সময় তেতিয়া পুৱতি নিশা। চলন্ত বাছৰ ভিতৰত গভীৰ নিদ্ৰাত মগ্ন আছিল পৰ্যটকসকল। তেনে সময়তে সংঘটিত হ’ল এক ভয়ংকৰ অঘটন। চলন্ত বাছখনত হঠাতে দাওদাওকৈ জুই জ্বলি উঠে আৰু বাছৰ ভিতৰত আৱদ্ধ হৈ থকা অৱস্থাতে একেৰাহে কেইবাজনো পৰ্যটক জীৱন্তে অগ্নিদগ্ধ হয়। এই ভয়াবহ অগ্নিকাণ্ডৰ ঘটনাই সমগ্ৰ ৰাজ্যতে তীব্ৰ চাঞ্চল্যৰ সৃষ্টি কৰিছে।
সৰ্বভাৰতীয় সংবাদ মাধ্যমৰ সূত্ৰে জানিব পৰা মতে, এই শোকাবহ দুৰ্ঘটনাটো উত্তৰ প্ৰদেশৰ গ্ৰেটাৰ নয়ডাত সংঘটিত হৈছে। আৰক্ষীয়ে জানিবলৈ দিয়া মতে, বৃহস্পতিবাৰে পুৱতি নিশা যমুনা এক্সপ্ৰেছৱেত পৰ্যটক কঢ়িয়াই নিয়া এখন শ্লীপাৰ বাছত ভয়ংকৰভাৱে জুই বিয়পি পৰে। নিমিষতে সমগ্ৰ বাছখন জুইৰ লেলিহান শিখাই আৱৰি ধৰাৰ ফলত বহুকেইজন পৰ্যটক বাছখনৰ ভিতৰতে আৱদ্ধ হৈ পৰে।
এই ভয়াবহ অগ্নিকাণ্ডৰ ফলত কমেও নজন পৰ্যটকৰ কৰুণ মৃত্যু ঘটিছে। নিহতসকলৰ ভিতৰত এগৰাকী মহিলাও আছে। ইয়াৰ উপৰিও আন বহুতো যাত্ৰী গুৰুতৰভাৱে আহত হৈছে। আৰক্ষীৰ তথ্য অনুসৰি, বাছখনত মুঠ চৌত্ৰিছজন যাত্ৰী আছিল। বাছখন নয়ডাৰ পৰা উত্তৰ প্ৰদেশৰ মাহোবা অভিমুখে গৈ আছিল। চলন্ত বাছখনত কেনেকৈ জুই লাগিল আৰু এই অগ্নিকাণ্ডৰ প্ৰকৃত কাৰণ কি, সেই বিষয়ে এতিয়ালৈকে কোনো সুনিৰ্দিষ্ট তথ্য পোহৰলৈ অহা নাই। দুৰ্ঘটনাৰ সময়ত বাছখনৰ প্ৰায় সকলো যাত্ৰীয়েই টোপনিত আছিল।
বাছখনত হঠাতে জুই বিয়পি পৰাৰ লগে লগে যাত্ৰীসকলৰ মাজত তীব্ৰ আতংকৰ সৃষ্টি হয়। প্ৰাণ বচাবলৈ বহু যাত্ৰীয়ে বাছৰ খিৰিকীৰে জপিয়াই পৰাৰ চেষ্টা কৰে যদিও সকলোৱে পলাই সাৰিবলৈ সক্ষম নহ’ল। অগ্নিকাণ্ডৰ খবৰ পোৱা মাত্ৰকে ঘটনাস্থলীত বিশাল আৰক্ষী বাহিনী আৰু অগ্নিনিৰ্বাপক বাহিনীৰ কেইবাখনো গাড়ী উপস্থিত হয় আৰু কেইবাঘণ্টাৰ অহোপুৰুষাৰ্থৰ অন্তত জুই নিৰ্বাপন কৰিবলৈ সক্ষম হয়। উত্তৰ প্ৰদেশৰ মুখ্যমন্ত্ৰী যোগী আদিত্যনাথে এই শোকাৱহ দুৰ্ঘটনাত গভীৰ শোক প্ৰকাশ কৰিছে। তেওঁ আহতসকলৰ উন্নত চিকিৎসাৰ বাবে প্ৰশাসনক কঠোৰ নিৰ্দেশ দিয়াৰ লগতে নিহত পৰ্যটকসকলৰ শোকসন্তপ্ত পৰিয়ালবৰ্গৰ কাষত থিয় দিয়াৰ আশ্বাস প্ৰদান কৰিছে।
