাৰ্যকৰী সভাপতি মণিৰুল ইছলাম বড়া, সদৌ অসম গৰিয়া মৰিয়া দেশী জাতীয় পৰিষদৰ সভাপতি হাফিজুল আহমেদ, মৰিয়া যুৱ ছাত্ৰ পৰিষদৰ সভাপতি চাহজাহান আলী আৰু অসম চাহ জনগোষ্ঠী জুলহা যুৱ ছাত্ৰ পৰিষদৰ সাধাৰণ সম্পাদক জিতু আহমেদ উপস্থিত থাকে।
সংবাদমেলত তেওঁলোকে কয় যে অসমৰ ইতিহাসত কোনো বৰঙণি নথকা পূৰ্ববংগীয় মুছলমান যাক মিঞা বুলি জনা যায়, এইসকল মিঞাই সদ্যহতে এটা মিঞা কবিতা ৰচনা কৰি অসমীয়া জাতিক লজ্জানত কৰোৱাৰ লগতে গৌৰৱোজ্জল ইতিহাসৰ সৈতে জড়িত গৰিয়া, মৰিয়া, দেশী ইছলামধৰ্মীয় খিলঞ্জীয় মুছলমানক মিঞাৰ সৈতে সাঙোৰ খুৱাবলৈ চেষ্টা চলাইছে।
তাৰোপৰি সংগঠনকেইটাই এম গিয়াচুদ্দিন নামৰ ব্যক্তিজনে অসম মিঞা পৰিষদ নামৰ এটা সংগঠন কৰি শৰাইঘাটৰ যুদ্ধৰ বীৰ লাচিত বৰফুকনৰ সহযোগী ওৰফে ইছমাইল ছিদ্দিকিৰ নামৰ আগত মিঞা শব্দ ব্যৱহাৰ কৰি বীৰ জনক অপমান কৰা বুলিও উল্লেখ কৰে।
ইয়াৰোপৰি অসমৰ ইতিহাসত তথা সংবিধানৰ ন্যাযতা নথকা মিঞা শব্দৰে এটা জনগোষ্ঠীক সাঙুৰি ৰাষ্ট্ৰীয় নাগৰিকপঞ্জী প্ৰকাশৰ আগে আগে উক্ত জনগোষ্ঠীটো নিৰ্যাতিত হোৱা বুলি মিঞা কবিতা আবৃতি কৰি বিশ্বৰ জনমানসত অসমীয়া জাতিক হেয় প্ৰতিপন্ন কৰা অসম মিঞা পৰিষদ আৰু মিঞা কবিতা আবৃত্তি কৰা সকলক অতি শীঘ্ৰ গ্ৰেপ্তাৰ কৰাৰ দাবী জনায় সংগঠনকেইটাই।