ভাৰতীয় সেনাৰ ইতিহাসত এক নতুন অধ্যায় সংযোজন হ’ল। ৰাষ্ট্ৰপতি দ্ৰৌপদী মুৰ্মুৰ ‘এড-ডি-কেম্প’ বা এডিচি হিচাপে নিযুক্তি লাভ কৰি ইতিহাস গঢ়িলে মেজৰ নব্য শেখাৱতে। ভাৰতীয় সেনাৰ পৰা ৰাষ্ট্ৰপতিৰ এডিচি হোৱা প্ৰথমগৰাকী মহিলা বিষয়া হিচাপে তেওঁ পৰিগণিত হৈছে। ৰাষ্ট্ৰপতিৰ দৰে দেশৰ সৰ্বোচ্চ সাংবিধানিক পদত থকা ব্যক্তিৰ সৈতে নিৰাপত্তা, আনুষ্ঠানিকতা আৰু সামৰিক শিষ্টাচাৰৰ দায়িত্ব পালনত মহিলা বিষয়াৰ এই উপস্থিতিয়ে সশস্ত্ৰ বাহিনীত নাৰী অংশগ্ৰহণৰ নতুন দিশো দেখুৱাইছে।
ৰাষ্ট্ৰপতি ভৱনৰ বিভিন্ন অনুষ্ঠানত ৰাষ্ট্ৰপতি দ্ৰৌপদী মুৰ্মুৰ কাষত এতিয়া দেখা যাব মেজৰ নব্য শেখাৱতক। ৰাষ্ট্ৰপতিৰ বিভিন্ন চৰকাৰী কাৰ্যসূচীত সহায় কৰা, সামৰিক আৰু আনুষ্ঠানিক নিয়ম-শৃংখলা বজাই ৰখা, লগতে অসামৰিক আৰু সামৰিক উচ্চপদস্থ বিষয়াসকলৰ মাজত সমন্বয় ৰক্ষা কৰাটো এগৰাকী এডিচিৰ গুৰুত্বপূৰ্ণ দায়িত্ব।
নিয়ম অনুসৰি ৰাষ্ট্ৰপতিৰ সহায়ৰ বাবে মুঠ পাঁচগৰাকী এডিচি নিয়োজিত থাকে। ইয়াৰে তিনিগৰাকী ভাৰতীয় সেনাৰ পৰা আৰু এজনকৈ বিষয়া নৌসেনা আৰু বায়ুসেনাৰ পৰা নিযুক্ত হয়। এই বিষয়াসকল কেৱল অনুষ্ঠানত ৰাষ্ট্ৰপতিৰ সৈতে উপস্থিত থকাই নহয়, ৰাষ্ট্ৰপতিৰ দৈনন্দিন চৰকাৰী কাৰ্যসূচী সুচাৰুৰূপে চলাতো গুৰুত্বপূৰ্ণ ভূমিকা পালন কৰে।
নব্য শেখাৱতৰ সামৰিক জীৱনৰ আৰম্ভণিও আছিল কঠোৰ প্ৰতিযোগিতা আৰু প্ৰশিক্ষণেৰে ভৰা। ইউনিয়ন পাব্লিক ছাৰ্ভিচ কমিছনে অনুষ্ঠিত কৰা কম্বাইণ্ড ডিফেন্স ছাৰ্ভিচেছ পৰীক্ষাত সফলতা লাভ কৰাৰ পাছত তেওঁ শৰ্ট ছাৰ্ভিচ কমিছন উইমেন নন-টেকনিকেল ক’ৰ্ছৰ বাবে নিৰ্বাচিত হয়। ইয়াৰ পাছত চেন্নাইৰ অফিচাৰ্ছ ট্ৰেইনিং একাডেমীত তেওঁ কঠোৰ সামৰিক প্ৰশিক্ষণ সম্পূৰ্ণ কৰে।
প্ৰশিক্ষণ শেষ কৰি নব্য শেখাৱতে ভাৰতীয় সেনাৰ আৰ্মি ছাৰ্ভিচ ক’ৰ্পছত বিষয়া হিচাপে যোগদান কৰে। সেনাবাহিনীৰ পৰিবহণ আৰু আন বহু গুৰুত্বপূৰ্ণ যোগান ব্যৱস্থা সচল ৰখাত এই শাখাই মুখ্য ভূমিকা পালন কৰে। ২০২১ চনৰ মাজভাগত সেনাত বিষয়া হিচাপে নিযুক্তি লাভ কৰাৰ কেইবছৰমানৰ ভিতৰতে নিজৰ দক্ষতা আৰু কৰ্মদক্ষতাৰ জৰিয়তে তেওঁ মেজৰ পদলৈ উন্নীত হয়। আৰু সেনাজীৱন আৰম্ভ কৰাৰ প্ৰায় পাঁচ বছৰৰ ভিতৰতে ২০২৬ চনত ৰাষ্ট্ৰপতি ভৱনত এডিচি হিচাপে নিযুক্তি লাভ কৰে।
ভাৰতীয় সেনাৰ পৰা ৰাষ্ট্ৰপতিৰ এডিচি হোৱা প্ৰথমগৰাকী মহিলা বিষয়া নব্য শেখাৱত। অৱশ্যে ৰাষ্ট্ৰপতিৰ এডিচি হিচাপে নিযুক্তি লাভ কৰা তেওঁ মুঠতে দ্বিতীয়গৰাকী মহিলা। ইয়াৰ পূৰ্বে ২০২৫ চনত ভাৰতীয় নৌসেনাৰ লেফটেনেণ্ট কমাণ্ডাৰ যশস্বী সোলাংকীয়ে প্ৰথমগৰাকী মহিলা হিচাপে এই দায়িত্ব লাভ কৰিছিল।
সশস্ত্ৰ বাহিনীত মহিলাৰ এই অগ্ৰগতি এদিনতে হোৱা পৰিৱৰ্তন নহয়। ১৯৯২ চনত শৰ্ট ছাৰ্ভিচ কমিছনৰ জৰিয়তে ভাৰতীয় সেনাত মহিলাৰ প্ৰৱেশৰ পথ মুকলি হৈছিল। তাৰ পাছত বিভিন্ন নীতি পৰিৱৰ্তন আৰু আদালতৰ গুৰুত্বপূৰ্ণ নিৰ্দেশৰ জৰিয়তে মহিলাৰ বাবে সেনাবাহিনীত অধিক সুযোগ মুকলি হৈ আহিছে।
বিশেষকৈ ২০২০ চনত উচ্চতম ন্যায়ালয়ে এক গুৰুত্বপূৰ্ণ ৰায়ত স্পষ্ট কৰিছিল যে শৰ্ট ছাৰ্ভিচ কমিছনত কৰ্মৰত যোগ্য মহিলা বিষয়াসকলক পুৰুষ বিষয়াৰ সমান চৰ্তত স্থায়ী কমিছনৰ বাবে বিবেচনা কৰিব লাগিব। সেই ৰায়ৰ পাছত ভাৰতীয় সশস্ত্ৰ বাহিনীত মহিলাৰ বাবে অধিক দায়িত্ব আৰু সুযোগৰ দুৱাৰ মুকলি হৈছে। মেজৰ নব্য শেখাৱতৰ ৰাষ্ট্ৰপতিৰ এডিচি হিচাপে নিযুক্তি সেই দীঘলীয়া পৰিৱৰ্তনৰ এক উল্লেখযোগ্য অধ্যায় হিচাপে ধৰা হৈছে।
