যোৱা কেইবাদিনো ধৰি নেৰানেপেৰাকৈ হৈ থকা বৰষুণৰ ফলত দৰং জিলাৰ বান পৰিস্থিতি ক্ৰমে জটিল হৈ পৰিছে। জিলাখনৰ মুঠ ৮৫ খন গাওঁ বাঢ়নী পানৰ কবলত পৰিছে। বানত এই পৰ্যন্ত ৫৫,২৬৭ গৰাকী লোক ক্ষতিগ্ৰস্ত হৈছে।
জিলাখনৰ ননৈ, নোৱা নৈ আৰু শাকতোলা নৈ এই পৰ্যন্ত বিপদসীমাৰ ওপৰেৰে বৈ আছে। ইফালে মঙলদৈ ৰাজহ চক্ৰৰ অন্তৰ্গত কানাইচুবা, নহাউলী, এন চি চাউলখোৱা, এক নং চাউলখোৱা, ২ নং চাউলখোৱাকে ধৰি কেইবাখনো গাঁও বানপানীৰ কবলত পৰিছে।
মঙলদৈ ৰাজহ চক্ৰৰ মুঠ ৬,১০২ টা পৰিয়াল বানত ক্ষতিগ্ৰস্ত হৈছে। মঙলদৈ সমষ্টিৰ বিধায়ক গুৰুজ্যোতি দাসে বানপীড়িত অঞ্চলসমূহৰ ক্ষয়-ক্ষতিৰ বুজ লৈছে। তাৰোপৰি প্ৰাক্তন মন্ত্ৰী বসন্ত দাসে বান ক্ষতিগ্ৰস্ত অঞ্চলসমূহ পৰিদৰ্শন কৰি জিলা প্ৰশাসনক উপযুক্ত ব্যৱস্থা গ্ৰহণ কৰিবলৈ আহ্বান জনাইছে।
জিলাখনৰ ওৰাং ৰাজীৱ গান্ধী ৰাষ্ট্ৰীয় উদ্যানৰ ৬০ শতাংশই বাঢ়নী পানীৰ কবলত পৰি বুৰ গৈছে। ফলত উদ্যানত থকা পশুধনৰ মাজত দেখা দিছে তীব্ৰ খাদ্য সংকটে।