ৰাজ্যত বৰ্তমান বানে গৰকা ৰাইজৰ নাজল-নাথল অৱস্থা। খাদ্য-আশ্ৰয়ৰ অভাৱত বান বিধ্বস্ত লোকসকলে এতিয়া চৰকাৰৰ নেতা-মন্ত্ৰীসকলৰ ওপৰতো ক্ষোভ প্ৰকাশ কৰিবলৈ লৈছে।
মঙলবাৰে ৰঙিয়া সমষ্টিৰ হীৰাপাৰাত উপস্থিত হয় বিধায়ক ভৱেশ কলিতা। কিন্তু বান সাহায্য নোপোৱা বন্যাৰ্তৰ ক্ষোভৰ সন্মুখীন হ’বলগীয়া হয় বিধায়ক গৰাকী। যাৰ ফলত বানপানী পৰিদৰ্শন নকৰাকৈয়ে উভতিব লগীয়া বিধায়ক গৰাকী।
বিগত ৫ দিনে বানাক্ৰান্তই কোনোধৰনৰ সাহায্য নোপোৱাত অনাহাৰে থাকিব লাগীয়া হোৱাত বানাক্ৰান্ত শ-শ পৰিয়ালৰ ক্ষোভৰ বহিৰ্প্ৰকাশ ঘটে।
বন্যৰ্তৰ ক্ষোভ আজিলৈকে তেওঁলোকে কোনো চৰকাৰী সাহায্য লাভ কৰা নাই। চাউল-দালিকে ধৰি অত্যাৱশ্যকীয় সামগ্ৰীৰ অভাৱত পাঁচদিন ধৰি একো খাবলৈ নোপোৱাৰ কথাও প্ৰকাশ কৰে একাংশ বানপানীৰ কবলত পৰা লোকে।
ঘৰত একঁকাল পানী উঠা এইসকল বন্যাৰ্তৰ ক্ষোভ যে তেওঁলোকে ভাততো খাব পোৱাই নাই, আনকি খাবলৈ পানীটুপিও পোৱা নাই।
আনহাতে, একাংশ বন্যাৰ্তই বান সাহায্য বিতৰণত দালালৰ পয়োভৰ ঘটা বুলিও অভিযোগ কৰে।
প্ৰায় আঠদিন ধৰি বানপানীৰ মাজত কটোৱা বন্যাৰ্তৰ অনুৰোধ যে তেওঁলোকক যাতে সোনকালেই বান সাহায্য দিয়া হয়।
বিধায়ক তথা বিজেপিৰ ৰাজ্যিক সভাপতিগৰাকীয়ে এনেদৰে নিজৰ সমষ্টিতে ক্ষোভৰ সন্মুখীন হ’বলগীয়া হোৱাত স্বাভাৱিকতে প্ৰশ্ন উঠিছে যে বিজেপি চৰকাৰৰ মন্ত্ৰী-বিধায়ক তথা নেতাসকলে ৰাজনীতিত ব্যস্ত থকাৰ বাহিৰে দুৰ্গতজনৰ কাষত থিয় দিয়াৰ হয়তো সময়েই পোৱা নাই!
