সোমবাৰে নিশা কেৰালাৰ আলাপ্পুঝা জিলাত সংঘটিত এক ভয়ংকৰ পথ দুৰ্ঘটনাত ৫জন এম বি বি এছৰ ছাত্ৰই প্ৰাণ হেৰুৱাইছে। নিশা প্ৰায় ৯ বজাত এখন চেভ্ৰলেট টাভেৰা গাড়ীত ৭ গৰাকী ছাত্ৰ তীব্ৰ বেগেৰে গৈ থকা অৱস্থাত সংঘটিত হয় এই দুৰ্ঘটনা। তেওঁলোকৰ বাহনখনে এখন কেৰেলা ৰাজ্যিক পথ পৰিবহণ নিগমৰ যাত্ৰীবাহী বাছত সৈতে খুন্দা মাৰে।
দুৰ্ঘটনাটো ইমানেই ভয়াৱহ আছিল যে গাড়ীখন সম্পূৰ্ণৰূপে বিধ্বস্ত হৈ পৰে। সেই ঘটনাস্থলীৰ দৃশ্যত দেখা গৈছে যে গাড়ীখনৰ খিৰিকীবোৰ ভাঙি চূৰ্ণ-বিচূৰ্ণ হৈছে আৰু বাছখনৰ সন্মুখভাগ ক্ষতিগ্ৰস্ত হৈছে।
ঘটনাত নিহত হোৱা ছাত্ৰৰ ভিতৰত আছে মহম্মদ, মুহাছিন, ইব্ৰাহীম, দেৱানন্দ আৰু শ্ৰীদীপ। আৰক্ষীৰ মতে, পাঁচজনৰ ভিতৰত তিনিজনৰ থিতাতে মৃত্যু হয়। আন দুজনৰ চিকিৎসালয়লৈ নিয়াৰ পথত মৃত্যু হয়।
লগতে পঢ়কঃ বিয়াত বহিবলৈ সাজু পি ভি সিন্ধু, কাৰ ডিঙিত মালা পিন্ধাব অলিম্পিক পদক বিজয়ী শ্বাটলাৰগৰাকীয়ে?
দুৰ্ঘটনাত আহত দুগৰাকী ছাত্ৰ বৰ্তমান আলাপ্পুঝা চিকিৎসা মহাবিদ্যালয় হাস্পতালত চিকিৎসাধীন হৈ আছে। ইফালে যাত্ৰীবাহী বাছখনত থকা চাৰিজন লোক সামান্যভাৱে আঘাতপ্ৰাপ্ত হৈছে আৰু তেওঁলোকৰ অৱস্থা সুস্থিৰ।
স্থানীয় সূত্ৰৰ পৰা জানিব পৰা মতে, চেভ্ৰলেট টাভেৰা গাড়ীখনে আন এখন বাহন অভাৰটেক কৰিবলৈ চেষ্টা কৰিছিল। সেই সময়ত হঠাতে ব্ৰেক মৰাত গাড়ীখন স্কিড কৰি বাছখনত খুন্দা মাৰে। সংঘৰ্ষৰ ফলত গাড়ীখন সম্পূৰ্ণৰূপে বিধ্বস্ত হয়।
জৰুৰীকালীন সেৱাৰ কৰ্মীসকলে গাড়ীখনৰ ধ্বংসাৱশেষৰ মাজৰ পৰা মৃতদেহকেইটা উদ্ধাৰ কৰে। আৰক্ষীৰ তথ্য অনুসৰি নিহত আটাইকেইজন ছাত্ৰ- আলাপ্পুজাৰ বান্দনাম চিকিৎসা মহাবিদ্যালয়ৰ প্ৰথম বৰ্ষৰ ছাত্ৰ।
লগতে পঢ়কঃ হিন্দু নিৰ্যাতনৰ প্ৰতিবাদ, ত্ৰিপুৰাৰ বাংলাদেশৰ দূতাবাসত আক্ৰমণ! ঢাকাৰ ক্ষোভ, গৰিহনা দিল্লীৰ
এই মৰ্মান্তিক দুৰ্ঘটনাত সমগ্ৰ অঞ্চল স্তম্ভিত হৈ পৰে। দ্ৰুত গতিত গাড়ী চলোৱাৰ বিপদৰ বিষয়ে সকীয়াই দিছে বিশেষজ্ঞসকলে। এই দুৰ্ঘটনাটোৱে আকৌ এবাৰ সোঁৱৰাই দিছে পথত সাৱধান হোৱাৰ প্ৰয়োজনীয়তা। জীৱন ৰক্ষাৰ বাবে দায়িত্বশীলভাৱে গাড়ী চলোৱা আৰু যান-বাহনৰ নিয়ম পালন কৰাটো অতি প্ৰয়োজনীয়।
