সোমবাৰে পুৱতি নিশা অসমৰ মৰিগাঁও জিলাত হোৱা এক শক্তিশালী ভূমিকম্পৰ ফলত তিনিজন লোক আহত হোৱাৰ খবৰ পোৱা গৈছে। ভূমিকম্পৰ জোকাৰণি অনুভৱ কৰাৰ লগে লগে আতংকিত হৈ ঘৰৰ পৰা বাহিৰলৈ ওলাই আহিবলৈ চেষ্টা কৰোঁতেই এই লোকসকল দুৰ্ঘটনাৰ বলি হয়।
আহতসকলৰ ভিতৰত নীৰজ কুমাৰ আৰু জয়মতী দেউৰী বুলি চিনাক্ত কৰা দুজন লোকে মূৰত গুৰুতৰভাৱে আঘাত পাইছে। তেওঁলোকক ততাতৈয়াকৈ চিকিৎসালয়লৈ লৈ যোৱা হয় আৰু বৰ্তমান তেওঁলোক চিকিৎসাধীন হৈ আছে।
প্ৰাপ্ত তথ্য অনুসৰি ৰিখটাৰ স্কেলত ৫.১ প্ৰাৱল্যৰ এই ভূমিকম্পটোৰ অভিকেন্দ্ৰ আছিল মৰিগাঁও জিলাত। পুৱা প্ৰায় ৪:১৭ বজাত অহা এই প্ৰবল জোকাৰণিয়ে সমগ্ৰ অঞ্চলটোতে তীব্ৰ আতংকৰ সৃষ্টি কৰে। মৰিগাঁৱৰ লগতে কামৰূপ মহানগৰ, নগাঁও, হোজাই, গোলাঘাট, যোৰহাট, শিৱসাগৰ, কাছাৰ, ধুবুৰী আৰু গোৱালপাৰাকে ধৰি অসমৰ বিভিন্ন প্ৰান্তত এই জোকাৰণি অনুভৱ হয়।
অকল অসমতে নহয়, চুবুৰীয়া ৰাজ্য মেঘালয়, অৰুণাচল প্ৰদেশ, নাগালেণ্ড, মণিপুৰ, মিজোৰাম আৰু ত্ৰিপুৰাতো এই ভূমিকম্পৰ জোকাৰণি অনুভূত হৈছে। হঠাতে অহা এই ভূমিকম্পৰ বাবে বহু ঠাইত মানুহৰ মাজত হাহাকাৰ লাগে আৰু মানুহে সুৰক্ষিত স্থানৰ সন্ধানত ঘৰৰ পৰা দৌৰি বাহিৰলৈ ওলাই আহে। ভূমিকম্পৰ ফলত হোৱা অন্যান্য ক্ষয়-ক্ষতিৰ খবৰ এতিয়াও সবিশেষ জানিব পৰা হোৱা নাই।
