শুকুৰবাৰে লখিমপুৰ লোকসভা সমষ্টিৰ কংগ্ৰেছ প্ৰাৰ্থী অনিল বৰগোহাঁইৰ ওপৰত কৰা আক্ৰমণৰ ঘটনাৰ সৈতে জড়িত থকাৰ অভিযোগত আজি চিলাপথাৰ আৰক্ষীয়ে পাঁচজন অভিযুক্তক গ্ৰেপ্তাৰ কৰিছে।
জানিব পৰা মতে আটকাধীন লোক কেইজন ক্ৰমে মিছিং স্বায়ত্ত শাসিত পৰিষদৰ অধ্যক্ষ তথা গণশক্তি দলৰ নিৰ্বাচিত প্ৰতিনিধি কনক দলে, আন এজন গণশক্তিৰ নেতা ইন্দ্ৰজিৎ চুংক্ৰাঙৰ উপৰি লিখন মৰাং, লুইছ পেগু আৰু ৰাজু টাইড বুলি চিনাক্ত কৰে।
জানিব পৰা মতে কালি বৰগোহাঁইয়ে নিৰ্বাচনী প্ৰচাৰ অভিযান চলাই ওভটাৰ পথত জোনাই সমষ্টিৰ দুই স্থানত ক্ৰমে চিলাপথাৰৰ সমীপৱৰ্তী চিলাসূঁতি আৰু ৰিগবি নামৰ ঠাইত এই লোক কেইজনে কংগ্ৰেছ প্ৰাৰ্থীগৰাকীক শিলগুটিৰে আক্ৰমন কৰা বুলি দলটোৱে এজাহাৰ দাখিল কৰিছিল।
এজাহাৰৰ পিছতেই ধেমাজি আৰক্ষী অধীক্ষকে বিষয়টো সন্দৰ্ভত তৎপৰতা প্ৰদৰ্শন কৰি সমষ্টিটোৰ বিভিন্ন স্থানত অভিযান চলাই আটাইকেইজন অভিযুক্তকে গ্ৰেপ্তাৰ কৰিবলৈ সক্ষম হয়। বৰ্তমান আৰক্ষীয়ে আটকাধীন লোক কেইজনক ঘটনা সন্দৰ্ভত সোধা পোচা কৰি আছে বুলি জানিব পৰা গৈছে।
উল্লেখ্য যে শুকুৰবাৰে বিয়লি প্ৰায় ৪.২০ বজাত চলোৱা এই আক্ৰমণত বৰগোহাঁইৰ এ এছ ২২ বি ৪২৮৪ মহিন্দ্ৰা এক্স য়ু ভি বাহনখনৰ পিছফালৰ আইনা ভাঙি যায়। এই ঘটনাত কংগ্ৰেছ প্ৰাৰ্থীগৰাকীৰ লগতে আন কেইবাজনো কংগ্ৰেছ সমৰ্থক আঘাতপ্ৰাপ্ত হৈছিল। পিছত কংগ্ৰেছ প্ৰাৰ্থীগৰাকীৰ লগতে আঘাতপ্ৰাপ্ত লোক কেইজনক চিকিৎসালয়ত ভৰ্তি কৰোৱা হয়।
ইফালে এই ঘটনাৰ পিছতেই কংগ্ৰেছ সমৰ্থকসকলে এই ঘটনাক তীব্ৰ ভাষাৰে গৰিহনা দিয়াৰ লগতে দোষীক উপযুক্ত শাস্তি প্ৰদানৰ দাবীত কিছু সময়ৰ বাবে ৰাষ্ট্ৰীয় ঘাইপথো অৱৰোধ কৰিছিল। পাছত ঘটনাস্থলত আৰক্ষীৰ উচ্চ পৰ্যায়ৰ এটি দল উপস্থিত হৈ ঘটনাৰ সৈতে জড়িত ব্যক্তিক শীঘ্ৰে কৰায়ত্ত কৰিব বুলি আশ্বাস দিয়াতহে পৰিস্থিতি নিয়ন্ত্ৰণত আহে।
এইখিনিতে উল্লেখ কৰিব পাৰি অহা ১১ এপ্ৰিলত হ’ব লগীয়া প্ৰথম পৰ্যায়ৰ লোকসভা নিৰ্বাচনৰ ভোটগ্ৰহণৰ দিন চমু চাপি অহাৰ লগে লগে ৰাজ্যৰ ৰাজনীতি অধিক উত্তপ্ত হৈ পৰা পৰিলক্ষিত হৈছে।
