কেতিয়াৰ পৰা দেশত ক’ৰ’ণাৰ টীকাকৰণ আৰম্ভ কৰা হ’ব এই লৈ জল্পনা কল্পনা চলি থকাৰ সময়তে অহা ১৩ জানুৱাৰীৰ পৰা এই টীকাকৰণ ভাৰতত আৰম্ভ হোৱাৰ সম্ভাৱনা আছে। কেন্দ্ৰীয় স্বাস্থ্য সচিব ৰাজেশ ভূষণে মঙ্গলবাৰে সম্বোধন কৰা এক সংবাদ মেলৰ পৰা এই ধাৰণা স্পষ্ট হৈছে।
কেন্দ্ৰীয় স্বাস্থ্য মন্ত্ৰণালয়ে প্ৰকাশ অনুসৰি জৰুৰী টীকাকৰণৰ অনুমতি লাভ কৰা দহ দিনৰ পৰাই টীকাকৰণ আৰম্ভ কৰিব পাৰিব।
উল্লেখ্য যোৱা দেওবাৰ তথা ৩ জানুৱাৰীত অক্সফ’ৰ্ডৰ আষ্ট্ৰাজেনেকাৰ কোভিডশ্বীল্ড আৰু ভাৰত বায়’টেকৰ কোভিক্সিন নামৰ কোভিড ভেকচিন দুটা ভাৰতত জৰুৰী টীকাকৰণৰ চূড়ান্ত অনুমতি লাভ কৰিছিল।
ইফালে মঙ্গলবাৰে কোভিডশ্বীল্ড ভেকচিন প্ৰস্তুতকৰ্তা ভাৰতীয় প্ৰতিষ্ঠান ছেৰাম ইনষ্টিটিউট অৱ ইণ্ডিয়া আৰু কোভিক্সিন ভেকচিন প্ৰস্তুতকাৰী আন এটা ভাৰতীয় প্ৰতিষ্ঠান ভাৰত বায়’টেকে এক যুটীয়া বিবৃতি প্ৰকাশ কৰিছে।
বিবৃতিটোত কোৱা হৈছে যে প্ৰতিষ্ঠান দুটাই ভাৰতত একেলগে ভেকচিন বিতৰণ কৰিব। প্ৰতিষ্ঠান দুটাৰ মতে যিমান শীঘ্ৰেই সম্ভৱ সিমান শীঘ্ৰেই ভাৰতত ক’ৰ’ণাৰ টীকাকৰণ আৰম্ভ কৰা হ’ব।
ভাৰতীয় প্ৰতিষ্ঠান দুটাই সমগ্ৰ বিশ্বতে কোভিড ভেকচিন বিতৰণ কৰিব বুলিও বিবৃতিত প্ৰকাশ কৰিছে।
ইফালে কেন্দ্ৰীয় স্বাস্থ্য সচিব ৰাজেশ ভূষণে সংবাদ মেলখনত কয়ে যে ভেকিচন প্ৰস্তুতকাৰী প্ৰতিষ্ঠান দুটাই দেশৰ মুম্বাই, চেন্নাই, কলকতা আৰু হাৰিয়ানাৰ চৰকাৰী মেডিকেল ষ্ট’ৰ বিভাগলৈ ভেকচিনসমূহ যোগান ধৰিব।
তাৰ পৰাই প্ৰাথমিক স্বাস্থ্য কেন্দ্ৰসমূহলৈ ভেকচিনসমূহ প্ৰেৰণ কৰা হ’ব বুলি জনায় কেন্দ্ৰীয় স্বাস্থ্য সচিবগৰাকীয়ে।
তেওঁ লগতে জনায় যে সমগ্ৰ দেশত ভেকচিনসমূহ সংৰক্ষিত কৰি ৰাখিবলৈ ২৯ হাজাৰ ক’ল্ড ষ্ট’ৰ সাজু কৰি ৰখা হৈছে।