তেলেংগানা চৰকাৰে ৰাণা ডাগ্গুবাটি, প্ৰকাশ ৰাজ, বিজয় দেৱেৰাকোণ্ডা আদি এজাক তাৰকাৰ বিৰুদ্ধে এফআইআৰ দাখিল কৰিছে। জানিব পৰা মতে, ২৫ তাৰকাৰ বিৰুদ্ধে এফআইআৰ দাখিল কৰা হৈছে। এই ২৫ জন লোকৰ বিৰুদ্ধে অবৈধ বেটিং এপৰ বিজ্ঞাপন আৰু প্ৰচাৰৰ অভিযোগ আছে। সেয়ে দক্ষিণৰ ছুপাৰষ্টাৰসকলৰ বিৰুদ্ধে প্ৰতাৰণাকে ধৰি একাধিক ধাৰাত এফআইআৰ দাখিল কৰা হৈছে।
জানিব পৰা মতে, ফণীন্দ্ৰ শৰ্মা নামৰ এজন ব্যৱসায়ীয়ে অবৈধ বেটিং এপৰ সৈতে জড়িত অভিনেতা আৰু ছ’চিয়েল মিডিয়া প্ৰভাৱশালী ব্যক্তিৰ বিৰুদ্ধে এজাহাৰ দাখিল কৰে। তেওঁ অভিযোগ কৰে যে বেটিং কোম্পানীসমূহে এই বিপুল জনপ্ৰিয় তাৰকাসকলৰ ছ’চিয়েল মিডিয়া ব্যৱহাৰ কৰি নিজৰ এপ আৰু ৱেবছাইটৰ প্ৰচাৰ চলাইছে। যিহেতু জনপ্ৰিয় তাৰকা এই বিজ্ঞাপনৰ সৈতে জড়িত, সেয়েহে জনসাধাৰণক প্ৰভাৱিত কৰা হৈছে। বিশেষকৈ মধ্যবিত্ত আৰু নিম্ন মধ্যবিত্ত পৰিয়াল ক্ষতিগ্ৰস্ত হোৱাৰ লগতে বৃহৎ আৰ্থিক লোকচানৰ সন্মুখীন হৈছে।
ফনীন্দ্ৰ শৰ্মাই নিজেও এই বেটিং এপটোত বিনিয়োগ কৰাৰ কথা চিন্তা কৰিছিল। অৱশ্যে পৰিয়ালৰ পৰামৰ্শ মতে অৱশেষত তেওঁ আঁতৰি আহে।
ইয়াৰ পিছত ফনীন্দ্ৰই ২৫ তাৰকাৰ বিৰুদ্ধে এজাহাৰ দাখিল কৰে। ফণীন্দ্ৰৰ অভিযোগৰ ভিত্তিত মাঞ্চু লক্ষ্মী, প্ৰনিতা, নিধি আগৰৱাল, অনন্যা নাগালা, ছিৰি হনুমনথুৰ দৰে তাৰকাৰ দল এটাৰ বিৰুদ্ধে এফআইআৰ দাখিল কৰা হয়।
ভাৰতীয় ন্যায় সংহিতাৰ কেইবাটাও ধাৰা আৰু আই টি আইনৰ কেইবাটাও ধাৰাত এফ আই আৰ দাখিল কৰা হৈছে। অৱশ্যে এই এফআইআৰ সন্দৰ্ভত এতিয়ালৈকে তাৰকাসকলৰ পৰা কোনো প্ৰতিক্ৰিয়া পোৱা হোৱা নাই।
ইপিনে, তেলেংগানা চৰকাৰৰ ভূমিকাক লৈও প্ৰশ্ন উত্থাপন হৈছে। যোৱা ডিচেম্বৰ মাহত পুষ্পা ২ ছবিখনৰ প্ৰিমিয়াৰত এজন ব্যক্তিৰ পদপিষ্ট হৈ মৃত্যু হৈছিল। সেই ঘটনাত গ্ৰেপ্তাৰ হৈছিল বিখ্যাত অভিনেতা আল্লু অৰ্জুন। সংশ্লিষ্ট সূত্ৰৰ মতে, তেতিয়াৰ পৰাই তেলেংগানা চৰকাৰ আৰু অভিনেতাসকলৰ সম্পৰ্ক তিক্ত হৈ পৰিছে। সেই ঘটনাৰ পিছতেই তেলেংগানা চৰকাৰে এদল অভিনেতাৰ বিৰুদ্ধে এফআইআৰ দাখিল কৰিছে।
