প্ৰথম বাৰৰ বাবে হোজাই উকীল সন্থাৰ সভাপতি হিচাপে বিনাপ্ৰতিদ্বন্দ্বিতাৰে নিৰ্বাচিত হয় ৰুহিনা ৱাৰিছ চৌধুৰী নামৰ মহিলাগৰাকী। বিগত ২ মে’ত হোজাই উকীল সন্থাৰ সৰ্বসন্মতিক্ৰমে সভাপতি হিচাপে নিৰ্বাচিত হয় ৰুহিনা।
উল্লেখযোগ্য যে, সভাপতি হিচাপে কাৰ্য্যভাৰ গ্ৰহন কৰাৰ লগে লগে ৰুহিনা হোজাই উকীল সন্থাৰ বিনাপ্ৰতিদ্বন্দ্বিতাই নিৰ্বাচিত হোৱা প্ৰথমগৰাকী মহিলা সভাপতি হিচাপে পৰিগণিত হয়।
আনহাতে, বিভিন্ন পদৰ বাবে শনিবাৰে নিৰ্বাচন অনুষ্ঠিত কৰা হয়। নিৰ্বাচনৰ অন্তত ৰাজেশ আগৰৱালা আৰু তেজ উদ্দিন খান উপ-সভাপতি, অমৰ জ্যোতি শইকীয়া সাধাৰণ সম্পাদক, জ্ঞানেন্দ্ৰ দেৱ নাথ যুতীয়া সম্পাদক, চৰিফুদ্দিন আহমেদ সহকাৰী সম্পাদক আৰু বিশ্বজিৎ ভট্টাচাৰ্য্যক গ্ৰন্থাগাৰ সম্পাদক হিচাপে নিৰ্বাচিত হয়।
তদুপৰি, কেন্দ্ৰীক সমিতিত সদস্য হিচাপে ৰখা হয় ক্ৰমে বিজন দেৱ, দিপক দেৱনাথ, নমিতা শৰ্মা, পূৱালী দত্ত, শংকু চৌধুৰী আৰু উত্তম শইকীয়াক।
নৰ্থ-ইষ্ট নাওৰ সৈতে হোৱা সাক্ষাৎকাৰত নৱ নিৰ্বাচিত সভাপতি ৰুহিনা ৱাৰিছ চৌধুৰিয়ে হোজাই উকীল সন্থাৰ প্ৰথমগৰাকী মহিলা সভাপতি হিচাপে তেওঁক নিৰ্বাচন কৰাৰ বাবে সকলোকে ধন্যাবাদ জ্ঞাপন কৰাৰ লগতে হোজাই উকীল সন্থাৰ সদস্য সকলৰ সৈতে একেলগে বিকাশ আৰু সততাৰ বাবে কাম কৰি যাব বুলি মন্তব্য কৰে।
