সমগ্ৰ গুৱাহাটীত দেহ ব্যৱসায় চক্ৰৰ সৈতে জড়িত থকাৰ অভিযোগ উত্থাপন হোৱা কেইবাখনো স্পা-চেলুনত সমন্বিত অভিযান চলাই কমেও ১০ জন লোকক গ্ৰেপ্তাৰ কৰা হৈছে। গুৱাহাটী আৰক্ষীয়ে বৃহস্পতিবাৰে প্ৰকাশ কৰে এই কথা।
মহানগৰীৰ উপ আৰক্ষী আয়ুক্ত শম্ভাৱী মিশ্ৰই এখন সংবাদমেল সম্বোধন কৰি কয় যে পানবজাৰ, চান্দমাৰী, পল্টন বজাৰ আৰু গীতানগৰ থানাৰ সহযোগত মহানগৰীৰ একাধিক স্থানত এই অভিযান চলোৱা হৈছিল।
মিশ্ৰই কয়, ‘আমি ৫টা পৃথক গোচৰত ১০ জন লোকক গ্ৰেপ্তাৰ কৰাৰ লগতে ১৩ জন ভুক্তভোগীক উদ্ধাৰ কৰিছো। এয়া এক চলি থকা তদন্ত আৰু গুৱাহাটী আৰক্ষীয়ে এনে অবৈধ কাম-কাজ সহ্য নকৰে।’
তেওঁ যোৱা ২০ জানুৱাৰীত পাঁচটা স্পা চেণ্টাৰত অভিযান চলোৱাৰ সময়ত আপত্তিজনক সামগ্ৰীও উদ্ধাৰ কৰা বুলিও জনায়। জেৰাৰ সময়ত স্পা চেণ্টাৰৰ সৈতে জড়িত কেইবাগৰাকীও মহিলাই তদন্তকাৰীক জনায় যে তেওঁলোকে আৰ্থিক দুৰ্দশাৰ বাবেই এই কামত হাত দিছে।
তেওঁ লগতে কয় যে আৰক্ষীয়ে চহৰখনৰ কেইবাটাও স্পা চেণ্টাৰ যৌন চক্ৰৰ সৈতে জড়িত বুলি ধৰা পেলাইছে, ইয়াৰে কিছুমান মহিলা মালিকে চলাই আছে। মিশ্ৰই জনায়, ‘দুই-তিনিটা ঘটনাত আমি দেখিলোঁ যে স্পা চেণ্টাৰসমূহ মহিলাৰ মালিকানাধীন। তেওঁ যিকোনো সন্দেহজনক কাৰ্যকলাপ আৰক্ষীক অৱগত কৰিবলৈ নাগৰিকসকলক আহ্বান জনায় যাতে সময়মতে ব্যৱস্থা ল’ব পৰা যায়।
ঘটনাৰ সবিশেষ দাঙি ধৰি মিশ্ৰই কয় যে পানবজাৰৰ ভাৰ্গৱ হেয়াৰ বিউটি স্পা এণ্ড ইউনিচেক্স চেলুন; এআইডিচিৰ মৌ স্পা চেণ্টাৰ আৰু বিউটি চেলুন; মণিপুৰী বস্তিত ব্লিছ স্পা ইউনিচেক্স চেলুন আৰু দিব্য বিউটি ষ্টুডিঅ’; আৰু ৰাজগড়ৰ কালাৰ্ছ স্পা আৰু বিউটি চেলুনৰ বিৰুদ্ধে গোচৰ পঞ্জীয়ন কৰা হৈছে। এই সন্দৰ্ভত অধিক তদন্ত চলি আছে আৰু এইক্ষেত্ৰত অধিক গ্ৰেপ্তাৰৰ সম্ভাৱনাৰ কথাও তেওঁ ব্যক্ত কৰে।
