শনিবাৰে মাজ নিশা বেংগালুৰুৰ জিন্দাল ফ্লাই অভাৰত সংঘটিত হয় এক ভয়ংকৰ পথ দুৰ্ঘটনা। আৰক্ষী সূত্ৰৰ পৰা জানিব পৰা মতে, শনিবাৰে নিশা প্ৰায় ১১:৩০ বজাত মদনায়াকানাহল্লী থানা এলেকাৰ জিন্দাল ফ্লাই অভাৰত টুমাকুৰুৰ পৰা বেংগালুৰু অভিমুখে আহি আছিল এখন ইণ্ডিকা গাড়ী।
হঠাৎ গাড়ীখনে নিয়ন্ত্ৰণ হেৰুৱাই সোঁফালৰ ডিভাইডাৰত খুন্দা মাৰিলে। গাড়ীখনৰ খুন্দা ইমানেই ভয়াৱহ আছিল যে গাড়ীখন একেৰাহে দুবাৰকৈ ওলোটা খাই কৰ্ণাটক ৰাজ্যিক পথ পৰিবহণ নিগমৰ বাছ এখনত খুন্দা মাৰে।
বাছখন কে এছ আৰ টি চিৰ আছিল আৰু তাত মুঠ ৪২ জন যাত্ৰী আছিল। সৌভাগ্যক্ৰমে বাছখনৰ কোনো যাত্ৰী আহত নহ’ল যদিও বাছখনৰ সামান্য ক্ষতিসাধন হয়। কিন্তু ইণ্ডিকা গাড়ীখন সম্পূৰ্ণৰূপে বিধ্বস্ত হয়।
আৰক্ষীয়ে জনোৱা মতে, থিতাতে ৪ জন যুৱকৰ মৃত্যু হয়। সংকটজনক অৱস্থাত গাড়ীখনৰ চালক লিখিতক উদ্ধাৰ কৰি ব্যক্তিগত চিকিৎসালয়ত ভৰ্তি কৰোৱা হয়। কিন্তু তেওঁকো বচাব পৰা নগ’ল, চিকিৎসাৰ সময়তে তেওঁৰ মৃত্যু হয়। ফলত মৃত্যুৰ সংখ্যা পাঁচজনলৈ বৃদ্ধি পাইছে।
নিহতসকলৰ ভিতৰত হৰ্ষিত নামৰ এজন যুৱকক চিনাক্ত কৰা হৈছে। তেওঁ ৰাজনুকুন্টাৰ সাই বিদ্যা মহাবিদ্যালয়ৰ দ্বিতীয় বৰ্ষৰ ডিগ্ৰী পাঠ্যক্ৰমৰ ছাত্ৰ আছিল।
আৰক্ষীয়ে লগতে জনায় যে নিহত পাঁচোজনেই ডোদ্দাবল্লাপুৰ অঞ্চলৰ বাসিন্দা। পৰিয়ালৰ কোনো সদস্যক নজোনোৱাকৈ তেওঁলোক ঘৰৰ পৰা ওলাই আহিছিল। হৰ্ষিতৰ পৰিয়ালৰ লোকে জানিবলৈ দিয়ে যে শনিবাৰে নিশা প্ৰায় ৮:৩০ বজাত বন্ধুক লগ পোৱাৰ কথা কৈ তেওঁ ঘৰৰ পৰা ওলাই আহিছিল।
