অসমত ক’ৰ’না ভাইৰাছত আক্ৰান্ত হোৱাৰ লোকৰ সংখ্যা ৫ জনলৈ বৃদ্ধি পাইছে।
মঙলবাৰে অসমত প্ৰথমগৰাকী ক’ৰ’নাত আক্ৰান্ত হোৱা ব্যক্তি চিনাক্ত হোৱাৰ পাছত আজি গুৱাহাটী চিকিৎসা মহাবিদ্যালয়ত আৰু চাৰি গৰাকী নতুন ব্যক্তিৰ শৰীৰত ক’ৰ’না ভাইৰাছৰ উপস্থিতি নিশ্চিত হয়।
নতুন কৈ ক’ৰ’নাত আক্ৰান্ত হোৱা লোক কেইগৰাকী হ’ল ক্ৰমে- নলবাৰীৰ মহম্মদ আশ্ৰাদ আলী (১৯), জাগীৰোডৰ ক্ৰমে মহম্মদ হজৰত আলী(৬০), মহম্মদ নুৰুদ্দিন(৫৫) আৰু মহম্মদ জোনাব আলী (৪৬)।
নতুনকৈ ক’ৰ’নাত আক্ৰান্ত হোৱা আটাইকেইগৰাকী লোকে দিল্লীৰ নিজামুদ্দিনৰ জামাতত অংশগ্ৰহণ কৰি অসমলৈ উভতি আহিছিল বুলি ৰাজ্যৰ স্বাস্থ্য মন্ত্ৰী হিমন্ত বিশ্ব শৰ্মাই আজি সংবাদ মেলত সদৰি কৰে।
উল্লেখযোগ্য যে, আজি সন্ধিয়ালৈ অসমত ক’ৰ’না ভাইৰাছত আক্ৰান্ত লোকৰ সংখ্যাই দহকৰ ঘৰত প্ৰৱেশ কৰিব বুলিও হিমন্তই কয়।
আনহাতে, দিল্লীৰ পৰা অসমলৈ ঘুৰি অহা এইকেইগৰাকী লোকৰ শৰীৰত ক’ৰ’না ভাইৰাছৰ উপস্থিতি ধৰা পৰাৰ লগতে দিল্লীত বৰ্তমানেও থকা চাৰিগৰাকী অসমৰ লোকৰ শৰীৰত ক’ৰ’না ভাইৰাছৰ উপস্থিতি ধৰা পৰা বুলি হিমন্তই কয়।
দিল্লীত থকা লোককেইজনক বাক্সা জিলাৰ নস্কাৰ আলী (৭২), ফহৰুদ্দিন (৪৮) বৰপেটা জিলাৰ মুছটাফা আহমেদ (৬০) আৰু নগাঁও জিলাৰ মোহম্মদ আলী (৬৫) বুলি চিনাক্ত কৰা হৈছে।
সংবাদমেলত হিমন্তই এই সকল লোকে মাৰ্কাজত অংশগ্ৰহণ কৰাৰ পাছত অসমলৈ অহাৰ পাছতে স্বাস্থ্য বিভাগক অৱগত নকৰাৰ বাবেই ৰাজ্যত ক’ৰ’নাত আক্ৰান্ত হোৱা লোকৰ সংখ্যা বহু পৰিমানে বৃদ্ধি পাব বুলি কয়।