সোমবাৰে তামুলপুৰৰ মেছগুৰীৰ পুখুৰীপাৰ গাঁৱত সংঘটিত হয় এক গুলীচালনাৰ ঘটনা।
নিশা প্ৰায় ৯ বজাত অঞ্চলটোৰ কৃষ্ণ দাস নামৰ কৃষকজনৰ ঘৰত মুখত ক’লা কাপোৰ বান্ধি হাতত উদ্যত মাৰণাস্ত্ৰ লৈ প্ৰবেশ কৰা এটা তিনিজনীয়া দূৰ্বৃত্তৰ দলে গুলীচালনা সংঘটিত কৰাৰ বাতৰি পোৱা গৈছে।
ঘটনাৰ বিৱৰণীৰ মতে শোৱাপাতিৰ পৰা পৰিয়ালৰ লোকক উঠাই ভয়-ভাবুকি প্ৰদান কৰাৰ লগতে শোৱনি কোঠাটো প্ৰবেশ কৰে দুবৃত্তৰ দলটোৱে।
দুৰ্বত্তৰ তাণ্ডৱৰ মাজতে সুযোগ বুজি পৰিয়ালৰ এজন সদস্য চিঞৰ বাখৰ কৰি ওচৰ-চুবুৰীয়াক খবৰ দিয়ে। লোকজনে চিঞৰ বাখৰ কৰাৰ লগে লগে গুলীচালনা কৰি দুৰ্বৃত্তৰ দলটোৱে পলায়ণ কৰে। দলটো কাষতে থকা মটঙা নৈৰে পলাই যায় বুলি সন্দেহ কৰিছে পৰিয়ালৰ লোকে।
ঘটনাৰ সন্দৰ্ভত নিশাই তামুলপুৰ আৰক্ষীক খবৰ দিয়া হয়। খবৰ পাই নিশাই তামুলপুৰ আৰক্ষী থানাৰ ভাৰপ্ৰাপ্ত বিষয়া মনোৰঞ্জন মেধিৰ নেতৃত্বত আৰক্ষীৰ এটা দল ঘটনাস্থলীত উপস্থিত হৈ তদন্ত আৰম্ভ কৰে।
আৰক্ষীয়ে ঘৰৰ ভিতৰৰ পৰা এটা 9 MM পিষ্টলৰ খালী কাৰ্টিজো উদ্ধাৰ কৰে। ঘটনাত কোনো লোক হতাহত হোৱা নাই যদিও অঞ্চলজুৰি তীব্ৰ আতংকৰ সৃষ্টি হৈছে।
আজি পুৱা মুছলপুৰত বিজেপি কৰ্মী মিন্টু কলিতাৰ ক্ষত-বিক্ষত মৃতদেহ উদ্ধাৰ হোৱাৰ সমান্তৰালকৈ যোৱা নিশাৰ এই ঘটনাই স্বাভাৱিকতেই শংকা নমাই আনিছে বিটিচি অঞ্চলত।
বিটিচিত পুনৰ হিংসাৰ বিভিষিকাই উকমুকনি দিছে নেকি? বিটিচি নিৰ্বাচনৰ এমাহ নহওতেই পুনৰ অস্ত্ৰৰ জনজননি আৰম্ভ হ’ল নেকি বিটিআৰত? এই প্ৰশ্নই শংকিত কৰি তুলিছে বিটিআৰবাসীক।